އިސްރާއީލުން ޣައްޒާއަށް ދެމުންގެންދާ ހަމަލާތަކުގައި ފަލަސްތީނާ އެއްކޮޅަށް ވާހަކަދައްކައި ތާއީދުކުރާތީ ހުޅަނގަށް ނިސްބަތްވާ ޔޫރަޕިއަން ޔޫނިއަން (އީޔޫ) ގެ ގައުމުތަކުން މެލޭޝިއާ އާ ދެކޮޅަށް ފިޔަވަޅު އަޅާނެކަމަށް ބުނެ އިންޒާރުތައް ދީފައިވާކަމަށް މެލޭޝިއާ ބޮޑުވަޒީރު އަންވަރު އިބްރާހީމް ވިދާޅުވެއްޖެއެވެ.
ފަލަސްތީނަށް ތާއީދުކޮށް ބޭއްވި ހިނގާލުމެއްގައި, އަމިއްލަ ފުރާނަފުޅަށް ވެސް ނުރައްކާވެފައިވާކަން ފާހަގަކުރައްވައި ވާހަކަފުޅު ދައްކަވަމުން އަންވަރު ވިދާޅުވީ، އެއީ މައްސަލައެއް ނޫންކަމަށާއި، އެތައް މަސައްކަތެއް ކުރަން އެބަޖެހޭކަމަށެވެ. އަދި މަސައްކަތާއިގެން ދާނީ ކުރިއަށްކަމަށް ވެސް އޭނާ ވިދާޅުވިއެވެ.
މީގެއިތުރުން، އަންވަރުގެ ރައްކާތެރިކަމުގެ ކަންކަމުގައި ”ކަންފަސޭހަ ގޮތް އިސްނުކުރާނެކަމަށް“ ބުނެ މެލޭޝިއާގެ ޗީފް އޮފް ޕޮލިސް ރަޒަރުއްދީން ހުސައިން ޔަގީންކަން އަރުވާފައިވާއިރު، އޭނާ ގަބޫލުކުރާ ގޮތުގައި، އަންވަރަށް ލިބިފައިވާ އިންޒާރުތަކަކީ އިޤްތިޞާދީ ފިއްތުންތަކާއި ގުޅުންހުރި އިންޒާރުތަކެކެވެ.
