ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ ޓުރާންސްފޯމަރަކުން ވައްކަން ކުރަން އުޅެނިކޮށް ކަރަންޓްގައި ޖެހުނު މީހާ މަރުވެއްޖެއެވެ.

އެ ކުންފުނީގެ ޓްރާސްފޯމަރަކަން ވައްކަން ކުރަން އުޅެނިކޮށް ހިތާމަވެރި ހާދިސާއެއް ހިނގާފައިވާ ކަމަށް ސްޓެލްކޯގެ މެނޭޖިން ޑައިރެކްޓަރ ހުސެއިން ފަހުމީ ފަތިހު 5:15 އެހާއިރު ކުރެއްވި ޕޯސްޓެއްގައި ވިދާޅުވެފައި ވެއެވެ. 

އެގޮތުން މިކަމަށް އިޝާރާތްކޮށް ސްޓެލްކޯ އިން މިއަދު ބުނީ ހުޅުމާލޭގެ ދެވަނަ ފިޔަވަހީގައި ބަހައްޓާފައިވާ ޓްރާންސްފޯމަރަކުން ވައްކަން ކުރަން އުޅުނު މީހަކު ކަރަންޓުގައިޖެހި މަރުވެފައިވާ ކަމަށެވެ. 

އަދި އެމީހާ ހޮސްޕިޓަލަށް ގެންދިޔަ އިރުވެސް އޮތީ މަރުވެފައި ކަމަށް ހުޅުމާލެ ހޮސްޕިޓަލާ ހަވާލާދީ ސްޓެލްކޯ އިން ބުނެފައި ވެއެވެ.

 މީގެ އިތުރުން މި ހާދިސާއާ ގުޅިގެން މީޑިއާތަކަށް ފުލުހުން ފޮނުވި މެސެޖެއްގައި ފުލުހުން ބުނީ ހުޅުމާލެ ފޭސް ދޭއްގެ ހިޔާ ސަރަހައްދު ޕެޓްރޯލް ކުރުމުގައި ހަރަކާތްތެރިވި ފުލުހުންނަށް ހިޔާއެޗް3 ޓަވަރު ކައިރީގައި ހުންނަ ޓްރާސްފޯމަރު ކައިރީގައި އަނިޔާ ތަކަކާއެކު ވެއްޓިފައި އޮތް 27 އަހަރުގެ ދިވެހި ފިރިހެނަކު ރޭ 04:07ގައި ފެނިފައިވާ ކަމަށެވެ.

މިގޮތުން އޭނާ ހޮސްޕިޓަލަށް ގެންދިޔަ އިރުވެސް މަރުވެފައިވާ ކަމަށް ހޮސްޕިޓަލާއި ހަވާލާދީ ފުލުހުން ބުނެފައި ވެއެވެ.