މެލޭޝިއަން އެއާލައިންސްއިން އަނެއްކާވެސް ރާއްޖެއަށް ދަތުރުތައް ފަށަން ނިންމައިފިއެވެ.
އެ އެއާލައިނުން މިހާރު ވަނީ ރާއްޖެއަށް ދަތުރުތައް ފަށަން ނިންމައި ޓިކެޓް ގަތުމުގެ ފުރުސަތު މިއަދު ހުޅުވައިލައިފައެވެ.
މެލޭޝިއަން އެއާލައިނުން ބުނީ އެ ޤައުމުގެ ވެރިރަށް ކުއަލަލަމްޕޫރުން ވެލާނާ އިންޓަނޭޝަނަލް އެއާޕޯޓަށް ކުރާ ދަތުރުތައް ފަށާނީ އަންނަ އޮގަސްޓުގެ ފުރަތަމަ ދުވަހު ކަމަށެވެ.
ރާއްޖެއާއި މެލޭޝިއާ އާ ދެމެދު ކުރާ ދަތުރުގެ އެއްކޮޅު ޓިކެޓުގެ އަގަކީ 1,276 ރ. އެވެ. ދެކޮޅު ޓިކެޓުގެ އަގަކީ 2,820 ރ. އެވެ.
މެލޭޝިއާ އެއާލައިނުން ހާމަކުރި ގޮތުގައި ކޮންމެ ދުވަހަކު ވެސްއެ އެއާލައިނުން ރާއްޖެއަށް ދަތުރުތައް ކުރާނެއެވެ.
މީގެ ކުރިން މެލޭޝިއަން އެއާލައިނުން ރާއްޖެއަށް ކުރަމުންއައި ދަތުރުތައް ހުއްޓާލާފައިވަނީ 2015 ވަނަ އަހަރުގެ އޮގަސްޓު މަހުގެތެރޭގައެވެ.
