އިޒްރޭލްގެ ބޮޑުވަޒީރު ނަތަންޔާހޫ ހައްޔަރު ކުރުމަށް އިންޓަނޭޝަނަލް ކްރިމިނަލްކޯޓުން ނެރެފައިވާ އެރެސްޓް ވޮރަންޓަށް އަމަލު ނުކުރާނެ ކަމަށް ފްރާންސުން ބުދަ ދުވަހު ބުނެފި އެވެ.

އެހެންނަމަވެސް ފްރާންސުން ކުރިން ބުނެފައިވަނީ އެގައުމަށް ނަތަންޔާހޫ ވަޑައިގެންފިނަމަ ހައްޔަރު ކުރާނެ ކަމުގައެވެ.އެހެން ކަމުން މިހާރު ޕޮލިސީ އަށް މިގެނައި ބަދަލަށް ހިއުމަން ރައިޓްސް ގްރޫޕް ތަކުން ދަނީ ވަރަށް ބޮޑަށް ފާޑު ކިޔަމުންނެވެ.
ހަނގުރާމައިގެ ޖަރީމާތައްބަލާ ދުނިޔޭގެ އެންމެ މަތީ ކޯޓުން މިދިޔަހަފްތާގައިވަނީ ނަތަންޔާހޫގެ އިތުރުން އިޒްރޭލުގެ ކުރީގެ ޑިފެންސް މިނިސްޓަރ ޔޮއާވް ގަލަންޓް އަދި ހަމާސްގެ ކޮމާންޑަރ މުހައްމަދު ދައީފް ހައްޔަރު ކުރުމުގެ އަމުރު ނެރެފައެވެ.އެއީ 13 މަސްވީ އިޒްރޭލް-ޣައްޒާ ހަނގުރާމައިގައި އިންސާނިއްޔަތާ ޚިލާފް ޖަރީމާތައް ހިންގާފައިވާ ކަމަށް ބުނެއެވެ.އޭރު ފްރާސުންވެސް ބުނަމުން އައީ އައިސީސީ ގެ އަމުރަށް އިހްތިރާމް ކުރާނެ ކަމުގައެވެ. ނަމަވެސް އެގައުމަށް ނަތަންޔާހޫ ނުވަތަ ގަލާންޓް ވަޑައިގެންފިނަމަ ހައްޔަރު ކުރާނެތޯ ކުރެވުނު ސުވާލަށް ސީދާ ޖަވާބު ދީފައެއް ނުވެއެވެ.
ފްރާންސްގެ ބޮޑުވަޒީރު މައިކަލް ބާނިއަރ މިހަފްތާގައިވެސް ޕާލަމެންޓްގައި ވިދާޅުވެފައިވަނީ ބައިނަލް އަގްވާމީ ގާނޫނު ތަކަށް އިހްތިރާމް ކުރުމުގެ ގޮތުން އައިސީސީގެ ވޮރަންޓަށް ފުރިހަމަޔަށް އިހްތިރާމް ކުރާނެ ކަމުގައެވެ.ހަމަ މިބަސް، ފޮރިން މިނިސްޓަރ ބުދަދުވަހު ހެދުނު ޓީވީ އަކަށް ދެއްވި އިންޓަރވިއު އެއްގައި ތަކުރާރު ކުރައްވާފައި ވެއެވެ.
ނަމަވެސް ހަމަ ބުދަދުވަހު ފްރާންސްގެ ފޮރިންމިނިސްޓްރީން ނެރުނު ބަޔާނެއްގައި ބުނެފައިވަނީ އިޒްރޭލަކީ އައިސިސީ ގެ މެމްބަރަކަށް ނުވާތީ އެކޯޓުން ނެރެފައިވާ ވޮރަންޓް ގައި ބުނެފައިވާ ފަރާތްތަކަށް ފްރާންސުން ފުރިހަމަ އިމިއުނިޓީ ނުވަތަ ހިމާޔަތް ލިބިދެވޭނެ ކަމުގައެވެ.
