ބޮލީވުޑްގެ މަޝްހޫރު ތަރި، ރިތިކް ރޯޝަން އޭނާގެ ކުރީގެ އަންހެނުން ސުޒޭން ހާން ގެ ލޯބިވެރިޔާ އަރްސަލާން ގޯނީއަށް އުފަން ދުވަހުގެ ތަހުނިޔާ ކިޔައިފިއެވެ.
އަރްސަލާންގެ އުފަންދުވަސް ކަމަށްވާ ޑިސެމްބަރު މަހުގެ 19 ވަނަ ދުވަހު، އޭނާގެ އިންސްޓަގްރާމް ސްޓޯރީގައި އަރްސަލާންގެ ފޮޓޯ ހިއްސާކޮށް ރިތިކް ވަނީ އުފަން ދުވަހުގެ ތަހުނިޔާ ކިޔާފައެވެ.
ސުޒޭންވެސް ވަނީ އަރްސަލާންއާއެކު ހޭދަކޮށްފައިވާ ބައެއް ވަގުތުތައް ދައްކުވައިދޭ ފޮޓޯތަކެއް އާންމުކޮށް އިންސްޓަގްރާމްގައި އުފަން ދުވަހުގެ ތަހުނިޔާ ކިޔާ އޭނާގެ ލޯބި ފާޅުކޮށްފައެވެ.
މީގެ އިތުރުން ރިތިކްގެ މިހާރުގެ ލޯބިވެރިޔާ ސަބާ އާޒާދުވެސް ވަނީ ސުޒޭންގެ އިންސްޓަގްރާމް ޕޯސްޓުގެ ކޮމެންޓު ސެކްޝަނުގައި އަރްސަލާން ގޯނީއަށް އުފަންދުވަހުގެ ތަހުނިޔާ ކިޔާފައެވެ.
2000 ވަނަ އަހަރު ކައިވެނި ކުރި ރިތިކް އާއި ސުޒޭންގެ ކައިވެނި 2014 ވަނަ އަހަރު ރޫޅާލި ނަމަވެސް އެ ދެމީހުން އަންނަނީ ނަމޫނާ ރަހުމަތްތެރި ގުޅުމެއް ދަމަހައްޓަމުންނެވެ. އަދި އެ ދެ މީހުންގެ ކައިވެންޏަށް ލިބިފައިވާ ދެ ދަރިން ކަމަށްވާ ރިހާން އާއި ރިދާން ކޯ ޕޭރެންޓް ކުރުމުގައި މި ދެ މީހުންނަކީ ނަމޫނާ ދެ މައިންބަފައިންނެވެ.
މީގެ އިތުރުން އިންސްޓަގްރާމްގައި މިހާރުގެ ލޯބިވެރިންނާއެކު ރިތިކް، އާއި ސުޒޭން އެކުގައި އެކި ހަފްލާތަކުން ނަގާފައިވާ ފޮޓޯތައްވެސް ހިއްސާކޮށްފައި ހުރެއެވެ.
ރިތިކް ދެން އެންމެ އަވަހަށް ބެލުންތެރިންނަށް ފެންނާނީ އޭނާ ލީޑު ރޯލް ކުޅެފައިވާ، އަސްކަރީ ޕައިލެޓެއްގެ ރޯލުން ފެނިގެންދާ ފިލްމު ”ފައިޓާ“ އިންނެވެ. މި ފިލްމު ރިލީޒް ކުރަން ހަމަޖެހިފައި ވަނީ އަންނަ ޖެނުއަރީ މަހުގެ 25 ވަނަ ދުވަހުއެވެ.
