ސަރުކާރުގެ އެހީގައި ހިލޭ ބޯންމެރޯ ހަދާ ފުރަތަމަ ޕޭޝަންޓް މިއަދު ރާއްޖެއިން ބޭރަށް ފުރައިފިއެވެ.
ތެލަސީމިއާއަށް ފަރުވާހޯދާ ފަރާތްތަކަށް މިހާރު ދެވޭ ޚިދުމަތްތައް ހަރުދަނާކޮށް ފުޅާކުރުމުގެ އިތުރަށް ހިލޭ ބޯންމެރޯ ޓްރާސްޕްލާންޓް ހެދޭނެ މަގުފަހިކޮށްދިނުމަށް ސަރުކާރުން ނިންމީ މި މަހުގެ 10 ވަނަ ދުވަހުއެވެ.
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރުގެ “ހަފުތާ 14“ ގައި ހިމެނޭ ކަންކަމުގެ ތެރެއިން 04 ހަފުތާގެ ތެރޭގައި ހާސިލުކުރެވުނު ކަންކަން ހިއްސާކުރުމަށް ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި އެ އޮފީހުގެ ޕަބްލިކް ޕޮލިސީގެ އަންޑަރ ސެކްރެޓަރީ މުޙައްމަދު ފިރުޒުލް ޚަލީލު ވިދާޅުވީ ހިލޭ ބޯންމެރޯ ޓްރާންސްޕްލާންޓް ހެދުމަށް އެއް ކުއްޖަކު ފުރާފައިވާ ކަމަށާއި ކުރިއަށް އޮތް ހަފުތާތަކުގެ ތެރޭގައި އިތުރު ކުއްޖަކު ވެސް މި ފަރުވާ ހޯދަން ރާއްޖެއިން ބޭރަށް ފުރާނެ ކަމަށެވެ.
ތެލަސީމިއާ ބައްޔަށް އޮތް ދާއިމީ ހައްލަކީ ބޯންމެރޯ ޓްރާންސްޕްލާންޓޭޝަން ހެދުމެވެ. މި ފަރުވާ ހޯދުމުގައި ދިގު މުއްދަތަކަށް ޚާއްސަ ސަމާލުކަމެއްދީގެން ކުއްޖާ ބަލަހައްޓަންޖެހެއެވެ.
