އެއަރ-ޓު-އެއަރ މިސައިލު ލެއްވޭގޮތަށް އިރާނުން ތައްޔާރުކުރި ކައްރާރް ކޮމްބެޓް ޑްރޯންތައް އާދީއްތަ ދުވަހު ދައްކާލައިފިއެވެ.
އިރާނުން ތައްޔާރުކުރި ކައްރާރް ޑްރޯނަކީ 8 ކިލޯމީޓަރު (5 މޭލު) ގެ ރޭންޖުގެ މަޖީދް ތާމަލް މިސައިލު ހަރުކޮށްފައިވާ ޑްރޯނެކެވެ. 2010 ވަނަ އަހަރު އަލަށް ތައާރަފްކުރި ކައްރާރް ޑްރޯނަކީ 1000 ކިލޯމީޓަރު (620 މޭލު) ގެ އޮޕަރެޝަން ރޭންޖުގެ ޑްރޯނެކެވެ.
އިރާނުގެ ޚަބަރުތަކުން ރިޕޯޓުކޮށްފައިވާގޮތުގައި، އިރާނުގެ އަސްކަރިއްޔާއިން މި ޑްރޯންތައް ބޭނުންކުރާނީ އެގައުމުގެ ބޯޑަރުތަކުގައެވެ. އެގޮތުން، އިރާނާއި ދިމާލަށް އަމާޒުވާ ވައިގެ ހަމަލާތަކުގެ ނުރައްކާ ވަރަށްވެސް ޚަރަދުކުޑަ ގޮތެއްގައި ނައްތާލެވޭނެކަމަށް އެގައުމުގެ ދިފާޢީ ވުޒާރާއިން ގަބޫލުކުރާކަމަށް ތަސްނީމް ނިއުސް އޭޖެންސީއިން ވަނީ ބުނެފައެވެ.
އެންމެ ފުރަތަމަ ފަހަރަށް މިޑްރޯން ދައްކާލީ ތެހްރާންގެ އަސްކަރީ ތަމްރީން ސްކޫލެއްގައި ބޭއްވި ހަފްލާއެއްގައެވެ. މި ހަފްލާގައި އިރާނުގެ އަސްކަރިއްޔާގެ ކޮމާންޑަރ އިން ޗީފް ޖެނެރަލް. އަބްދުލްރަޙީމް މޫސާވީ ބައިވެރިވިއެވެ.
”ދުޝްމިނުން އެމީހުންގެ އުކުޅުތައް މުރާޖަޢާ ކުރަން ޖެހޭނެ. އިރާނު މިހާރު ވެފައިމިވަނީ ކުރިއަށްވުރެވެސް ބާރުގަދަ ގައުމަކަށް.“ މޫސާވީއާއި ހަވާލާދީ އައިއާރްއެންއޭ އިން ރިޕޯޓުކޮށްފައިވެއެވެ.
އިރާނުން އެގައުމުގެ އަސްކަރީ ބާރު ހަރުދަނާކޮށް ވަރުގަދަކުރަމުން އަންނަތާ އެތައް އަހަރެއް ވެފައިވާއިރު، މިހާޖިރް10 ނަމަކަށްކިޔާ އެޑްވާންސްޑް ކޮމްބެޓް ޑްރޯނެއް އެގައުމުގެ ދިފާޢީ ވުޒާރާއިން ދައްކާލާފައިވަނީ މިދިޔަ އޮގަސްޓް މަހުގައެވެ.
އެގޮތުން، މި ޑްރޯނަކީ 2000 ކިލޯމީޓަރު (1240 މޭލު) ގެ ރޭންޖަކަށް ހަމަލާދިނުމުގެ ގާބިލުކަންހުރި ޑްރޯނެއްކަން ރިޕޯޓުތަކުން އެނގެއެވެ. އިރާނުގެ އަސްކަރީ ބާރު ވަރުގަދަކުރަމުން ދިޔުން ވެފައިވަނީ އެމެރިކާއާއި އިސްރާއީލަށް ނުހަނު ނުތަނަވަސްކަމެއް ގެނުވާކަމަކަށެވެ. އެގޮތުން، އިރާނުގެ ޑްރޯން ޕްރޮގްރާމުގައި ހިއްސާވާ ހުރިހާ ފަރާތަކާއި ދެކޮޅަށް ފިޔަވަޅުއެޅުމަށް އެމެރިކާއިން ވަނީ ނިންމާފައެވެ.
މީގެއިތުރުން، އަވައްޓެރި ލުބުނާނުގެ ހިޒްބުﷲ މުޖާހިދުންނާއި، ޔަމަނުގެ ހޫތީ މުޖާހިދުންނަށް އިރާނުން ޑްރޯން ސަޕްލައިކުރާކަމަށް ތުހުމަތުކުރެވޭއިރު، ޔޫކްރެއިނާއި ދެކޮޅަށް ރަޝިއާއިން ކުރާ ހަނގުރާމައިގައި ރަޝިއާއިން އަންނަނީ އިރާނުގެ ޑްރޯންތައް ބޭނުންކުރަމުންނެވެ.
އިރާނުން އެމީހުންގެ އެންމެ ފަހުގެ އުފެއްދުންތައް ދައްކާލަމުން އެދަނީ، އިސްރާއީލާއި ހަމާސްގެ ހަނގުރާމަ ހޫނުވަމުންދާ ދަނޑިވަޅުގައެވެ. މިގޮތުން، އިރާނަކީ ޣައްޒާގެ ހަމާސް މުޖާހިދުންގެ ވާގިވެރިއެއްކަމަށް ގިނަ ބަޔަކު ގަބޫލުކުރެއެވެ.
One Response
އީރާނު ވަރެއް ހަމަ ނެތެވެ. ދެން ކިޔާ އެއީ ޝިއާއީން ނޭ< ސުންނީ ޝިޢާއިން ކިޔުން ހުށްޓާލައި ޔަހޫދީންނާއި ނަސޯރާއިންގެ އަނިޔާއާއި ކެހިވެރިކަމުން ސަލާމަތް ވާން ވެއްޖެތަން މާލަސްވެއްޖެއެވެ.