https://sandhaanu.today/31988/ އާއި ގުޅޭ….

އަމިއްލަ ފައިދާއަށްޓަކައި ގައުމާއި އީމާންކަން ވިއްކާލަންވެސް ފަހަކަށް ނުޖެހޭނެއެވެ. އެތެރެކޮއިލުގައިވެސް ތިބޭނީ މޫނު ރީތިކޮށްގެންތިބެނީ މުނާފިގުންނެވެ. މިއީ އަޅުގަނޑުމެން ފިލާވަޅު ލިބިގަންނަން ޖެހޭ ދަރުސްތަކެކެވެ. 

އިސްލާމީ ޙަޟާރަތު ބިންގާ ކަމުގައިވި ބަޣްދާދު ވީރާނާކޮށްލުމަށްފަހު ޚުލާގޫ ޚާންގެ ލަޝްކަރު ދެން އަމާޒުހިފީ ޝާމުކަރައިގެ ދިމިޝްގަށެވެ. ބަޣްދާދާއި ދިމިޝްގް ވީރާނާކޮށްލައި އެތަނުގެ މީހުންތައް ގަތުލުކުރަމުންދިޔަ މަންޒަރު އިސްލާމީ މުއައްރިޚުން ސިފަކޮށްފައިވަނީ ގިޔާމަތްދުވަސް އައީ ކަމަށާއި މޮންގޯލިއާގެ ލަޝްކަރަކީ ޔައުޖޫޖް މައުޖޫޖު ބާގައި މީހުން ކަމަށެވެ. އެ ބިރުވެރިކަމާއި ކުރިމަތިލެވޭނެ ގާބިލުކަމެއް ދުނިޔޭގެ އެއްވެސް ކަންކޮޅެއްގައި ހުރިކަމަކަށް ނުވިއެވެ.                                                

ޗަންގީޒް ޚާންގެ ލަޝްކަރުގެ ޙަމަލާތައް އެތައްފަހަރަކު އިންޑިއާއަށްވެސް އަމާޒުވެގެންދިޔައެވެ. އެހެންނަމަވެސް ދިއްލީގެ ސުލްތާނު އަލާއުއްދީން ޚަލްޖީގެ ރޭވުންތެރިކަމާއިއެކު މޮންގޯލުން ބަލިކޮށް އޭގެތެރޭން ވިހިހާހަށްވުރެންގިނަ މޮންގޯލުން އެ ކުރިމަތިލުންތަކުގައި މަރާލެވުނެވެ. އެއަށްފަހު އިންޑިއާއަށް މުޣަލުންގެ ރަސްކަން ފެތުރިގެންދިޔައީއެވެ.                                                           

ދިމިޝްގު ސުންނާފަތި ކޮށްލުމަށްފަހު މޮންގޯލުންގެ ލަޝްކަރު ގެ އަމާޒަކަށް ހެދީ މިސްރާއި ފަލަސްތީނެވެ. މިސްރުގައި އެޒަމާނުގައި އޮތް މަމްލޫކީ ޚިލާފަތަކީ މާބޮޑަށް ދުނިޔެއަށް ތަޢާރުފްވެސް ނުވާ ކުޑަކުޑަ ވެރިކަމެކެވެ. މިސަބަބަށްޓަކައި މޮންގޯލުންގެ ލަޝްކަރުން ޔަގީންކޮށްގެންތިބީ މަމްލޫކީން ބަލިކޮށްލުން ވަރަށް ފަސޭހައިން ނިންމާލެވިދާނެ ކަމަށެވެ. އަދި އެ ލަޝްކަރު ފަލަސްތީނާ ހަމަޔަށް ދިޔަކަން ތާރީޚުން އެނގެއެވެ.              

