ދެވަނަ ބޮޑުހަނގުރާމައިގައި އެމެރިކާއިން ޖަޕާނަށް އެޅި އެޓޮމިކް ބޮމުގެ ހަމަލާއިން ސަލާމަތްވި މީހުންގެ ޖަމިއްޔާ އެއްކަމަށްވާ ”ނީހޮން ހިޑަންކިޔޯ“ ގެ ކޯ-ޗެއާ ޓޮޝިޔޫކީ މިމާކީ އަށް މިއަހަރުގެ ނޯބެލް ޕީސް ޕްރައިޒް ދީފިއެވެ.ހުކުރު ދުވަހު ނޯބެލް އިނާމުކޮމިޓީން އެކަން އިއުލާން ކުރުމުން ޓޮޝިޔޫކީ މިމާކީ ބުނެފައިވަނީ އެނާޔަށް އިނާމު ލިބޭނެކަމަށް އެއްގޮތަކަށްވެސް ގަބޫލު ނުކުރެވޭ ކަމުގައެވެ.
އިތުރަށް ވާހަކަ ދައްކަމުން ޓޮޝިޔޫކީ މިމާކީ ބުނީ އޭނާ ޔަގީން ކޮށްގެން ހުރީ މިއަހަރުގެ ނޯބެލް ސުލްހައިގެ އިނާމު ލިބޭނީ އިންސާނުންގެ ފުރާނަސަލާމަތް ކުރުމަށް ޣައްޒާ ގައި ބުރަކޮށް މަސައްކަތް ކުރަމުންދާ ފަރާތްތަކަށް ކަމުގައެވެ.
މިއަދުގެ ޣައްޒާގެ ހާލަތާ މީގެ 80 އަހަރު ކުރީގެ ޖަޕާނާ އަޅާކިޔަމުން ޓޮޝިޔޫކީ މިމާކީ ބުނީ މިއަދު ޣައްޒާގައި ގައިން ލޭއޮހޮރެމުންދާ ކުޑަކުދިންތައް މައިންބަފައިން އުނގަށް ލައިގެން ތިބެނީ މީގެ 80 އަހަރު ކުރިން ޖަޕާނުގައި އެގޮތަށް ލޭ އޮހޮރެމުން ދިޔަ ކުދިންތައް އުގަށް ލައިގެން މައިންބަފައިން ތިބި ގޮތަށް ކަމުގައެވެ.
މީގެ އިތުރުން ހީރޮޝީމާ އަށާ ނާގަސާކީ އަށް އެޅީ 36،000 ޓަނުގެ އެކްސްޕްލޯސިވް ކަމަށާ މިހާތަނަށް ޣައްޒާޔަށް 82،000 ޓަނުގެ އެކްސްޕްލޯސިވް ނުވަތަ ބޮން އަޅާފައިވާކަން އޭނާ ފާހަގަކޮށްފައިވެއެވެ.
ސުލްހަ ފެތުރުމަށް މަސައްކަތް ކުރާ ޖަޕާންގެ ޖަމިއްޔާ ”ނީހޮން ހިޑަންކިޔޯ“ ގެ މައިގަނޑު މެސެޖަކީ ނިއުކްލިއަރ ހަތިޔާރު އެއީ މުޅިން ނައްތާލަން ޖެހޭ އެއްޗެއް ކަމެވެ.ނިއުކްލިއަރ ބޮމުގެ ސަބަބުން ލިބުނު ގެއްލުމުގެ ހެކިތަކާ ”ޓެސްޓިމަނީ“ ތަކުން ބާރުލިބިގެންތިބެ ގްރޫޕުން ދައްކަމުން ގެންދަނީ ނިއުކްލިއަރ ބޮން ދެން އެއްގޮތަކަށްވެސް ބޭނުން ކޮށްގެން ނުވާނެ ކަމެވެ.
ނޯބެލް ސުލްހައިގެ އިނާމު ލިބުނު ޖަޕާންގެ ޓޮޝިޔޫކީ މިމާކީ،ޣައްޒާ އާއި ޖަޕާން އެއްގޮތް ކުރުމުން އިޒްރޭލުން ވަނީ އެކަން ކުށްވެރި ކޮށްފައެވެ. އިޒްރޭލުން ޖަޕާނަށް ކަނޑައަޅާފައި ހުންނަ އެމްބެސެޑަރ ބުނެފައިވަނީ އެގޮތަށް ޖަޕާނާ ޣައްޒާ އަޅާނުކިޔޭނެ ކަމަށާ ޓޮޝިޔޫކީ މިމާކީ ދެއްކި މިސާލަކީ ހަގީގަތެއް ނޫން ކަމުގައެވެ.މިގެ އިތުރުން އެގޮތަށް އަޅާކިއުމުން ތާރީޚްވެސް އޮޅިގެންދާ ކަމަށާ އަދި ބޮމުގެ ސަބަބުން އަނިޔާލިބުނު ފަރާތްތަކަށްވެސް ކުރެވޭ ބޭއިންސާފަކަށްވާ ކަމަށް އެމްބެސެޑަރު ބުނެފައި ވެއެވެ.
އެމެރިކާއިން ހީރޮޝީމާ އަށް އެޅި ނިއުކްލިއަރ ބޮމުގެ ސަބަބުން 140،000މީހުން މަރުވެފައިވާއިރު އޭގެ ތިންދުވަސް ފަހުން ނާގަސާކީ އަށް އެޅި ބޮމުގެ ސަބަބުން 74،000މީހުން މަރުވެފައި ވެއެވެ.
އިޒްރޭލުން ޣައްޒާއަށް ދެމުން ގެންދާ ރަހުމެއް ނެތް ހަމަލާތަކުގައި މިހާތަނަށް 42،289 މީހުން މަރުވެފައިވެއެވެ.98،684 މީހުން ޒަޚަމްވެފައިވާއިރު، މަދުވެގެން 10ހާސްމީހުން ވަނީ ގެއްލިފައެވެ.ބެލެވޭ ގޮތުގައި މިމީހުން ވަނީ ވެއްޓިފައިވާ އިމާރާތްތަކުގެ ދަށުވެފައެވެ.
ނޯބެލް ސުލްހައިގެ އިނާމު ލިބުނު ”ނީހޮން ހިޑަންކިޔޯ“ ގްރޫޕް އުފައްދާފައިވަނީ އެދެހަމަލާއިން ސަލާމަތްވި މީހުން ގުޅިގެންނެވެ.މައިގަނޑު ބޭނުމަކީ ދުނިޔޭން ނިއުކްލިއަރ ހަތިޔާރު ނައްތާލުމަށް މަސައްކަތް ކުރުމެވެ.
