ރާއްޖޭގައި ދީނުގެ އިލްމު ފެތުރެއްވުމުގައި ގިނަ ދުވަސްތަކެއް ވަންދެން މަސައްކަތް ކުރެއްވި ދީނީ އިލްމުވެރިޔާ ޝައިޚް އުޘްމާން ޢަބްދުﷲ މިއަދު އަވަހާރަވެއްޖެއެވެ.
ޝައިޚް އުޘްމާން އަވަހާރަވީ މިއަދުގެ ހެނދުނުގެ ވަގުތެއްގައެވެ.
ރާއްޖޭގައި ދީނީ ތަޢުލީމު ފެތުރުއްވުމުގައި މުހިންމު ދައުރެއް އަދާކުރެއްވި ޝައިޚް އުޘްމާނަކީ ޒަކާތާބެހޭ އޮފީހުގެ އިތުރުން ޑިޕާޓްމަންޓް އޮފް ރިލިޖަސް އެފެއާޒްގަޔާއި މިނިސްޓްރީ އޮފް ޖަސްޓިސް އެންޑް އިސްލާމިކް އެފެއާޒްގަޔާއި އިސްލާމީ ކަންތައްތަކާބެހޭ އެންމެމަތީ މަޖިލީހުގައި ދިގު މުއްދަތަކަށް ހިދުމަތް ކުރެއްވި ބޭފުޅެކެވެ.
ޝައިޚް އުޘްމާން ވަނީ ދީނީ މައުލޫމާތު ފެތުރުއްވުމަށް ޓީވީއާއި ރޭޑިއޯ ޕްރޮގްރާމްތައް މެދުވެރިކުރައްވައި ގިނަ މަސައްކަތްތަކެއް ކުރައްވައިފައެވެ.
ޝައިހް ވަނީ އޭނާގެ އުފަން ރަށް ށ.މަރޮށީގައި އޭނާގެ އާއިލީ ސްކޫލެއް ކަމުގައިވާ މަދްރަސަތުލް މުނައްވަރާގެ ކަންކަން އަމަލީ ގޮތުން ބެލެހެއްޓެވުމުގެ މަސްއޫލިއްޔަތު ވެސް އުފުއްލަވައިފައެވެ.