ދެން ފެނިގެންދިޔައީ މާތް ﷲ ގެ ތަގްދީރުގެ މައްޗަށް އެއްވެސް ފަރާތަކުން ތަދުބީރު ނުކުރެވޭނެކަމުގެ ސާފު ހެކިތަކެވެ. ޗެންގީޒް ޚާނުގެ އެހެން ކާފަ ދަރިކަލެއް ކަމުގައިވާ ވަރްކޭ ޚާން އިސްލާމްދީން ގަބޫލު ކުރައްވައި މޮންގޯލް ލަޝްކަރާ ދެކޮޅަށް މަމްލޫކީ ލަޝްކަރާ ގުޅިވަޑައިގެން ކުރެއްވި އެތަކެއް ހަނގުރާމައަށްފަހު މޮންގޯލުން ބަލިކުރައްވައި ފައްސާލެއްވީއެވެ. ދުނިޔޭގެ ތާރީޚުގައި ފުރަތަމަ ފަހަރަށް ބަޑިބޭސް ބޭނުން ކުރެވުނީ މި ހަނގުރާމައިގާ ކަމަށް ތާރީޚުން އެނގިފައި ވެއެވެ. އެހެންނަމަވެސް ބަޑިބޭސް ބޭނުންކުރެވުނީ ހަމައެކަނި ގަދަ އަޑުފައްގަނޑެއް އިއްވުމުގެ ބޭނުމުގައެވެ. އެ އަޑުފަށްގަނޑާއިއެކު މޮންގޯލުންގެ އަސްތަކަށް ބިރުވެރިކަން ގެނެސް ދިނުމަށްޓަކައެވެ. އެ ޒަމާނަކީ އަދި ބޮން އުފެއްދުމުގެ ޓެކްނޯލޮޖީ އެނގިފައިވާ ޒަމާނެއް ނޫނެވެ.                                  

މި ހަނގުރާމައަށްފަހު މޮންގޯލުން ވިއްސި ވިހާލިވެގެން ދިޔައީއެވެ. އަދި މަމްލޫކީ ޚިލާފަތު މަޑުމަޑުން ކުރިއަރަމުން އައިސް މިސްރަކީ ދުނިޔޭގެ ތަޙުޒީބާއި ތަމައްދުންގެ ދަންމަރަކަށް ވެގެން ހިނގައްޖެއެވެ. 

ތިންސަތޭކަ ވަރަކަށް އަހަރު މިސްރުގެ ޚިލާފަތު ދެމިއޮތުމަށްފަހު އުސްމާނީ ޚިލާފަތު ތުރުކީގައި ފެށިއްޖެއެވެ. އެހިސާބުން އަނެއްކާވެސް އިސްލާމީ ޙަޟާރަތުގެ ރަން ޒަމާނެއް ފެށިގެންދިޔައީއެވެ.

ޒަމާންތަކަކަށްފަހު ތުރުކީގައި އޮތް ބާރުގަދަ އިސްލާމީ ޚިލާފަތު ނިމުމަކަށް އައުމުގައިވެސް ޚިލާފަތުގެ އެތެރޭން ސިއްރިޔާތުގައި ހުޅަނގުގެ ގައުމުތަކަށް ފުރުސަތު ހޯދާދިންކަން ވަރަށް ސާފުކޮށް ތާރީޚުން އެނގެން އެބައޮތެވެ. މުސްލިމުންގެ ޚިލާފަތާއި ރަސްކަމުގައި އެންމެ ނުބައި ރޯލެއް ކުޅެފައިވަނީ ހަމަ ވެރިކަމުގެ ކޮއިލުތެރޭންނެވެ. އުސްމާނީ ޚިލާފަތެކޭ އެއްފަދައިން މުޣަލުންގެ އެމްޕަޔަރވެސް ވެއްޓިގެން ދިޔައީވެސް ހަމަ އެތެރޭގެ ސިއްރު ކޯޅުން ތަކުގެ ސަބަބުންނެވެ.                                                              

މޮންގޯލުންގެ ޑައިނާސްޓީގެ ކަޅު އަނދިރިކަން މުޅި އިސްލާމީ ދުނިޔެއަށް ފޮނުއްވި ކޯފާގެ އަޒާބަކަށްވީ ހަމައެކަނި އެންމެ މީހަކު އޭނާގެ ކިބުރުވެރިކަމާއި ބޮޑާކަން ދެއްކުމުގެ ސަބަބުންނެވެ.                              

