އެމެރިކާގެ ކަނޑު ސިފައިންގެ ބިޔަ ލަޝްކަރުތައް މުޅި މެދު އިރުމަތި ފުރާލަފާއި އޮތް އިރު އީރާނުން އިސްރާއީލަށް ރައްދު ހަމަލާ ދީފާނެ ކަމާދޭތެރޭ ތަޖްރިބާކާރުން ސުވާލު އުފައްދަމުން ގެންދާ ކަމަށް މިއަދު ފޮކްސް ނިއުސްގެ ޚަބަރު ގައި ބުނެފައި ވެއެވެ. އެމެރިކާގެ ލަޝްކަރުތަކުން އިސްރާއީލު ރައްކާތެރި ކުރުމުގެ ނަމުގައި އީރާނަށްހަމަލާ ދެމުން ގެންދާނެ ކަމާދޭތެރޭ ޝައްކު ކުރާނެ ޖާގައެއް ނެތް ކަމަށް ފައުންޑޭޝަން ފޯރ ޑިފެންސް އޮފް ޑިމޮކްރެސީޒް ސީނިއަރ އެޑްވައިޒަރ ރިޗަރޑް ގޯލްޑްބާރގް ފޮކްސްނިއުސްއަށް ކިޔާދީފައިވެއެވެ.

ގޯލްޑް ބާރގް ކިޔާދީފައިވާ ގޮތުގައި އާޔަތު ﷲ އަލީ ޚާމަނާއިގެ ކުރިފުޅުމަތީގައި އެމަނިކުފާނުގެ ގައުމަށް ކަނޑައެޅިގެން ބޮޑު ނުރައްކަލެއް އެކުލެވިފައިވާ މިލިޓްރީ ބިރަކާ ކުރިމަތިލެއްވުމަށްވުރެން ޝަރަފްވެރިކަމާއެކު އެމަނިކުފާނުގެ މިލިޓްރީ ދެމެހެއްޓުމަށް އިސްކަން ދެއްވާނެއެވެ. މެދުއިރުމަތީގައި އެމެރިކާގެ ބިޔަ ލަޝްކަރުތަކުން މުގޯލިއަޅަމުންގެންދާތާ އަހަރެއްހާދުވަސް ވެގެންދާއިރު މެދުއިރުމަތީގައި އީރާނުން ގެންގުޅޭ ސިޔާސަތަށް އެއްވެސް ބަދަލެއް ނައުމުން އެމެރިކާގެ ލަޝްކަރުތަކަށް އީރާނު ޖެހިލުން ނުވާކަން ހާމަވެގެން ދެއެވެ. އަދި ދިގު މުއްދަތެއްގައި އިސްލާމިކް ރިޕަބްލިކް އޮފް އީރާނާއި އީރާނަށް ތާއީދުކުރާ މުޖާހިދުންގެ ހަމަލާތަކަށް އިންތިޒާތުގައި އެ ބިޔަ ލަޝަކަރުތައް ރަހީނުންގެ ގޮތުގައި މެދުއިރުމަތިން ނުދެވިފައި ނުތިބޭވެކަންވެސް އެމަނިކުފާނަށް އެނގިވަޑައިގަންނަވާނެ އެވެ.

އެމެރިކާއިން މެދު އިރުމަތީގައި މިހާރު ކުރިމަތިލާން ޖެހިފައިވާ ހަނގުރާމައިގެ ހާލަތުގު ހަގީގަތަށް ބަލާއިރު އީރާނަށް އަޅާފައިވާ ދަތިކުރުމުގެ ފިޔަވަޅުތަކަށް ލުޔެއްނުދީ އީރާނާއި އީރާނަށް ތާއީދުކުރާ މުޖާހިދުންގެ ކުރިމަތީގައި އެމެރިކާގެ ބިޔަ ލަޝްކަރުތައް މެދު އިރުމަތީގައިނެތި އިރާގައި ޖޯރޑްންއާއި ސީރިޔާ އަދި މެދު އިރުމަތީގެ އެހެން ގައުމުތަކުގައި އެމެރިކާގެ ސިފައިން ތިބެއްޖެނަމަ އެމީހުންނަށް މެދުވެރިވެދާނެ ނުރައްކާ އެމެރިކާއަށް ރަނަގަޅަށް އެނގޭނެއެވެ. އަދި އެމެރިކާގެ މަސްލަހަތަށްޓަކައި އެ ގައުމުތަކުގައި ތިބި ސިފައިން ގެންދެވޭކަށްވެސް ނޯންނާނެއެވެ.

އިސްރާއީލުގެ މީޑިއާތަކުން ހީކޮށްގެން ތިބީ މިދިޔަ ބުރާސްފަތި ދުވަހު އީރާނުން އިސްރާއީލަށް ހަމަލާ ދޭނެކަމަށެވެ.

