އިންޑިޔާގެ މުސްލިމް ކޮމިއުނިޓީއަށް ޒަމާނުއްސުރެ ނިސްބަތް ވަމުން އައި އާސާރީ ބިނާތަކުގެ މިލްކިއްޔާތާބެހޭ ގާނޫނެއް އިސްލާހު ކުރަން ސަރުކާރުން މަސައްކަތް ފެށުމުން އިންޑިޔާގެ މުސްލިމުން މުޒާހަރާ ކުރަން ފަށައިފިއެވެ.

މިގޮތުން ގުނާލެވޭ ބިނާތަކުގެ ތެރޭގައި އާސާރީ މުހިންމު މިސްކިތްތަކާ، މަދަރުސާތަކާ ޝެލްޓަރ ހޯމްސްގެ އިތުރުން އެތައްހާސް އޭކަރުގެ ބިން ހިމެނެއެވެ. މި ތަންތަނުގެ އަގު އެތައް މިލިއަން ރުޕީސް އަށް އަރައެވެ. މިތަންތަނަކީ ވަގުފް ތަންތަނުގެ ގޮތުގައި ބަލާ، ބަލަހައްޓަމުން އައީ މުސްލިމުންގެ ޚާއްސަ ބޯޑް ތަކުންނެވެ.

މެމްބަރުންގެ ޖޮއިންޓް ކޮމިޓީ އަކުން އެކުލަވާލުމަށްފަހު އަލަށް ހުށަހަޅަން އުޅޭ ބިލުގައި 40 އިސްލާހެއްވަނީ ހިމަނާފައެވެ. ކުރިން އޮތީ މިހާރު ހިނގަމުންދާ ސެޝަންއަށް މި ބިލް ހުށަހަޅާ ގޮތަށެވެ. ނަމަވެސް ދެކޮޅުހެދުންތަކާ ގުޅިގެން ބިލު އަލުން އެކުލަވާލުމަށް ކޮމިޓީ އަށް މިހާރުވަނީ އިތުރު ވަގުތު ދީފައެވެ.
ބޮޑުވަޒީރު ނަރެންދުރަ މޯދީގެ ސަރުކާރުން ބުނަނީ ހުށަހަޅަން އުޅޭ އިސްލާހު ތަކަކީ އެތަންތަން ބެލެބެއްޓުމުގައި ކޮރަޕްޝަން ހިންގުން ހުއްޓުވުމަށްޓަކައި ކޮންމެހެން ގެންނަން ޖެހޭ އިސްލާހު ތަކެއް ކަމުގައެވެ. އަދި މުސްލިމް ކޮމިއުނިޓީން އެތަންތަނަށް ގެންނަން ބޭނުންވާ ބަދަލުތައް ގެނައުމަށްޓަކާވެސް އެގާނޫނު އިސްލާހު ކުރަން ޖެހޭ ކަމަށް ސަރުކާރުން ބުނެއެވެ.

މިލްކިއްޔާތުގެ މައްސަލަ އުފެދިފައިވާ ތަންތަނަކީ އެތައްސަތޭކަ އަހަރު ކުރިން ފެށިގެން އެކިފަރާތްތަކުން މުސްލިމުން ބޭނުން ކުރުމަށް ހަދިޔާ ކުރަމުން އައިސްފައިވާ މުހިންމު ތަންތަނެވެ.

ބައެއް ތަންތަނުގެ މިލްކިއްޔާތާބެހޭ އެއްވެސް ލިޔެކިއުމެއްވެސް ނެތްއިރު ބައެއްތަންތަން ދީފައިހުރީ ހަމައެކަނި އަނގަ ބަހުން ކަމަށް ވެއެވެ.

އިންޑިޔާގެ މުސްލިމުންގެ އާންމު ގިނަ ރައްޔިތުން ގަބޫލުކުރާ ގޮތުގައި ހިންދޫ ފިކުރުގެ ސަރުކާރުން އުޅެނީ ވީގޮތަކުން އެތަބްތަން ނައްތާލުމަށެވެ. އަދި ނޫންނަމަ ވަގްފް މުދާ ބެލެހެއްޓުން މުސްލިމް ކޮމިޓީތަކަށް އޮތްއޮތުން ބަދަލުކޮށް ސަރުކާރުގެ ދަށަށް ކޮންޓްރޯލް ގެންދިއުމަށެވެ.

މިހާރު ގާނޫނު އޮންނަ ގޮތުން ކޮންމެ ސްޓޭޓް ސަރުކާރަކުންވެސް ޚާއްސަ ސާވޭ ކޮމިޝަނަރެއް ކަނޑައަޅާ،އޭނާގެ ބެލުމުގެ ދަށުން އެސްޓޭޓެއްގައި ހުރި އެފަދަ ތަންތަން ލިސްޓް ކުރެއެވެ. އަދި ސަރުކާރުން މިލިސްޓް އިއުލާން ކުރުމަށްފަހު އަމިއްލަ މީހެއްގެ ތަނެއް ކަމަށް ބުނެ އެއްވެސް ފަރާތަކުން ނުދާނަމަ އެއީ ވަގްފް އިމާރާތެއް ނުވަތަ ބިމެއްގެ ގޮތުގައި ކަނޑައަޅައެވެ.