އިލްމުވެރިންގެ ދަރުސްތަކުން އެނގޭ ގޮތުގައި އިސްލާމީ އުންމަތް ދުނިޔޭގެ ހަތަރު ބިތަށް ފުޅާވެގެން ދާނެކަމާއި އަދި ގިޔާމަތަށް ދާންދެން މި އުންމަތް ދެމިއޮންނާނެކަން މާތް ﷲ އެންގެވިހިނދު މިއުންމަތަށް އެތެރޭންނާއި ބޭރުން ކުރިމަތި ވެދާނެ ގޯނާތަކުން ރައްކާތެރިކޮށް ސަލާމަތުން ލެހެއްޓެވުންއެދި އަޅުގަނޑުމެންގެ މާތް ނަބިއްޔާ ދުޢާ ދެންނެވިކަމަށްވެއެވެ. 

އެހިނދު މިއުންމަތުގެ އެތެރޭގައި އުފެދޭނެ ފިތުނަތައް އެ މާތް ނަބިއްޔާއަށް އަންގަވައި ދެއްވިކަމަށްވެއެވެ. އެއްވެސް ޝައްކެއްނެތް ގޮތުގައި މިއުންމަތަށް ބޭރުން އަންނަ ކޮންމެ ނުރައްކަލެއްގެ ފަހަތުގައި ތިބީ އެތެރޭގެ ޚާއިނުންކަން ކޮންމެދުވަހަކު މިދަނީ ފެންނަމުންނެވެ. ފަހަކަށްއައިސް ލީބިޔާއާއި އިރާގައި އަފްޣާނިސްތާނާއި ސިރިޔާ އަކީ މީގެ ދިރިހުރި ނަމޫނާތަކެކެވެ. ނަބަވީ އިރުޝާދު ދޮގެއްނުވާނެއެވެ.          

މޮންގޯލިއަނުންގެ ޖައްބާރު ވެރިކަން އިސްލާމީ މުޖުތަމާއަށް އާންމުވެގެން ދިއުމުގައި ފިލާވަޅުތަކެއް ލިބިގަންނަން ޖެހޭކަމަށް ޢިލްމުވެރިން ވިދާޅުވެފައިވެއެވެ. ގައުމަށް ވެރިޔަކު އިޚްތިޔާރު ކުރުމުގައި މިއީ ދެނެގަންނަން ޖެހޭ މިންގަނޑު ތަކެވެ.

  ކުރިމަތީގައި ހާމަވަމުންދާ އިންސާނިއްޔަތާ ޚިލާފު ބާރުދެއްކުމެވެ. ގައުމުގެ ރައްޔިތުންނަށް ވުރެން ތިމާއާއި ތިމާގެ އައުވާނުންނަށް އިސްކަންދެމުން ގެންދިއުމެވެ. ދިވެހީންގެރާއްޖެ މިގައުމު އިސްތިސްނާއެއް ނުކުރެވެއެވެ. އަމާނާތްތެރި ވެރިޔަކު އިޚްތިޔާރުކުރުމުގައި ރައްޔިތުންވެސް އަމާނާތްތެރިވާން ޖެހޭނެއެވެ. މާތް ﷲ ގެ ކޯފާ އަތުވެދާނެކަށް ގަބޫލުކޮށް އިސްލާޙުގެ މަގު ޚިޔާރުކުރުމަށް އޮތީ ދިރިއުޅުމުގެ މަދު ދުވަސްކޮޅެކެވެ. މިއަދު ސިއްރު ކުރާކަންތައް މާދަމާ ހާމަވެ ފާޅުވެގެންދާ ހިނދު ފުރިހަމަ ޖަބާބުދާރީ ވުމަކުން ޖަވާބުދާރީ ވާން ޖެހޭނެއެވެ. 

ނިމުނީ: