ޕީޕަލްސް ނެޝަނަލް ކޮންގްރެސް (ޕީއެންސީ) މަޖިލީހުގެ މައިނޯރިޓީ ޕާޓީގެ ގޮތުގައި އޮތް އިރު ފިއްތުންތަކާއި ކުރިމަތި ކުރުވާފައިވާ ކަމަށް ރައްޔިތުންގެ މަޖިލީހުގެ އޭދަފުށި ދާއިރާގެ މެމްބަރު އަޙްމަދު ސަލީމް ވިދާޅުވެއްޖެއެވެ. 

ސަލީމް މިހެން ވިދާޅުވީ މަޖިލީހުގެ މިއަދުގެ ޖަލްސާގައި ވާހަކަދައްކަވަމުންނެވެ. 

އެގޮތުން ނިމިދިޔަ މަޖިލިސް އިންތިޚާބުގެ ނަތީޖާއަށް އިޝާރަތްކުރައްވާ ސަލީމް ވިދާޅުވީ މަޖިލީހުގެ ސުޕަ މެޖޯރިޓީ ޕީއެންސީއަށް ލިބިފައިވީ ނަމަވެސް މައިނޯރިޓީއަށް އިޙްތިރާމް ކުރައްވާނެ ކަމަށެވެ. 

އަދި މަޖިލީހުގައި ޕީއެންސީއަށް ސުޕަ މެޖޯރިޓީ އޮތް ނަމަވެސް މައިނޯރިޓީ ޕާޓީއަށް ބިރެއް ނުދައްކާނެ ކަމަށާއި ބާރާއި ނުފޫޒަކީ އަބަދު އެއްބައެއްގެ އަތުގަ އޮންނާނެ އެއްޗެއް ނޫން ކަމަށް އޭނާ ވަނީ ވިދާޅުވެފައެވެ. 

މެޖޯރިޓީ އޮތް ޕާޓީން ޕީއެންސީގެ މައިނޯރިޓީ މަޖިލީހުގައި އޮތުމުން ކުރިމަތި ކުރުވި ފިއްތުންތަކުގެ ސަބަބުން، މައިނޯރިޓީ މެމްބަރުންނަށް ނަފްސާނީ ގޮތުން ދަތިތަކާއި ކުރިމަތިލާން ޖެހިވަޑައިގެންނެވި ކަމަށް ސަލީމް ވަނީ ވިދާޅުވެފައެވެ. 

މީގެ އިތުރުން މައިނޯރިޓީ އަށް އިހުތިރާމް ކުޑަކޮށް އެމީހުން ނަފުސާނީ ގޮތުން ބަލިކޮށްލާކަށް މަސައްކަތެއް ނުކުރާނެ ކަމަށް އޭނާ ވަނީ ވިދާޅުވެފައެވެ.