ހޮވިވަޑައިގެންފިނަމަ މުސާރަ، ނުވަތަ މުސާރައިގެ ބައިކުޅަ ބައެއް ނުނަންގަވާނެ ކަމަށް ރައީސްކަމަށް ނުވަތަ ބޮޑުވަޒީރު ކަމަށް ވާދަކުރައްވާ ކެންޑިޑޭޓުން ވިދާޅުވުން މީ އާންމު ރައްޔިތުން ’މޮޔަހައްދަން“ ހަދާލާ އުކުޅެއްތޯ މީ ބައެއް މީހުން ކުރާ ސުވާލެކެވެ. އެހެނީ އެފަދަ ބޭފުޅުން ހޮވިވަޑައިގަތުމުން މުސާރައިގައި ނުޖެހުނަސް އަމިއްލަ މުއްސަނދިކަން އިތުރުވަމުން އިތުރުވަމުންދާތީއެވެ. ދަތުރުތަކާއި އެހެނިހެން ޚަރަދުތައް އިންތިހާއަށް ހުރުމާއެކުވެސް އެވެ.

މެލޭޝިޔާގެ މިހާރުގެ ބޮޑުވަޒީރު އަންވަރު އިބްރާހިމަކީ ވެސް ހޮވިވަޑައިގެންފިނަމަ މުސާރަ ނުނަންގަވާނެ ކަމަށް ވިދާޅުވި ބޭފުޅެކެވެ. 2022 ވަނަ އަހަރުގެ ނޮވެމްބަރު މަހު މަގާމާ ހަވާލުވެވަޑައިގެންނެވި އަންވަރު އެވައުދުގައި ހިފެހެއްޓެވިއެވެ. ހަމަސްދުވަސް ވަންދެނެވެ.

ކޮންމެއަކަސް އަންވަރު އިބްރާހިމް މިހާރުވަނީ ދުނިޔޭގެ އެންމެ މުއްސަނދި 18 ލީޑަރުންގެ ލިސްޓްގައި ހިމެނި ވަޑައިގެންފައެވެ. ލިސްޓުގެ 17 ވަނައިގައި ހިމެނިވަޑައިގަންނަވާ އަންވަރުގެ މުދަލުގެ އަގު 2.4 މިލިއަން ޑޮލަރަށް އަރައެވެ.

އަންވަރު ވަނީ ނޮވެމްބަރ 2022 ގައި ހުރިހާ އެސެޓް ޑިކްލެއާ ކުރައްވާފައެވެ. ބޭނުމަކަށްވީ އިދިކޮޅު ކެންޑިޑޭޓުންލައްވާ ވެސް އެސެޓް ހާމަކުރުވުމެވެ.

އަންވަރުގެ ކުރިން މަގާމުގައި ހުންނެވި ވެރިއަކު ކޮރަޕްޝަނުން ހޯއްދެވި ކަމަށް ބެލެވޭ މާސިޑީޒް ބެންޒެއް ބޭނުންކުރައްވަން ވެސް އަންވަރު ދެކޮޅު ހެއްދެވި ކަމަށް ވެއެވެ. ކޮރަޕްޝަންގަ ޖެހިވަޑައިނުގަންނަވަން ވެގެންނެވެ. 2022 ގައި އަންވަރުގެ މުދަލުގެ ގޮތުގައި ހުރީ އެންމެ ގެޔަކާއި ކުޑަ ތިން ބިންކޮޅެވެ.

ދުނިޔޭގެ އެންމެ މުއްސަނދި ލީޑަރުންގެ ލިސްޓްގައި އަންވަރުގެ އިތުރުންވެސް ބައެއް އާސިޔާން ގައުމުތަކުގެ ލީޑަރުން ހިމެނިވަޑައިގަންނަވައެވެ. މީގެތެރޭގައި ފިލިޕީންސްގެ ރައީސް ބޮންގބޮންގ މާކޯސް އަދި ސިންގަޕޫރުގެ ޕްރައިމިނިސްޓަރ ލޯރެންސ ވޮނގް ހިމެނިވަޑައިގަންނަވައެވެ.

