އަހަރެންނާ އަހުމަދުގެ ކައިވެނި ވަރަށް ވެސް އުފާވެރިއެވެ. ކައިވެންނަށް ވީ 3 އަހަރުތެރޭގައި ހަމަ ކޮންމެ ދުވަހަކު މަދުވެގެން އެއްފަހަރު އަހަރެން ދެކެ ލޯބިވާކަމަށް އޭނާ ބުނެއެވެ. އަހަރެން ވެސް އެނަދެކެއެހާ ލޯބިވެއެވެ. ދެމިހުންގެ މަސައްކަތުން ރީތި ކުޑަކުޑަ ގެޔެއް އަޅާފައިވާއިރު ގެ ރަޖިސްޓްރީ ކޮށްފައިވަނީ އަހަރެންގެ ނަމުގައެވެ.

ކައިވެންޏަށް 3އަހަރުވެގެން މާގިނަ ދުވަހެއް ނުވެއެވެ. އެއްދުވަހަކު އަހަރެން އޮފީހުގަ އުޅެފަ ވަރުބަލިވެގެން ގެއަށް އައިއިރު އަހުމަދު ވަރަށް ހަމަޖެހިލައިގެން ސިޓިންގރޫމްގައި އިނެވެ. ކައިރީގައި އަންހެނަކު އިނެވެ.ބަނޑު ބޮޑު އަންހެނެކެވެ.
އަހަރެން ފުރަތަމަ ހީވީ އެހެން ގެޔަކަށް ވަދެވުނީ ކަމަށެވެ.ނަމަވެސް އެވަގުތު
އަހަރެން ނަށް އަހުމަދު ގޮވާލިއެވެ. އަދި ބުންޏެވެ. ”މަރީ އާދެބަލާށެވެ.އަހަރުން ވާހަކަ ދައްކަން އެބަޖެހެއެވެ.“ އަހަރެން ހުރިތާ ހުރީމެވެ. ބަނޑުބޮޑުމީހާ އުނދަގޫ ގޮތަކަށް ހީލަން މަސައްކަތް ކުރި އެވެ. އަދި އަމިއްލަ ބަނޑުގައި ފިރުމާލިއެވެ. އެވަގުތު އަހުމަދު ބުންޏެވެ.
”މިއީ އައިޝާއެވެ.އައިޝާ ބަލިވެ އިނީ އަހަރެންގެ ކުއްޖަކަށެވެ…..މިކަން މިހެންވީއެވެ.“
އަހަރެން އަދިވެސް ހުރިތާ ގަބުވެފައި ހުރީމެވެ. މިކަން މިހެންވީއޭ؟ހުރި ގޮތްކުޑަކަން ނިކަން ދެކިބަލާށެވެ. އޭނަތަނެއްގައި އޮއްވާ އޭނަ ގައިގަ އަޅައިގަނެފަ އޭނަގެ ގައިމައްޗަށް އަހުމަދު ވެއްޓުނީހެއްޔެވެ. އަހުމަދުގެ ދައުރެއް ނެތި ”އެކަން ވާނީ“ އެކަހަލަ ގޮތަކަށް ނޫންހެއްޔެވެ.
އަހުމަދު ވާހަކަ ދައްކަމުން ދިޔައެވެ.“އަހަރެންނާ އައިޝާ މިގޭގަ އުޅެން ނިންމައިފީމެވެ.އެހެން ވީމަ މަރީ މަންމަގެ ގެޔަށް ބަދަލުވާށެވެ.“
އަހަރެން ހުރީ ޝޮކެއްގައި ކަމުން އެވަގުތު އެއްޗެއް ބުނެވޭގޮތެއް ނުވިއެވެ.
އެދިޔަގޮތަށް ކޮޓަރިޔަށް ގޮސް ކުޑަ ސޫޓްކޭސް އަކަށް އަހަރެން ބޭނުން އެއްޗެތި އެޅީމެވެ. މާބޮޑު ފޮއްޓެއް ގެންގޮސްފިނަމަ މަންމަ ސުވާލު ކުރަން ފަށާނެތީއެވެ. ފޮއްޓެއް ޕެކްކޮށްލުމަށްފަހު ވަގުތުން ތިރިޔަށް ފައިބައިގެން ގެއިން ނިކުމެގެން ދިޔައިމެވެ.