އެހެންނަމަވެސް އައިސީސީން އެބޭފުޅުން ހައްޔަރުކޮށް އެކޯޓާ ހަވާލުކުރުމަށް ސީދާ އެދެފިނަމަ މިނިންމުން ބަދަލުކުރުމާއިމެދު ވިސްނާނެކަމަށް ފްރާންސުގެ ބަޔާނުގައި ބުނެފައި ވެއެވެ. މީގެ އިތުރުން މުޅި މެދުއިރުމައްޗަށް ސުލަހަޔާއި ރައްކާތެރިކަން ހޯދުމަށް ނަތަންޔާހޫއާއި އިޒްރޭލުގެ އެހެން އިދާރާތަކާއެކު ފްރާންސުން ގާތުން މަސައްކަތް ކުރާނެކަމަށާ،ފްރާންސާއި އިޒްރޭލާ ދެމެދު ޒަމާންވީ ގާތް ރަހުމަތްތެރި ކަމެއް އޮންނަކަން ވެސް ބަޔާނުގައި ފާހަގަކޮށްފައި ވެއެވެ.
މިބަޔާން ނެރެފައިވާއިރު މީގެ އެއްދުވަސް ކުރިން ވަނީ އިޒްރޭލާ ހިޒްބުﷲ ޖަމާއަތާދެމެދު ބަދަލު ކުރަމުން އައި ހަމަލާތައް މެދުކަނޑާލައިފި ކަމަށް އިއުލާން ކޮށްފައެވެ.މިކަމުގައި މެދުވެރިންގެ ރޯލް އަދާކޮށްފައިވަނީ އެމެރިކާ އަދި ފްރާންސެވެ.
އައިސީސީގެ ވޮރަންޓްގެ މައްސަލައިގައި ފްރާންސް ގެ ޕޮލިސީ ބަދަލު ކުރުމުން އިންސާނީ ހައްގުތަކާ ބެހޭ ޖަމިއްޔާތަކުން ދަނީ ވަރަށް ބޮޑަށް ފާޑުކިޔަމުންނެވެ.
އައިސީސީގެ ވޮރަންޓަށް ޔޫރަޕްގެ ލީޑަރުންވެސް ދެއްފާފައިވަނީ ”މިކްސްޑް“ ނުވަތަ މަސްހުނި ރިއެކްޝަން ތަކެކެވެ. ނަމަވެސް އީޔޫގެ ފޮރިން ޕޮލިސީ ޗީފް ވިދާޅުވެފައިވަނީ ކޯޓުގެ ވޮރަންޓަކީ ވަކި ގައުމުތަކަކަށް ނެރުނު އަމުރެއް ނޫން ކަމަށާ އީޔޫގެ ހުރިހާ ގައުމު ތަކަކުންވެސް އަމުރަށް ކިޔަމަންވާންވާނެ ކަމުގައެވެ.
ޖީ ސެވަންގަ ހިމެނޭ އެންމެ ތަރައްގީވެފައިވާ 7 ގައުމުން އެކައްޗެއް ކިއުމަށް މަޝްވަރާކުރަމުންދާކަމަށް އެގްރޫޕުން ހޯމަދުވަހު ބުނެފައި ވެއެވެ.
އަނެއްކޮޅުން ޖީ ސެވަންގައި ހިމެނޭ އެމެރިކާއިން ވަނީ އައިސީސީގެ ވޮރަންޓަށް ވަރަށް ބޮޑަށް ފާޑުކިޔާފައެވެ.
ހަމާސްއިންވަނީ އައިސީސީ ގެ ވޮރަންޓަށް މަރުހަބާ ކިޔާފައެވެ. އަދި އެއަމުރަކީ އިންސާފު ލިބުމާދިމާއަށް އެޅި ފިޔަވަޅެއް ކަމަށް ބުނެފައި ވެއެވެ.