އިންޑިޔާގެ މަޝްހޫރު ވިޔަފާރިވެރިޔާ، މަހުޖަނު ރަތަން ޓާޓާ މަރުވެއްޖެއެވެ. އިންޑިޔާގައި މިހާތަނަށް އުފެދުނު އެންމެ ބޮޑު އެއް ވިޔަފާރިވެރިޔާ ރަތަން ޓާޓާ ވަނީ ވިޔަފާރީގައި އިންޑިޔާ އަދި ބޭރު ދުނިޔޭގައިވެސް ފާހަގަކޮށްލެވޭ ކޮންގްލޮމަރޭޓް ޓާޓާ ގްރޫޕް ހިންގުމުގައި ގިނަ އަހަރު ތަކެއް ހޭދަކޮށްފައެވެ.

މަރުވިއިރު ރަތަން ޓާޓާގެ އުމުރަކީ 86 އަހަރެވެ.
އިންޑިޔާގައި މިހާތަނަށް އުފެދުނު އެންމެ ބޮޑު އެއް ވިޔަފާރި ކުންފުނި ޓާޓާގްރޫޕް ގެ އެނުއަލް ރެވެނިއު ސަތޭކަ ބިލިއަން ޑޮލަރަށްވުރެ އިތުރެވެ.
ރަތަން ޓާޓާގެ މަރުގެ ޚަބަރު އިއުލާން ކުރަމުން ”ޓާޓާ ސަންސް“ ގެ މިހާރުގެ ޗެއާމަން ބުނެފައިވަނީ ރަތަން ޓާޓާ އަކީ ހަގީގަތުގައިވެސް އާދަޔާ ޚިލާފް ލީޑަރެއް ކަމުގައެވެ. އަދި ރަތަންޓާޓާގެ ލެގަސީ އިން ހިއްވަރުލިބި ކުރިޔަށްދާއިރު އޭނާގެ އުސޫލުތަކުގައި ހިފެހެއްޓުމަށް މަސައްކަތް ކުރާނެ ކަމަށް ބުނެފައި ވެއެވެ.
ޓާޓާ ގްރޫޕް ހިންގުމުގައި ރަތަން ޓާޓާ ހުރިއިރު އެގްރޫޕުން ވަނީ ފާހަގަ ކޮށްލެވޭ
ހައި-ޕްރޮފައިލް ބޭރުގެ ވިޔަފާރި ކުންފުނިތައް ގަނެ، އަމިއްލަ ކުންފުނި ވަރަށް ބޮޑަށް ފުޅާ ކޮށްފައެވެ.
ރަތަން ޓާޓާ މަރުވުމާއި ގުޅިގެން ބޮޑުވަޒީރު ނަރެންދުރަމޯދީ ހިމެނޭހެން އިންޑިޔާ އަދި ބޭރުގެ އިސްފަރާތްތަކުން ދަނީ ތައުޒިޔާގެ މެސެޖް ތައް ފޮނުވަމުންނެވެ.މޯދީގެ މެސެޖްގައި ރަތަން ޓާޓާ އަކީ ދުރުވިސްނޭ ވިޔަފާރީގެ ލީޑަރެއް ކަމަށާ،އޯގާތެރި، އާދަޔާ ޚިލާފް އިންސާނެއްކަމަށް ސިފަ ކުރައްވާފައި ވެއެވެ. އަދި ރަތަން ޓާޓާ އާއި ބައްދަލްވި އެތައް ހާދިސާތަކެއްގެ ހަނދާން އާކުރައްވަމުން މޯދީ ވިދާޅުވެފައިވަނީ ރަތަން ޓާޓާ މަރުވުމުގެ ސަބަބުން ނުހަނު ހިތާމަ ކުރައްވާ ކަމުގައެވެ.
ރަތަން ޓާޓާ ގެ ޖަނާޒާ ބޭއްވުމަށް ހަމަޖެހިފައިވަނީ ބުރާސްފަތި ދުވަހު ހަވީރު 4 ޖަހާއިރު ރަސްމީ އިއްޒަތުގައި މުމްބާއީގެ ވާލީ ގައެވެ.