ރައީސް ޑރ. މުހައްމަދު މުޢިއްޒުގެ ވައުދުތައް ފުއްދުމަށް މިހާރު އެއްވެސް ހުރަހެއް ނެތް ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު މިއަދު ވިދާޅުވެއްޖެ އެވެ.
ޖަމީލް މިހެން ވިދާޅުވެފައި ވަނީ އިއްޔެ ބޭއްވި މަޖިލިސް އިންތިޚާބުގައި ސަރުކާރު ހިންގާ ޕީއެންސީން މަޖިލީހުގެ ސުޕަ މެޖޯރިޓީ ހޯދާފައި ވާތީ އެކަމަށް އިޝާރާތްކޮށް ކުރެއްވި ޕޯސްޓެއްގައެވެ.
ޖަމީލް މިހެން ވިދާޅުވެފައިވާއިރު ސަރުކާރުގެ މަޝްރޫޢުތަކާއި ރައީސް މުޢިއްޒުގެ ވައުދުތައް ފުއްދުމަށް ބާރު ސްޕީޑުގައި ކުރިއަށް ދެވޭނީ މަޖިލިސް އިންތިޚާބު ކާމިޔާބު ކުރެވިގެން ކަމަށް ރައީސް މުޢިއްޒު ވަނީ ވިދާޅުވެފައެވެ.
އެގޮތުން މިކަމަށް އިޝާރާތް ކުރައްވާ ޖަމީލު ވިދާޅުވީ ރައީސް މުޢިއްޒުގެ ވަޢުދުތައް ފުއްދެވުމަށް ދެން އެއްވެސް ހުރަހެއް ނެތް ކަމަށެވެ.
އަދި ރައްޔިތުންގެ ޙާލަތު ބަދަލު ކުރުމަށް އިޚްލާޞްތެރިވާނެ ކަމަށް އުއްމީދުކުރައްވާ ކަމަށް ޖަމީލް ވަނީ ވިދާޅުވެފައެވެ.
ކޮރަޕްޝަނާއި، ފަސާދައަށް ޖާގަ ނުދެއްވާ، މިނިވަންކަމަށް ގެއްލުން ލިބުނު އެންމެހާ ކަންތައްތައް ވަގުތުން ނިމުމަކަށް ގެންނަވާ، ގެއްލުނު ކަނޑު ހޯއްދަވާދެއްވަންވީ ވަޢުދު ފުއްދެވުމަށް ޖަމީލް ވަނީ އެދިވަޑައިގެންފައެވެ.
ހަމަ އެހެންމެ ގައުމުގެ ހަރުމުދާ، އެއަރޕޯޓް، ޕޯޓްސް، ބިންތައް ނުވިއްކުމަށާއި ރައްޔިތުންގެ ނިކަމެތިކަން މުއްސަނދި ކަމަށް ބަދަލު ކުރައްވާނެ ކަމަށް ވީ ވަޢުދު ފުއްދެވުމަށް ޖަމީލު ވަނީ އެދިވަޑައިގެންފައެވެ.
ތެދުވެރި ކޮންމެ ކަމަކަށް ތާއީދު ކުރައްވާނެ ކަމަށާއި ކޮންމެ ގޯސްކަމެއް ހުއްޓުވަން މަސައްކަތް ކުރައްވާނެ ކަމަށްވެސް ޖަމީލް ވަނީ ވިދާޅުވެފައެވެ.