އެމެރިކާއިން ގަބޫލުކުރަނީ އީރާނުން ބަދަލު ހިފުން ދެން ކުރިޔަށް ގެންދާނީ އެހެން ސިފައެއްގައެވެ. އީރާނުން އިސްރާއީލަށް ހަމަލާދިނުމަކުން ރަނގަޅު ނަތީޖާއެއް ނުނިކުންނާނެކަން ތެހެރާނަށް ވިސްނާ ދިމުމަށް އެމެރިކާގެ ބައިވެރިންނަށް ފިއްތުން ކުރިމަތި ކުރަމުންގެންދާ ކަމަށް ސްޓޭޓް ޑިޕާރޓްމެންޓުގެ ތަރުޖަމާނު މެތިއު މިލަރ ނޫސްވެރިންނަށް ކިޔާދީފައިވެއެވެ.

މެދުއިރުމަތީގެ މަސްރަޙް އިތުރަށް ނުރައްކާ ވިޔަ ނުދިނުމަށްޓަކައި އެމެރިކާގެ ލަޝްކަރުގެ ތެރެއަށް އެފް-22 މަރުކާގެ ރަޕްޓަރސް މި ދިޔަ ބުރާސްފަތިދުވަހު އިތުރު ކޮށްފައިވާ ކަމަށް އެމެރިކާގެ ސެންޓްރަލް ކޮމާންޑުން ސޯޝަލް ޕްލެޓްފޯރމް އެކްސްގައި ބުނެފައިވެއެވެ. މެދުއިރުމަތީގެ އެކި ދިމަދިމާލުގައި އެމެރިކާގެ 12 މަނަވަރު މިހާރު ހަރކާތްތެރިވަމުންދާ ކަމަށް އެމެރިކާގެ އޮފިޝަލަކު ފޮކްސް ނިއުސް ޑިޖިޓަލްއަށް ވަނީ ކިޔާދީފައެވެ.

25 އަހަރުދުވަހުގެ މިލިޓްރީ ތަޖްރިބާކާރު ހެރިޓޭޖް ފައުންޑޭޝަންގެ ޖޭމްސް ކަރަފާނޯ ފޮކްސް ނިއުސް ޑިޖިޓަލް އަށް ކިޔާދީފައިވާގޮތުގައި ބަދިގެފަރާތުން މަޝްވަރާ ކުރެވެމުންދާއިރު ހަނގުރާމައިގެ ވަސީލަތްތައް ޖަމާކުރަމުންގެންދިއުމަކީ އާދައެކެވެ. އޭނާ ދެކޭގޮތުގައި މިއަދުގެ ހާލަތުގައި އީރާނާއެކު ކުރެވޭ އެއްވެސް މަޝްވަރާއެއްގައި ރަނގަޅު ނަތީޖާއަކާ ހަމަޔަށް ނުދެވޭނެއެވެ. އެމެރިކާއިން ކަންތައްކުރާގޮތުންވެސް އީރާނުން އެމެރިކާއާއެކު މަޝްވަރާއަށް ދިއުމުގެ ވިސްނުމެއް ނުގެންގުޅޭނެއެވެ.

އީރާނުގެ އަވަށްޓެރި ގައުމުތަކުންވެސް މަޝްވަރާގެ މޭޒުން މައްސަލަތަކަށް ހައްލު ހޯދަން ބާރުއަޅަމުން ގެންދާ މިދަނޑިވަޅުގައި އެމެރިކާގެ ބިޔަ ލަޝްކަރުތައް މެދުއިރުމައްޗަށް ޖަމާކުރުމުން އީރާނުން އިސްރާއީލަށް ހަމަލާ ދިނުމުން މާބޮޑު ފައިދާއެއް ނުކުރާނެކަން ތަސައްވުރު ކުރެވޭނެއެވެ. އީރާނުންވެސް ބުނަމުންގެންދަނީ ފަލަސްތީނުގެ މައްސަލައަށް ދާއިމީ ހައްލެއް ލިބިގެން ދިއުމަކީ އީރާނުން އެންމެ ބޮޑަށް އިސްކަން ދޭ ކަންތައް ކަމަށެވެ.

ބައިނަލް އަގްވާމީ ތަޖްރިބާކާރުންގެ ވިސްނުންވެސް ފެންނަނީ ދެކަފިވެފައިވާތަނެވެ. އިންސްޓިޓިއުޓް އޮފް ވޯރ ސްޓަޑީޒްގެ ވިޒިޓިންގ ފެލޯ މެޓް މެކްއިނިސް ދެކޭގޮތުގައި މިވަގުތު އެމެރިކާގެ ލަޝްކަރުތައް މެދު އިރުމައްޗަށް ޖަމާކުރުމުން ހާސިލުވާނެ ހަމައެކަނި ލަނޑު ދަނޑިއަކީ އީރާނުން އިސްރާއީލަށް ހަމަލާދިނުން ހުއްޓުވުމެވެ. ސިޔާސީ ގޮތުން މައްސަލަ ހައްލުކުރަން ކުރަމުން ގެންދާ މަސައްކަތަށް އެކަމުގެ ސަބަބުން އެއްވެސް ފައިދާއެއް ކުރާނެކަމަކަށް ނުފެނެއެވެ.