އެމެރިކާގެ ރައީސް ޖޯބައިޑަން އަށް ލިބިވަޑައިގަންނަވާ ޚާއްސަ ބާރުގެ ދަށުން އަމިއްލަ ދަރިކަލުން ހަންޓަރ ބައިޑަން އަށް މައާފް ދެއްވައިފި އެވެ. ހަންޓަރ ބައިޑަންގެ މައްޗަށް ވަނީ ލައިސަންސް ނެތި ބަޑި ގެންގުޅުއްވުމާއި ޓެކްސް ނުދެއްކެވުން އަދި ޑްރަގަސްގެ މައްސަލަ ތަކެއްގައި ކުށް ސާބިތުވެފައެވެ.އަދި ހުކުމް އިއްވުން އޮތީ މި މަހަށް ތާވަލް ކޮށްފައެވެ.
ރައީސް ބައިޑަން ކުރިން ވިދާޅުވެފައި ވަނީ ހަންޓަރ އަށް މައާފް ނުދެއްވާނެ ކަމުގައެވެ. ނަމަވެސް އާދީއްތަ ދުވަހުގެރޭ ބައިޑަން ވިދާޅުވެފައި ވަނީ ޝަރުއީ ނިޒާމަށް އިތުބާރު ކުރެއްވި ނަމަވެސް މިހާރު ގަބޫލުކުރައްވާގޮތުގައި ސިޔާސީ ނުފޫޒުގެ ސަބަބުން އިންސާފު ލިބުމުގެ މަގަށް ހުރަސްއެޅެމުންދެއެވެ.
ރައީސްކަމަށް ހޮވިވަޑައިގެންފައިވާ ޑޮނަލްޑް ޓްރަމްޕް ވަނީ ބައިޑަންގެ ނިންމެވުމަށް ފާޑުވިދާޅުވެފައެވެ.އަދި މިއީ މަގާމުގެ ނުފޫޒު ނަހަމަ ގޮތުގައި ބޭނުން ކުރެއްވުން ކަމަށް ސިފަ ކުރައްވާފައެވެ.
ޖޯބައިޑަންގެ ރިޔާސީ ދައުރުގައި މިގޮތަށް މައާފް ދެއްވާފައި ވަނީ 26 ފަރާތަށް ކަމަށްވާއިރު، ޓްރަމްޕް ގެ ދައުރުގައި 143 ފަރާތަކަށް މައާފް ދެއްވާފައި ވެއެވެ.
