ވިއެޓްނާމްގައި މިހާތަނަށް ހިންގި އެންމެ ބޮޑު ބޭންކް ފްރޯޑް ހިންގި ވިއެޓްނާމްގެ ފައިސާވެރިޔާ ޓްރުއޮންގ މީލަން ގެ މައްޗަށް އިއްވާފައިވާ މަރުގެ ހުކުމް ކޯޓުން ބަދަލު ކޮށެއް ނުދިނެވެ.

މިއާއެކު އުމުރުން 68 އަހަރުގެ އަންހެނެއްކަމަށްވާ މީލަން އަށް މަރުން ސަލާމަތް ވުމުގެ ފުރުސަތު ހަނިވަމުން އަންނަ ކަމަށް ޚަބަރު ލިބެއެވެ.

ވިއެޓްނާމްގެ ގާނޫނު ބުނާގޮތުން ގައުމުގެ ފައިސާޔަށް ޚިޔާނާތްތެރިވި އަދަދުގެ 75 އިންސައްތަ ދެއްކުމުން މެނުވީ އުމުރުދުވަހުގެ ޖަލު ހުކުމަކަށްވެސް ބަދަލު ކޮށެއް ނުދޭބެއެވެ.

ޓްރުއޮންގ މީލަން ގެ މައްޗަށް މިދިޔަ އެޕްރީލް މަހު ކުރެވުނު ޝަރީއަތުން ހާމަވެފައިވާ ގޮތުގައި އޭނާވަނީ އެގައުމުގެ ފަސްވަނަޔަށް އެންމެ ބޮޑު ބޭންކް، ސައިގޯން ކޮމާޝަލް ބޭންކުން ދިހައަހަރު ދުވަސް ވަންދެން،ޝެލް ކުންފުނިތަކެއް މެދުވެރިކޮށް ގިނައަދަދެއްގެ ކޭޝް އަދި ލޯން ނަގާފައެވެ.

މިގޮތުން އެކުޖުމްލަ 44ބިލިއަން ޑޮލަރު އޭނާ ނަގާފައިވެއެވެ.
ޕްރޮސެކިއުޓަރުން ބުނާ ގޮތުގައި މީގެތެރެއިން 27 ބިލިއަން ޑޮލަރު ނާޖާއިޒު ގޮތުގައި، ހާމަކަމެއްނެތި ބޭނުންކޮށްފައިވާއިރު، 12 ބިލިއަން ޑޮލަރުގައި އޭނާ ވަނީ ޖެހިފައެވެ. ނުވަތަ ވަގަށް ނަގާފައެވެ. މިއީ ވިއެޓްނާމް ގައި މިހާތަނަށް ހިންގި އެންމެ ބޮޑު ފައިނޭންޝަލް ކްރައިމް އެވެ. އަދި މިކުށް ސާބިތުވެ އޭރު އޭނާގެ މައްޗަށް ވަނީ މަރުގެ ހުކުމް އިއްވާފައެވެ.

އަންގާރަ ދުވަހު ކޯޓުން ބުނެފައިވާ ގޮތުގައި މަރުގެ ހުކުމް ބަދަލުކޮށްދިނުމަށް ޓްރުއޮންގ މީލަން އެދުނު ގޮތަށް ހުކުމް ބަދަލު ކުރަންޖެހޭ ސަބަބެއް ނެތެވެ. އޭނާ ހިންގީވަރަށް ބޮޑު ޖަރީމާއެއް ކަމަށާ އަދަބު ލުއިކޮށްދެވޭނެ ތަނެއް ނެތް ކަމުގައި ކޯޓުން ބުނެފައިވެއެވެ. ނަމަވެސް އޭނާ ވަގަށް ނެގި 12 ބިލިއަން ޑޮލަރުގެ ތިންބައިކުޅަ ދެބައި ކަމަށްވާ 9 ބިލިއަން ޑޮލަރު އަނބުރާ ދައްކައިފިނަމަ މަރުގެ ހުކުމުން ސަލާމަތް ކުރެވިދާނެ ކަމަށް ބުނެފައިވެއެވެ.

މި މައްސަލައިގައި ޓްރުއޮންގ މީލަން އަށް އަދިވެސް ރައީސްގެ މައާފަކަށް އެދެވިދާނެ ކަމަށް ވެއެވެ.

ޝަރީއަތް ފެށިގެން އައިތާ ކުރީކޮޅު ޓްރުއޮންގ މީލަން ހަރުކަށިކަން ދައްކަމުން އައި ކަމަށް ވެއެވެ. ނަމަވެސް ފަހުގެ އަޑުއެހުން ތަކުގައި ކުރެވުނު ކުށާމެދު ދެރަވާކަން ކޮންމެވެސް ވަރަކަށް ދެއްކި ކަމަށް ވެއެވެ.

އޭނާ ބުނި ގޮތުގައި ގައުމަށް އެހާބޮޑު ބުރަޔަކަށްވީތީ އެކަމާ އޭނާ ލަދުވެތި ވެއެވެ. އަދި މިހާރު ހަމައެކަނި ވިސްނަނީ އޭނާ ނެގިއެއްޗެއް އަނބުރާ ދެއްކުމާމެދު ކަމަށް ޓްރުއޮންގ މީލަން ބުނެފައި ވެއެވެ.

ވިއެޓްނާމްގެ ހޯޗިންމިންގ ސިޓީ އަށް އުފަންވެފައިވާ ޓްރުއޮންގ މީލަން ވިޔަފާރީގެ މަސައްކަތް ފަށާފައިވަނީ މަންމަޔާ އެކު ހިންގި ކޮސްމެޓިކްސް ވިއްކާ ކުޑަ ސްޓޯލަކުންނެވެ. 1986 ވަނަ އަހަރު ކޮމިޔުނިސްޓް ޕާޓީން އިގްތިސާދީ ރިފޯމް ތައް އިއުލާން ކުރުމާއި އެކު އޭނާ ބިން އަދި އެކި ޕްރޮޕަޓީތައް ގަންނަން ފެށިއެވެ. އަދި ނުވަދިހައިގެ އަހަރު ތަކަށް އެޅުނު އިރު އޭނާ ވަނީ ގިނަ އަދަދެއްގެ ހޮޓާތަކާއި ރެސްޓޯރަންޓްތައް ގަނެފައެވެ.
ދައުލަތުގެ ފައިސާޔަށް ޚިޔާނާތްތެރިވި ކަމުގެ ކުށް އެޕްރިލް މަހު ސާބިތުވިއިރު އޭނާ ހުރީ ރިޔަލް އެސްޓޭޓް ބޮޑު ފަރމް އެއްގެ ޗެއާވުމަން ގެ މަގާމުގައެވެ.

ޓްރުއޮންގ މީލަން އާއި އިތުރު އެތައްބަޔަކު ހައްޔަރުކޮށް ޝަރީއަތް ހިންގުނީ ކޮމިއުނިސްޓްޕާޓީގެ ސެކްރެޓަރީ ޖެނެރަލް އޭރު ހިންގި ޚާއްސަ އެންޓި ކޮރަޕްޝަން ކެމްޕެއިނެއްގެ ދަށުންނެވެ. އެފަހަރު ވަނީ 85 މީހެއްގެ މައްޗަށް ކޮރަޕްޝަންގެ ކުށް ސާބިތުވެ ހުކުމް އިއްވާފައެވެ. އޭގެތެރޭގައި ޓްރުއޮންގ މީލަންގެ ފިރިމީހާ އާއި އާއިލާގެ ބައެއް މީހުން ހިމެނެއެވެ.