އެދުވަހު އަހަރެންގެ މަންމަ އަހަރެންގެ ގެޔަށް އައީ ކުރިން ބުނުމަކާ ނުލައެވެ. އައިއިރު ގެނައީ އެންމެ ކޮތަޅެކެވެ.އޭގައިވަނީ އިސްޓާކީނަކާ، ގޭތެރޭ އަރާކަހަލަ ފައިވާނަކާ، ފެންވަރައިގެން ނިކުންނަ އިރު ލާކަހަލަ ބާތު ރޯބް އަކާއި އެއްހެދުން އަދި ބާލީހު އުރައެކެވެ. އިސްޓާކީނުގައި ވަނީ ”މުޅިދުނިޔޭގައިވާ އެންމެ ބެސްޓް މާމަ“ މިހެން ރޮދިން ލިޔެފައެވެ.އެއީ އަހަރެންގެ ކުދިން މަންމަޔަށް ދިން ހަދިޔާއެކެވެ.
އެދުވަހު އައި ގޮތަށް މަންމަ އުޅެމުން ދަނީ އަހަރެންނާއެކު އަހަރެންގެ ގޭގައެވެ. މިހާރު ތިންހަފްތާ ވީއެވެ. އަހަރެންނަށް ހީވަނީ އުމުރުން 75 އަހަރުގެ ބަލިކަށި ކުޑަކުޑަ އަންހެން ކުއްޖެއް ގެންގުޅެވޭ ހެންނެވެ.މަންމަގެ ހުދު ވެފައިވާ އިސްތަށިގަޑު އަބަދުވެސް ބަހައްޓަނީ ފަހަތަށް ފުނާއަޅާ ހުޅިއަކަށް ވާގޮތަށް އައްސާލާފައެވެ.މަންމަ ބޭނުންވާ އިސްޓާކީނާ ފައިވާނުގައި ގޭތެރޭ މަޑުމަޑުމަޑުން ހިގާލާއިރު ފައިއަޅާ ފައިނަގާގޮތުން ހުރަސްތަކެއް ގިރާކުރާހެން ހީވެއެވެ.
މިހެން ހިނގާއިރު ގޭތެރޭން ބުޅާ ފެންނަން އިންނަމަ ބުލަލަށް ހީލާނެއެވެ. އަދި އަމިއްލަޔަށް މަޑުމަޑުން ކޮންމެވެސް ވާހަކަ ތަކެއް ދައްކައެވެ. ފަހުން އަހަރެންނާވެސް މިވާހަކަތައް ހިއްސާކުރެއެވެ.އަހަރެން މަންމަ ދައްކާ ވާހަކަ އަޑުއަހަމެވެ.އަހަރުން ދެއްކިހާ ވާހަކަވެސް މަންމަ އަޑުއެހިގޮތަށެވެ.
ގޭތެރޭ ހިނގާލާ ހެދިނަމަވެސް މަންމަގެ މައްޗަށް މިއަދު ވަނީ އާދަޔާޚިލާފް ހިމޭން ކަމެއް ވެރިވެފައެވެ. އެހެން މީހުނާ ކުރިމަތިލާން ލަދު ގަނެއެވެ. މަންމަޔަށް މިހާރު ވަރަށް ފަސޭހައިން ނިދެންވެސް ނިދެއެވެ.
މަންމަގެ ކޮޓަރީގައި އަހަރެން ބަހައްޓާ ޗޮކްލެޓް ވަރަށް މީރުވެގެން ކައިހަދައެވެ.ސައި ބުއިމަށް ލޯބި ކުރެއެވެ. ތުރުތުރުއަޅާއަތަކުން ސައިތަށިއަޅާއިރު އަބަދުވެސް ކައިވެނީގެ އަނގޮޓި އިންތޯ ޗެކްކޮށްލާނެއެވެ. އަހަރެން މަންމަޔަށް ކޮންމެ ދުވަހަކު ސުޕް ކައްކާދެމެވެ. މަންމަޔަށް ފަސޭހައިން ބޮވެނީ ސުޕް އަށް ވީމައެވެ.
