ޕާކިސްތާނުގެ ބަލޫޗިސްތާން ޕުރޮވިންސުގެ ގަވާދަރްގައި އެ ޤައުމުގެ ސަރުކާރާ ދެކޮޅަށް ކުރަމުން އަންނަ މުޒާހަރާތަކުގެ ތެރޭގައި އެ ސަރަހައްދުގައި ސަލާމަތީ ކަންކަން ބަލަހައްޓަމުން ދިޔަ ސިފައިންގެ މީހަކަށް ހަމަލާދީ މަރާލައިފި ކަމަށް ޕާކިސްތާނުގެ އަސްކަރިއްޔާއާ ހަވާލާދީ މީޑިއާ ރިޕޯޓުތަކުން ބުނެފިއެވެ.
މި މުޒާހަރާތަކުގައި އިސްކޮށް ހަރަކާތްތެރިވާ ބަލޯޗް މޫވްމަންޓް ޖަމާޢަތުން ޑިމާންޑް ކުރަމުން އަންނަނީ ސަލާމަތީ ބާރުތަކުން ހައްޔަރު ކޮށްފައިވާ އެ ޖަމާޢަތުގެ މެންބަރުން މިނިވަން ކުރުމަށެވެ.
މިކަމަށް ޑިމާންޑްކޮށް މުޒާހަރާގެ ބައިވެރިން ވަނީ ބަނދަރުމަތީ ރަށެއް ކަމުގައިވާ ގަވާދަރްގެ ބައެއް މަގުތައް ބަންދު ކޮށްފައެވެ.
މީޑިއާ ރިޕޯޓުތައް ބުނާގޮތުން މި މުޒާހަރާގެ ތެރެއިން ހަމަނުޖެހުންތަކެއް ފެށުނީ މުޒާހަރާ ރޫޅާލަން ސިފައިން ބާރުގެ ބޭނުން ކުރަން ފެށުމުންނެވެ.
މިގޮތުން މުޒާހަރާގެ ބައިވެރިންގެ ތެރެއިން ބަޔަކު ސިފައިންނަށް ދިން ޙަމަލާތަކުގައި ސިފައިންގެ މީހަކު މަރުވެފައި ވާއިރު 16 ސިފައިންގެ މީހަކު ވަނީ ޒަހަމްވެފައި ކަމަށް މީޑިއާ ރިޕޯޓުތައް ބުނެއެވެ.
