ޕްރޮގްރެސިވް ކޮންގްރެސް ކޯލިޝަންގެ ލީޑަރު އަދި ކުރީގެ ރައީސް ޔާމީން ޢަބްދުލްޤައްޔޫމް ގޭބަންދުން ރަށު ބަންދަށް ބަދަލުކޮށްފިއެވެ.
ވ.އާރަށުގެ މައްސަލާގައި މިދިޔަ ޑިސެމްބަރުމަހުގެ 25 ވަނަ ދުވަހު 11 އަހަރުގެ ޖަލު ހުކުމެއް އިއްވާފައިވާ ރައީސް ޔާމީން ދިގު މުއްދަތެއްގައި ޖަލުގައި ހުންނެވުމަށްފަހު މި މަހުގެ ފުރަތަމަ ދުވަހުން ފެށިގެން ހުންނެވީ ގޭބަންދުގައެވެ.
ރައީސް ޔާމީން ވަގުތީ ގޮތުން ގޭބަންދަށް ބަދަލުކުރީ ރިޔާސީ އިންތިޚާބު ކާމިޔާބު ކުރެއްވި ޕީޕީއެމް-ޕީއެންސީގެ ރިޔާސީ ކެންޑިޑޭޓް ޑރ.މުޙައްމަދު މުޢިއްޒު ރައީސް އިބްރާހިމް މުޙައްމަދު ޞާލިޙާ ބައްދަލުކުރައްވައި ޔާމީން ގެއަށް ބަދަލުކުރުމާ ގުޅޭ ގޮތުން ކުރެއްވެވި މަޝްވަރާތަކަށްފަހުއެވެ.
މައުލޫމާތު ލިބޭ ގޮތުން ރައީސް ޔާމީން މިހާރު ވަނީ ރަށު ބަންދަށް ބަދަލުކޮށްފައެވެ. މި ލުޔާއެކު ރައީސް ޔާމީނަށް ޖަލްސާތަކާއި ބައްދަލުވުންތަކުގައި ބައިވެރިވެވަޑައިގެންނެވޭނެއެވެ.
އާރަށުގެ މައްސަލާގައި ޔާމީނަށް އިއްވި ހުކުމް މިހާރު ވަނީ ހައިކޯޓުގައި އިސްތިއުނާފުކޮށްފައެވެ. ނަމަވެސް މައްސަލައިގެ އަޑުއެހުންތައް ނުބޭއްވި ދިގުލައިގެންދާތީ އެމަނިކުފާނުގެ ސަޕޯޓަރުން އަންނަނީ ކަންބޮޑުވުން ފާޅުކުރަމުންނެވެ.
