ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތުރުކީ އާއި ދުބާއީ އަށް ކުރެއްވި ރަސްމީ ދަތުރުފުޅަށް 3.4 މިލިއަން ރުފިޔާ ޚަރަދު ކުރެއްވި ކަމަށް ރައީސް އޮފީހުން މިއަދު ވިދާޅުވެއްޖެއެވެ.
ރައީސް އޮފީހުން ވިދާޅުވީ ރައީސް ކުރެއްވި ދަތުރުފުޅުގެ ތެރެއިން އެންމެ ބޮޑު އަދަދެއް ޚަރަދުވީ ޓިކެޓަށް ކަމަށާއި ޓިކެޓުތަކަށް އެކަނި 2.4 މިލިއަން ރުފިޔާ ޚަރަދުވި ކަމަށެވެ.
މީގެ އިތުރުން 28 ބޭފުޅުން ބައިވެރިވެވަޑައިގަތް އެ ދަތުރުފުޅުގައި ތުރުކީ ސަރުކާރުން އެކޮމޮޑޭޝަނާއި ފަރިއްކޮޅުގެ ޚަރަދުތައް ހަމަޖައްސައި ދިނަސް، ދުބާއީ ދަތުރުފުޅުގައި ޔުނައިޓެޑް އަރަބް އެމިރޭޓްސް (ޔޫއޭއީ) ސަރުކާރުން އެ އިންތިޒާމު ހަމަޖައްސައިދިނީ 10 ބޭފުޅަކަށް ކަމަށްވެސް ރައީސް އޮފީހުން ވިދާޅުވެފައި ވެއެވެ. އެހެންކަމުން ޔޫއޭއީ ދަތުރުފުޅުގައި އެކޮމޮޑޭޝަނާއި ފަރިއްކޮޅާއި އެތެރޭގެ ދަތުރުތަކަށް 775،000ރ. ދައުލަތުން ޚަރަދުކުރި ކަމަށް ވެސް ރައީސް އޮފީހުން ވިދާޅުވެފައި ވެއެވެ.
ރައީސް މުޢިއްޒު ރާއްޖެއިން ބޭރަށް ކުރައްވާ ރަސްމީ ދަތުރުފުޅުތަކުގެ ޚަރަދުތައް ހާމަކުރެއްވުމަކީ އެ މަނިކުފާނުގެ ރިޔާސީ ވައުދުފުޅެކެވެ. މިގޮތުން މިއީ ރާއްޖޭގެ ރައީސަކު ރަސްމީ ދަތުރުފުޅުތަކުގެ ތަފުސީލު އަމިއްލަ އަށް ފެނިވަޑައިގެން ހާމަކުރެއްވި ފުރަތަމަ ފަހަރެވެ.
ވެރިކަމާއި ހަވާލުވެ ވަޑައިގަތުމަށްފަހު، ރައީސް މުޢިއްޒު އެންމެ ފުރަތަމަ ދަތުރުފުޅު ކުރެއްވީ ތުރުކީއަށެވެ. އަދި އެ ދަތުރުފުޅުގެ ތެރެއިން ކޮޕް28 ސަމިޓްގައި ބައިވެރިވެވަޑައިގަތުމަށް މިދިޔަ މަހު ދުބާއީ އަށް ވެސް އެ މަނިކުފާނާއި ސަރުކާރުގެ އިސް ވަފުދެއް ވަނީ ވަޑައިގެންފައެވެ.