އަހަމަދު އިނީ މާބޮޑު ހާސްކަމެއް ނެތިއެވެ. އެހާފަސޭހައިން އަހަރެންގެ ކިބައިން ސަލާމަތް ވީކަމަށް ހީކޮށް ކަމަށް ވެދާނެއެވެ.
ކާރުގަ މަންމަމެންގެޔަށް ދިޔަމަގުމަތީ ޝޮކް ފިލާ،ހިތާމަވެރިކަން މުޅި ހަށިގަނޑުގައި ފެތުރި ގަތެވެ. އެހެން ކަމުން ކާރު ތަނަކު މަޑުކޮށްގެން އިނދެ އިރުގަނޑަކު ރުއިމެވެ. ރޭގަނޑުގެ ވަގުތެއް ކަމުން މީހުންނަށް މާބޮޑަށް ފާހަގަވާގޮތެއް ނުވިއެވެ.
އިރުގަނޑަކު ރުއިފަހުން ހިތުގައި ބަދަލު ހިފުމުގެ ޝުއޫރު ހިނގައިގަތެވެ. އަހަރެންގެ އުންމީދުތައް ފުނޑުފުނޑުކޮށްލާ އަހަރެންގެ ހަޔާތް އެކޮޅުކޮޅުން ޖަހާލުމުގެ ހުއްދަ އަހުމަދަށް ދިނީ ކާކު ހެއްޔެވެ.
އަނެއް ދުވަހު ހެދުނު 9 ޖެހީ އަހަރެން ބޭންކު ދޮށުގައި ހުއްޓައެވެ. ފުރަތަމަ ކަމަކަށް ހެދީ އަހަރެންނާ އަހުމަދު ގުޅިގެން ހަދާފައިވާ ޖޮއިންޓް އެކައުންޓް ބަންދު ކޮށްލުމެވެ. އަދި ހުރިހާ ފައިސާއެއް ނަގާ އެކައުންޓް ޒީރޯ އަށް ހަދާލީމެވެ.
ދެން ދިޔައީ ތަޅު ހަދާ މީހެއް ކައިރިއަށެވެ. އޭނަ ގޮވައިގެން ގޮސް ގޭގެ ބޭރު ދޮރުގެ އިތުރުން އެތެރޭގެ މުހިންމުތަޅުތައް ބަދަލު ކޮށްލުވީމެވެ.އޭރު އަހުމަދާ އޭނަގެ ”ވަގުބިޓު“ ވީ އޮފީހުގައެވެ. ދެން އަހަރެން ގުޅީ ގެބަދަލު ކޮށްދޭ ބަޔަކާއެވެ. އެމީހުން ގެނެސް އަހަރެން ބޭނުން ހުރިހާ ފަރުނީޗަރަކާ ހިފާގެންގުޅޭ އެއްޗެތި އެމީހުންގެ ވެހިކަލް އަށް އަރުވައިގެން މަންމަމެންގެޔަށް ދިޔައިމެވެ.މިވަރުންވެސް އަހަރެން ހިތްހަމަ ޖެހޭ ގޮތެއް ނުވިއެވެ.
ކުޑަ ޕްރޭންކެއް ޖައްސާހިތްވިއެވެ. އަހުމަދާ އަހަރެން ދަންނަ ރައްޓެހި ހުރިހާ މީހުންނަށް މެސެޖެއް ފޮނުވީމެވެ. އަހުމަދުގެ ފަރާތުން ޕާޓީ އަކަށް ދައުވަތު ދީފައެވެ. ދަރިއަކު ލިބެން އުޅޭތީ އެކަމުގެ އުފަލުގައެވެ. އަހުމަދު އެކުރިކަމެއް ކޮށްފަ އެޔޮތީ ވަގަށެވެ.އެހެންވީމަ އަހުމަދުގެ އާއިލާ މީހުންނަށް އަންގާލަން ޖެހޭނެތާއެވެ.
ދެން އަވަސް އަވަހަށް އެތަނުން ދުރަށް ދިޔައިމެވެ.
