ބޮން ގޮއްވާނެ ކަމަށް ބުނެ ފާއިތުވި 48 ގަޑިއިރުތެރޭ އިންޑިޔާގެ ދިހަ ފްލައިޓަކަށް ބިރު ދައްކައިފި ކަމަށް ޚަބަރު ލިބެއެވެ. މިކަމުގެ ސަބަބުން ފްލައިޓްތައް ގިނަ އިރުތަކަކަށް ލަސްވެ އަދި ދަތުރު ބަދަލުކުރަންވެސް ޖެހިފައިވާ ކަމަށް ޚަބަރުތައް ބުނެއެވެ.

ބޮން ގޮއްވާނެ ކަމުގެ އިންޒާރު ލިބުމާއި ގުޅިގެން ސިންގަޕޫރުން ފުރި އިންޑިޔާ އެކްސްޕްރެސް ގެ ބޯޓެއް ”އެސްކޯޓް“ ކުރުމަށް ސިންގަޕޫރު އެއާފޯސްގެ ދެ ފައިޓަރޖެޓް ފޮނުވާފައިވެއެވެ.އޭގެ ދެތިން ގަޑިއިރުކުރިން ޑެލްހީއިން ޗިކާގޯއަށް ދިޔަ އެއާ އިންޑިޔާގެ ބޯޓެއް،ރައްކާތެރި ފިޔަވަޅެއްގެ ގޮތުން ކެނެޑާގެ އެއާޕޯޓެއްގައި ޖައްސާފައިވެސް ވެއެވެ.

ހަގީގަތެއްނެތް ބޮމުގެ އިންޒާރުތައް އިންޑިޔާގެ އެއާލައިންތަކަށް ލިބުމަކީ އައު ކަމެއްނޫނެވެ.އެހެން ނަމަވެސް ހޯމަ ދުވަހުން ފެށިގެން މިކަން ކުއްލިއަކަށް އިތުރުވެގެން މިއުޅެނީ ކީއްވެގެން ކަމެއް ސާފުނުވާކަމަށް ވެއެވެ.

އެއާ އިންޑިޔާގެ އިތުރުން އިންޑިގޯ،ސްޕައިސްޖެޓް،އަދި އަކާސާ އެއާ ގެ ޕްލައިޓް ތަކަކަށްވެސް ވަނީ ބޮމުގެ އިންޒާރު ލިބިފައެވެ.

ހޯމަ ދުވަހު މުމްބާއީ އިން ބޭރު ގައުމުތަކަށް ދަތުރުކުރި ތިން ފްލައިޓެއް ވަނީ،އެކްސްގަ ޕޯސްޓް ކުރި އިންޒާރުތަކެއްގެ ސަބަބުން މަންޒިލް ބަދަލު ކޮށްފައެވެ.ނުވަތަ ވަނީ ވަރަށް ބޮޑަށް ލަސްވެފައެވެ.މިޕޯސްޓް ތަކާ ގުޅިގެން ފުލުހުން ވަނީ ވިހިއަހަރު ނުފުރޭ ޒުވާނަކު ހައްޔަރު ކޮށްފއެވެ.

އަންގާރަ ދުވަހުވެސް އެއާ އިންޑިޔާގެ ދެބޯޓުހިމެނޭ ގޮތުން ހަތް ފްލައިޓެއްގައި ބޮންގޮއްވާނެ ކަމަށްބުނެ އެކްސް ހެންޑްލް އަކުން ޕޯސްޓް ތައް ކުރުމާއި ގުޅިގެން ހާސްކަންވަނީ އިތުރުވެގެން ގޮސްފައެވެ. އެ ހެންޑްލް މިހާރުވަނީ ސަސްޕެންޑް ކޮށްފައި ކަމަށްވެއެވެ. ބޮން ގޮއްވާނެ ކަމަށް ބުނެ ކޮށްފައިވާ ޕޯސްޓް ތަކުގައިވަނީ ފްލައިޓް ނަމްބަރުޖަހާ އެއާލައިން އަދި ލޯކަލް ޕޮލިސް ޓެގް ކޮށްފަ ކަމަށްވެއެވެ.

ބޮމުގެ އިންޒާރުތަކުގެ ފަހަތުގައިވާ ބަޔަކު ހޯދުމުގެ މަސައްކަތް ކަމާބެހޭ އިދާރާތަކުން ދަނީ ކުރަމުންނެވެ. އެއާ އިންޑިޔާއިން ބުނެފައިވަނީ މިމަސައްކަތަށް އެއްބާރުލުން ދެމުން ގެންދާ ކަމުގައެވެ. އަދި ދަތުރުތައް ޑިލޭވުމުން ލިބޭ މާލީ ގެއްލުމުގެ ބަދަލު ހޯދުމަށް އަޅާނެ ގާނޫނީ ފިޔަވަޅު ތަކާމެދުވެސް ވިސްނަމުން ދާކަމަށް ބުނެފައިވެއެވެ.

ބޯޓެއްގައި ބޮންގޮއްވާނެ ކަމަށް ބުނެ އެކްސްގައި ނުވަތަ އެފަދަ އެހެން ޕްލެޓްފޯމެއްގައި އިންޒާރެއް ދީފިނަމަ އެބޯޓަކުން ހުރިހާ ފަސިންޖަރުންގެ އިތުރުން ކެބިން ބެގެޖް،ޗެކްއިން ބެގެޖް އަދި ހުރިހާ ކާގޯވެސް ބޯޓުން ހުސްކުރަން ޖެހެއެވެ.އެއަށްފަހު ފަސިންޖަރުންނާއި ބެގެޖް އަލުން ސްކްރީން ކުރެއެވެ.އަދި އެންޖިނިއަރިންގ އާއި ސެކިއުރިޓީ ޓީމް ތަކުން ބޯޓު ރަގަޅަށް ބަލާ ފާސް ކުރެއެވެ.މިކަންކަން ކުރުމަށް ދަތުރު ލަސް ކުރަން ޖެހުމުން އެއާލައިން ތަކަށް އެތައްހާސް ޑޮލަރުގެ ގެއްލުން ލިބެއެވެ.