މަންމަ އަކީ މިއަދު ކުރިން އަހަރެން ދެކެމުންއައި ހިތްވަރުގަދަ،ކެރޭ އަދި އެކަނި ކަންތައްތައް ކޮށްލެވޭ މަންމައެއްނޫނެވެ.މަންމަ މިއަދުވަނީ އެހިތްވަރު ދޫކޮށްލާފައެވެ. ވަރިހަމަ ކޮށްލާފައެވެ.މިއަދު އަހަރެން މަންމަ ކައިރީގައި ހުރިނަމަ މަންމަޔަށް ފުދެއެވެ. އަހަރެން ބޭރުން އައުމުން މަންމަ ވަރަށް އުފާވެއެވެ. މަންމަ ބޭރުން އައުމުން އަހަރުން ކުޑައިރު އުފާވާ ގޮތަށެވެ.
ފުރަތަމަކޮޅު އަހަރެންނަށް ބުނެދޭން ނޭނގޭ އިހިސާސްތަކެއް ކުރުވިއެވެ. އަހަރެންގެ އިތްވަރުގަދަ ކެރޭ މަންމަ ކޮބާހެއްޔެވެ. ބައްޕަ ނިޔާވުމުންވެސް މަންމަ ބޭނުންވީ އެހިއްވަރުގައި އެކަނި އުޅޭށެވެ. ގޭތެރޭގައި އަތް ގާތްކޮށްދޭނެ ނޯކަރުން ތިބެއެވެ. އެގޮތުގައި ތިންއަހަރުވަންދެން މަންމަ އުޅުނެވެ. ނަމަވެސް ވަގުތާއެކު މިއަދު މަންމަ ވަނީ ބަދަލުވެފައެވެ. މަންމަގެ ހިތްވަރުވަނީ ބަލިވެފައެވެ.
އަހަރެންގެ މުޅިހަޔާތް މަންމަޔާއެކު ހިއްސާކޮށްފައި ވާއިރު،މިއަދު އަހަރެންނަށް އޮތީ ލޯތްބާއި އޯގާތެރިކަމާއެކު މިގުޅުން އިތުރަށް ވަރުގަދަ ކުރުމެވެ.އަހަރެންގެ އެންމެ އިސް ވާޖިބަކީ މަންމަ އުފަލުގައި ބޭންދުމެވެ. މަންމަ އުފާވާނެހާ ކަންތައް ކޮށް ދިނުމެވެ. މަންމަޔަށް މީރުވާނެހާ ކާއެއްޗެތި ތައްޔާރު ކޮށް ދިނުމެވެ. ނަމަވެސް މަންމަގެ ގާތުގައި އަހަރެން،މަންމަގެ ދަރިފުޅު ހުރެއްޖެ ނަމަ މަންމަޔަށް ފުދުނީއެވެ. އެހެން އެއްވެސް ކަމެއް މަންމަ ބޭނުމެއް ނުވެއެވެ.
އަހަރެންނަށް މިއަދުވަނީ އިތުރު އަންހެން ދަރިއަކު ލިބިފައެވެ. އުމުރުން 75 އަހަރުގެ ދަރިއެކެވެ. މަންމަގެ އުމުރުގެ ފަހު ދުވަސްތަކުގައި އުފަލުން ބޭދުމުގެ ފުރުސަތު އަހަރެންނަށް ލިބުނީތީ އަހަރެން ޝުކުރުވެރި ވަމެވެ.މަންމާ އެވެ. އަހަރެން ކައިރިއަށް އައިސް އަހަރެންނަށް މިފުރުސަތު ދިނީތީ މަންމަޔަށް ޝުކުރިއްޔާއެވެ. ދެން ވީހާވެސް ގިނަ ދުވަހަކު އަހަރެން ކައިރީ އިނދެދޭށެވެ. މިފުރުސަތު އޮތް ހާދުވަހަކު މަންމަ ގައިގާ އަހަރެންނަށް ބެއްދުނުހާ ގިނައެއްކޮށް،ބެއްދުނުހާ ބާރަކަށް ބައްދާނަމެވެ.