ނޮވެމްބަރު 5 ވަނަ ދުވަހު އެމެރިކާގައި ބޭއްވި ރިޔާސީ އިންތިޚާބު، ކުރީގެ ރައީސް ޑޮނަލްޑް ޓްރަމްޕަ ކާމިޔާބު ކުރައްވައިފިއެވެ.
އިންތިޚާބު ކުރެއްވުމަށް ބޭނުންވަނީ 270 އިލެކްޓޮރަލް ވޯޓެވެ. ބުދަ ދުވަހު ރާއްޖެއަށް އިރުއޮއްސުމާ ހަމަޔަށް ޓްރަމްޕް ވަނީ 279 އިލެކްޓޮރަލް ވޯޓު ޔަގީން ކުރައްވާފައެވެ.
ރިޔާސީ އިންތިޚާބުގައި ޑޮނަލްޑް ޓްރަމްޕާ ވާދަކުރެއްވީ ޑިމޮކްރެޓިކް ޕާޓީގެ ކެންޑިޑޭޓް ކަމަލާ ހެރިސްއެވެ. ކަމަލާ ހެރިސްއަށް މިހާތަނަށް ލިބިވަޑަގެންނެވީ 223 އިލެކްޓޮރަލް ވޯޓެވެ.
ޓްރަމްޕްގެ ކާމިޔާބީ އާއި ގުޅިގެން ސަޕޯޓަރުން ގެންދަނީ މަގުތަކުމަތީގައި އުފާފާޅު ކުރަމުންނެވެ. މި ތާރީޚީ ކާމިޔާބީއާ ގުޅިގެން ދުނިޔޭގެ ލީޑަރުން ވެސް ގެންދަވަނީ ޓްރަމްޕަށް ތަހުނިޔާ ދަންނަވަމުންނެވެ.
ރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ވަނީ މަރުހަބާ ވިދާޅުވެ ސޯޝަލް މީޑިޔާގައި ޕޯސްޓެއް ކުރައްވާފައެވެ.
އިންތިޚާބުގެ ނަތީޖާ އަދިވެސް ހަތަރު ސްޓޭޓަކުން އިއުލާނު ނުކުރެއެވެ.
ރިޕަބްލިކަން ޕާޓީން ވަނީ ސެނެޓްގެ ކޮންޓްރޯލްވެސް ހޯދާފައެވެ.
އިންތިޚާބުގެ ނަތީޖާއަށްފަހު ކަމަލާ ހެރިސް އަދި ބަލި ގަބޫލު ކުރައްވާފައި ނުވާކަމަށްވެއެވެ. އަދި ސަޕޯޓަރުންނާ މުޚާތަބު ކުރައްވާފައެއްވެސް ނުވެއެވެ. ނަމަވެސް މިރޭގެ ވަގުތެއްގައި ހާވާޑް ޔުނިވާސިޓީ ގައި ސަޕޯޓަރުންނާ ބައްދަލުކުރެއްވުމަށް ވަނީ ހަމަޖެހިފައެވެ.
ޑޮނަލްޑް ޓްރަމްޕް ހިމެނިވަޑައިގެންފައިވަނީ ދެވަނަ ފަހަރަށް ރައީސްކަމަށް ވަޑައިގެންނެވި ފުރަތަމަ ރައީސް އަށެވެ. 2017 އިން 2021 އަށް ވެސް ރައީސްކަން ކުރައްވާފައިވާ ޓްރަމްޕަށް ލިބިވަޑައިގަތް ބޮޑު ކާމިޔާބީއެކެވެ. މިއީ ފާއިތުވި 130 އަހަރުގެ ތެރޭގައި، ކުރީގެ ރައީސަކު ރިޔާސީ އިންތިޚާބެއް ކާމިޔާބު ކުރައްވައި ވެރިކަމާ ހަވާލުވެވަޑައިގަންނަވާ ފުރަތަމަ ފަހަރެވެ.
އިންތިޚާބުގައި ލިބުނު ކާމިޔާބީ ފާހަގަ ކުރެއްވުމަށް ޓްރަމްޕް ދިރިއުޅުއްވާ ވެސްޓް ޕާމް ބީޗުގައި ބޭއްވި އެއްވުމެއްގައި ޓްރަމްޕްގެ ޢާއިލާގެ މެންބަރުންނާއި ރަނިންގ މޭޓު ޖޭޑީ ވޭންސް ބައިވެރިވެ ވަޑައިގެންނެވިއެވެ. މި އެއްވުމުގައި ވާހަކަފުޅު ދައްކަވަމުން ޓްރަމްޕް ވިދާޅުވީ މިއީ އެމެރިކާގެ ރައްޔިތުންނަށް ލިބުނު ވަރަށް ބޮޑު ކާމިޔާބީއެއް ކަމަށާ އެމެރިކާއަކީ ކުރިއަށްވުރެ ފުރިހަމަ ޤައުމަކަށް ހެދުމުގެ ފުރުޞަތު މިވަނީ ލިބިފައި ކަމަށެވެ.
މި ތާރީޚީ ކާމިޔާބީއަށްފަހު ޓްރަމްޕް ރައީސްކަމުގެ ހުވާކުރެއްވުން އޮންނާނީ އަންނަ އަހަރުގެ ޖެނުއަރީ މަހުގެ 20 ވަނަ ދުވަހުއެވެ. އޭގެ ކުރިން ޖެނުއަރީ 6 ވަނަ ދުވަހު އައު ކޮންގްރެސް ބައްދަލް ކޮށް އައު ރައީސްގެ މަގާމު ރަސްމީކޮށް ޔަގީން ކުރުން އޮންނާނެއެވެ.
One Response
ޓްރަމްޕް ޓަވަރު ވިއްކާލައި ދަރަނިން ސަލާމްތް ނުވެވިގެން އުޅެނިކޮށް 12 މައްސަލަ ޝަރިޢަތުގައި ވަނިކޮށް އެލިބުނީ އަނެއްފަހަރު ވެރިކަމެވެ. ކޮބާތޯ ތަފާތަކީ އެކިޔާ 3 ވަނަ ދުނިޔެއާ؟