މީގެއިތުރުން ހަނގުރާމައިގެ ސަބަބުން ވީރާނާވެފައިވާ ސީރިޔާ އަދި ޔޫކްރެއިންގެ ވެރިންނާއި އެފްރިކާގެ ފަގީރު ކަމަށް ބެލެވޭ ބައެއް ގައުމުގެ ވެރިންވެސް މި ލިސްޓްގައި ހިމެނެއެވެ.

ދުނިޔޭގެ އެންމެ މުއްސަނދި 18 ލީޑަރުންގެ ލިސްޓުގައި ހިމެނިވަޑައިގަންނަވާ ބޭފުޅުންނަކީ :

1- ރަޝިޔާގެ ރައީސް ވްލަޑިމިއަރ ޕޫޓިން – 200 ބިލިއަން ޑޮލަރު

2- އުތުރު ކޮރެޔާގެ ސްޕްރީމް ލީޑަރ – 5 ބިލިއަން ޑޮލަރު

3- ޗައިނާގެ ރައީސް ޝީ ޖިން ޕިންގ – 1.5 ބިލިއަން ޑޮލަރު

4 – ސީރިޔާގެ ރައީސް ބައްޝާރުލް އަސަދު – 1.5 ބިލިއަން ޑޮލަރު

5- އީކުއެޓޯރިއަލް ގިނީ ގެރައީސް – ތިއޮޑޯރޯ އޮބިއަންގ – 600 މިލިއަން ޑޮލަރު

6- އަޒަރުބައިޖާންގެ ރައިސް – އިލްހާމް އަލިޔޭވް – 500 މިލިއަން ޑޮލަރު

7- ތުރުކީގެ ރައީސް – ރަޖަބް ތައްޔިބް އެރްދޮޤާން – 500 މިލިއަން ޑޮލަރު

8 – ރުވަންޑާގެ ރައީސް ޕޯލް ކަގާމޭ – 500 މިލިއަން ޑޮލަރު

9 – ދެކުނު އެފްރިކާގެ ރައީސް ސިރިލް ރާމަފޯސާ – 450 މިލިއަން ޑޮލަރު

10 – ކެންޔޭގެ ރައީސް ވިލިއަމް ރޫޓޯ – 400 މިލިއަން ޑޮލަރު

11 – ފރާންސްގެ ރައީސް އިމެނުއަލް މެކްރޯން – 31.5 މިލިއަން ޑޮލަރު

12 – ޔޫކްރެއިންގެ ރައީސް ވްލޮޑޮޑިމިއަރ ޒެލެންސްކީ – 20 މިލިއަން ޑޮލަރު

13 – އެމެރިކާގެ ރައީސް ޖޯ ބައިދަން – 10 މިލިއަން ޑޮލަރު

14 – ކެނެޑާގެ ޕްރައިމިނިސްޓަރ ޖަސްޓީން ޓްރޫޑޯ – 5 މިލިއަން ޑޮލަރު

15 – ސިންގަޕޫރުގެ ބޮޑުވަޒީރު ލޯރެންސް ވޮންގ – 5 މިލިއަން ޑޮލަރު

16 – ފިލިޕީންސްގެ ރައއީސް ބޮންގބޮންގ މާކޯސް – 3.6 މިލިއަން ޑޮލަރު

17 – މެލޭޝިޔާގެ ޕްރައިމިނިސްތަރ އަންވަރު އިބްރާހީމް – 2.4 މިލިއަން ޑޮލަރު

18 – ވެނެޒުއެލާގެ ރައީސް ނިކޮލަސް މަޑޫރޯ – 2 މިލިއަން ޑޮލަރު

މައުލޫމާތު : ވަރލްޑް އޮފް ބަޒް