މޫސުމީ ގެއްލުންތަކުން ސަލާމަތް ވުމަށް ފަގީރު ގައުމު ތަކަށް އަހަރަކު 300 ބިލިއަން ޑޮލަރު ދޭގޮތަށް ތިމާވެއްތާއި ބެހޭ ދުނިޔޭގެ ކޮންފަރެންސް ކޮޕް29ން ނިންމައިފިއެވެ.ނަމަވެސް މިތާރީޚީ ނިންމުމަށް އަމަލުކުރަންފަށަން 10 އަހަރު ދުވަހުގެ މުއްދަތެއް ދީފައިވެއެވެ.މިގޮތުން ފައިސާ،2035ވަނަ އަހަރުގެ ކުރިން ދޭންފަށަން ވަނީ ގައުމު ތަކުން އެއްބަސްވެފައެވެ.
ތިމާވެއްޓާބެހޭ މިތާރީޚީ އެއްބަސްވުމާހަމަޔަށް އާދެވިފައިވަނީ އަޒަރުބައިޖާން ގެ ވެރިރަށް ބާކޫ ގައި ކުރިޔަށް ދިޔަ ކޮންފަރެންސްގައެވެ .ބައްދަލްވުން އާދީއްތަދުވަހު ނިންމާލާފައިވަނީ ހަމަޖެހިފައިވާ ގަޑިއަށް ވުރެ މާބޮޑަށް ފަސްވެގެންގޮސް އެތާގަޑިން ދަންވަރު ދެގައިބައިޔަށްވުރެ ބޮޑުވީ ފަހުންނެވެ.
200އެއްހާ ގައުމުގެ ވެރިންނާއި ތިމާވެއްޓާބެހޭ އެންމެ އިސްފަރާތްތަކާ މާހިރުން ބާކޫ ގައި ހަފްތާޔަކަށްވުރެ ގިނަ ދުވަހު މިކޮންފަރެންސް ކުރިޔަށް ގެންގޮސްފައި ވެއެވެ. ކުރިންވެސް ކޮޕް ކޮންފަރެންސުން ވަނީ ހަމަ މިކަމަށް 100 ބިލިއަން ޑޮލަރު ފޯރު ކޮށް ދިނުމަށް އެއްބަސް ވުމެއް އެކުލަވާލާ ފާސްކޮށްފައެވެ.މިއެއްބަސްވުމުގެ މުއްދަތު ހަމަވާނީ އަންނަ އަހަރުގެ ނިޔަލަށެވެ.
އަހަރަކު 100 ބިލިއަން ޑޮލަރު ފޯރުކޮށްދިނުމަށް ކުރިންވީ އެއްބަސްވުމަށް ވެސް އަމަލު ކުރަން ފަށާ ގޮތަށް އޮތީ 2020ވަނަ އަހަރުން ފެށިގެންނެވެ.ނަމަވެސް ދެއަހަރު ލަސްވެ އަމަލު ކުރަން ފެށުނީ 2022ގައެވެ.
ކޮޕް29 ގެ އެއްބަސްވުމުގެ ދަށުން މިއަންނަ އަހަރުގެ ކްލައިމްޓް ސަމިޓް ބްރެޒިލްގެ އެމޭޒަން ރެއިން ފޮރެސްޓް ގައި ބޭއްވުމަށް ހިގާނެ ޚަރަދުގެ ކަންކަން ހަމަޖެއްސުމަށް މަގުޗާޓެއްވެސް ވަނީ އެކުލަވާލާފައެވެ.އެމެޒަން ރެއިން ފޮރެސްޓަކީ ތިމާވެށީގެ ގޮތުން ވަރަށްވެސް ނާޒުކް،ނެތި ދިއުން ހުއްވަން ޖެހިފައިވާ ޖަންގައްޔަށް ވާއިރު،އެތަނުގައި ބާއްވާ ކްލައިމެޓް ކޮންފަރެންސްގައި،ތިމާވެށީގެ މައްސަލަތައް ހައްލުކުރުމަށް ކުރިޔަށް އޮތް ދިހަ އަހަރު ގައުމުތަކުން އަޅާނެ އަމަލީ ފިޔަވަޅު ތައް ދުނިޔޭގެ ލީޑަރުން ޗާޓް ކުރާނެއެވެ.
ކޮޕް29ގެ އެއްބަސްވުމުގެ ދަށުން ފަގީރު ގައުމުތަކަށް ފޯރުކޮށްދޭނެ 300 ބިލިއަން ޑޮލަރު ހޯދާގޮތަށް އޮތީ އެކިގޮތްގޮތުންނެވެ.މީގެ ތެރޭގައި މުއްސަނި ގައުމުތަކުގެ ޑޮނޭޝަން ތައް، ގައުމުތަކުގެ ބަޖެޓްގައި ކަނޑައަޅައިގެން ވަކިވަރެއް،އަދި ޕްރައިވެޓް ސެކްޓަރ އިންވެސްޓްމަންޓްތަކުން ލިބޭ ނަފާގެ ބައެއް ހިމެނެއެވެ.މީގެ އިތުރުން ފަންޑަށް ފައިސާ ހޯދޭނެ އެހެނިހެން ގޮތްގޮތުގެ ތެރޭގައި އެވިއޭޝަން އަދި މެރިޓައިމް އިންޑަސްޓްރީން ދުނިޔޭގެ ފެންވަރުގަ ޓެކްސްތަކެއް ތައާރަފް ކުރުމަށްވެސްވަނީ ކޮންފަރެންސްގައި ބަހުސު ކުރެވިފައެވެ.
ބަހުސުކުރެވުނު ގޮތުގައި ތަރައްގީވެފައިވާ ގައުމުތަކުން ދޭއެހީގެ ސަބަބުން ފަގީރު ގައުމުތަކުގެ ޕްރައިވެޓް އިންވެސްޓްމަންޓް ފުޅާވެ އަހަރަކު 1.3ޓްރިލިއަން ޑޮލަރުގެ ފައިދާ އާއި ހަމަޔަށް ގެންދެވޭނެއެވެ.ޑޮނޭޝަން ފޯރުކޮށްދިނުމުގައި މުއްސަނދި ނުތަ އެންމެ ކުރިއަރާފައިވާ ގައުމުތައް އިސްދައުރެއް އަދާކުރާގޮތަށް އޮތްނަމަވެސް މުއްސަނދި އެހެން ގައުމުތަކަށްވެސް ފައިސާ ޑޮނޭޓް ކުރުމުގެ ފުރުސަތުވަނީ ހުޅުވާލާފައެވެ.
އިންޑިޔާ އާއި ޗައިނާ ވެސް ވަނީ ތަރައްގީވަމުން އަންނަ ގައުމުތަކުގެ ލިސްޓުގައެވެ. ކަނޑައެޅުނު މިންވަރު މާމަދު ކަމަށް އިންޑޔާއިން ބުނެފައިވާއިރު،ޗައިނާއިން ވަނީ ތިމާވެށީގެ އެހީ ބޭނުން ނޫންކަމަށް ބުނެފައެވެ.