އަހުމަދު ހީކުރީ ކީކޭ ކަމަށްހެއްޔެވެ؟ އަހަރެންނަކީ އެހާ ބަލިކަށިމީހެއް ކަމަށް ހެއްޔެވެ.އެހާފަސޭހައިން އަހަރެން މޮޔަހައްދާލެވޭނެ ކަމަށް ހެއްޔެވެ. ގެޔަކީ އަހަރެންގެ ނަމުގައިވާ ގެޔެއްކަންވެސް އޭނަ ހަނދާން ނެތް ކަހަލަ އެވެ.
އަންހެނުންނަކީ އެއްޗެއް ނުވިސްނޭ މޮޔައިން ކަމަށް ހީކޮށް ހިތަށް އެރިހާ ގޮތެއް އަންހެނުންނަށް ހަދާލާ ފިރިހެނުން އަދިވެސް މަދެއް ނޫނެވެ.އެހެން ހީނުނުކުރާށެވެ.“މިކަން މިހެންވީއޭ“ ކިޔާލާފަ ފިރިހެނަކަށް އަންހެނުންގެ ހަޔާތް ބަރުބާދު ކޮށްލެވޭނަމަ، ހަމަ އެހާ ރަހުމުކުޑަ،ފިރިހެނުންނަށް ނިކަމެތި ގޮތްގޮތް ހަދަން ކެރޭ އަންހެނުންވެސް ތިބެން ޖެހޭނެއެވެ.
އެދުވަހު އަހުމަދު ގެޔަށް ނުވަދެވިގެން އުޅުނު ގޮތެއްވެސް މަށަކަށް ނޭގެއެވެ. ދިޔަތަނެއްވެސް ނޭގެއެވެ. ބަލާކަށް ބޭނުމެއްވެސް ނުވިއެވެ. ފަހުން މީހަކު ބުނިގޮތުގައި އޭނާ ތަޅު ހަލާކުކޮށްލައިގެން ގެޔަށް ވަންއިރު އެއްޗެތި ގެންގޮއްސަ ހުރުމުން ހުރީ ވަރަށް ކަންތައް ބޮޑުވެފައެވެ.
އަނެއްދުވަހު ގެ ވިއްކާލުމަށްޓަކާ އަހަރެން ނޫހުގައި އިސްތިހާރު ޖެހީމެވެ.އިސްތިހާރު ފެނިގެން އަހުމަދު އަހަރެންނާ ގުޅާ، އެހެން ނުހެދުމަށް އެދި އާދޭސް ކުރިއެވެ. އަދިވެސް މަރީ ދެކެ ލޯބިވާ ކަމަށާ މަރީއާ އެކީ އުޅެން ބޭނުން ކަމަށް ބުންޏެވެ. އައިޝާ ކައިރިޔަށް ދެން ނުދާނެ ކަމަށް ބުނެ ހުވާ ކުރިއެވެ.
އެއީވެސް އަންހެނެކެވެ.އޭނަގެ ހަޔާތްވެސް އަހުމަދުގެ ސަބަބުން ބަރުބާދުވީއެވެ.ރަށް މެދަށް ދަރިޔަކުވިހާ މުޅި ރަށަށް ފަލީހަތް ވީއެވެ. އޭނަކައިރިޔަށް ދެން އަހުމަދު ނުދިޔަ ނަމަވެސް އަހަރެންގެ ހިތުގަ ނުޖެހޭ ކަމަށް ވާނެހެއްޔެވެ.
އަހަރެން އަހުމަދުގެ އާދޭސް އަޑެއް ނާހަމެވެ. ގެ ގަންނާނެ މީހަކު އައި ދުވަހު ގެ ވިއްކާލީމެވެ.އަދި ހަމަ އެހާރިތި ކުޑަކުޑަ އެހެން ގެޔެއް ގަތީމެވެ. އަދި އެގެޔަށް އަހަރެން ކުރީގެޔަށް ހޯދާފަ ހުރި ފަރުނީޗަރުތައް ބަދަލު ކޮށް އުފަލުގައި އުޅެން ފަށައިފީމެވެ.