ބޮލީވުޑްގެ މަޝްހޫރު ތަރި އަޖޭ ދޭވްގަންގެ ބައްޕަ އެކްޝަން ޑައިރެކްޓަރު ވީރޫ ދޭވްގަން އަކީ ފިލްމީ ދާއިރާއާ ގުޅުމުގެ ކުރިން މުމްބާއީގައި އުޅުނު ގޭންގްސްޓާރެއް ކަމަށް އަޖޭ ބުނެފިއެވެ. 

އަޖޭގެ ބައްޕަ ،ބޮލީވުޑްގެ ކާމިޔާބު އެކްޓަރު އަދި ސްޓަންޓް ކޮރިއޯގްރާފާ ވީރޫ ވަނީ 2019 ވަނަ އަހަރުގެ މެއި މަހު މަރުވެފައެވެ. 

ކޮފީ ވިތް ކަރަންގެ އެޕިސޯޑެއްގައި ދާދި ފަހުން އަޖޭ ވަނީ އޭނާގެ ބައްޕަ ވީރޫ ކެރިއަރު ފެށި ގޮތާއި މެދު ވާހަކަދައްކާފައެވެ. 

އަޖޭ ބުނީ އޭނާގެ ބައްޕަ ވީރޫ އުމުރުން 13 އަހަރުގައި، ޕަންޖާބުގައި ހުންނަ އޭނާގެ ގެއިން ފިލައިގެން ރޭލު ޓިކެޓެއް ވެސް ނެތި ބޮމްބޭއަށް ދިޔަ ކަމަށެވެ.

ވީރޫގެ އަތުގައި އެއްވެސް ލާރިއެއް ކާނާއެއްޗެއް އަދި ވަޒީފާއެއްވެސް އޭރު ނެތް ކަމަށާއި ކައިބޮއި ނިދާ ހެދީ ބޮމްބޭގެ މަގުމަތީގައި ކަމަށް އަޖޭ ބުނެފައި ވެއެވެ. 

ނަމަވެސް ޓެކްސީއެއް ދޮވެދޭ މަތިން ކޮންމެ ރެޔަކު އޭގައި ނިދުމުގެ ފުރުސަތު މީހަކު ފަހި ކޮށްދިން ކަމަށާއި އަދި އެއަށްފަހު ކޮންމެވެސް ވަރަކަށް ވަޑާމުގެ މަސައްކަތް ކުރިކަމަށާއި ދެން އޭނާ ވެގެން ދިޔައީ ސިއޮން-ކޮލިވާޑާ ސަރަހައްދުގައި އުޅޭ ގޭންގްސްޓަރުންގެ ތެރެއިން މީހަކަށް ކަމަށެވެ. 

މިގޮތުން އެކްޝަން ޑައިރެކްޓަރު ރަވީ ކަންނާއަށް އޭނާގެ ބައްޕަ ފުރަތަމަ ފެނުނީ މަގުމަތީގައި ހިނގި މާރާމާރީއެއްގެ ތެރެއިން ކަމަށާއި އެހެންކަމުން، ކާރު ހުއްޓުވައިގެން މާރާމާރީ ނިމުމުން ވީރޫ ކުރެން ކޮށް އުޅެނީ ކޮން މަސައްކަތެއްތޯ އެހި ކަމަށް އަޖޭ ބުނެފައި ވެއެވެ. 

އޭނާ އަކީ ވަޑާން ކުރާ މީހެއް ކަމަށް ބުނުމުން ތިޔައީ ރަނގަޅު ކުއްޖެއް ކަމަށާއި ފަހުން ބައްދަލުކޮށްލަން ވީރޫ ކުރެން އެދުނު ކަމަށާއި ވީރޫގެ ކާމިޔާބު ކެރިއަރު ފެށިގެން އައީ އެގޮތަށް ކަމަށް އަޖޭ ވަނީ ކިޔައިދީފައެވެ. 

ފަހުން ވީރޫ ދޭވްގަން ވެގެން ގޮސްފައި ވަނީ ބޮލީވުޑްގެ ފިލްމު އިންޑަސްޓްރީގެ މަޝްހޫރު އެކްޝަން ޑައިރެކްޓަރަކަށެވެ. 

 އޭނާ ވަނީ ލާލް ބާދުޝާހް،މިސްޓަރ ނަޓްވާރލާލް، ޕީ’ހޫލް އޯރ ކާންޓޭ، އިންކާރް، ހިންމަތުވާލާ، ޝެހެންޝާ، ޚޫން ބަރީ މާންގް، ހިމެނޭހެން 80 އަށް ވުރެ ގިނަ ފިލްމުގައި މަސައްކަތް ކޮށްފައެވެ. ވީރޫގެ ފުރަތަމަ ޑައިރެކްޝަން ފިލްމު ”ހިންދުސްތާން ކީ ކަސަމް“ 1999 ވަނަ އަހަރު އުފެއްދިއިރު، މި ފިލްމުގެ ލީޑް ރޯލުން ފެނިގެންދިޔައީ ފިރިހެން ދަރިފުޅު އަޖޭ ދޭވްގަން، އަމީތާބް ބައްޗަން، އަދި މަނީޝާ ކޮއިރާލާ އެވެ. 

އަޖޭ ދޭވްގަންގެ ފަހުގެ ފިލްމީ މަސައްކަތްތަކަށް ބަލާލާއިރު ދެން އޭނާ ފެނިގެން ދާނީ ޕްރޮޑިއުސަރު ބޯނީ ކަޕޫރުގެ ސްޕޯޓްސް ޑްރާމާ ފިލްމު ”މައިދާން“ އާއި ޑައިރެކްޓަރު ނީރާޖް ޕާންޑޭގެ ”އޯރޮން މޭން ކަހަން ޑަމް ތާ“ އިންނެވެ.