ޖަލު ހުކުމެއް ތަންފީޒު ކުރައްވަމުން ގެންދަވާ ޕީޕީއެމް/ޕީއެންސީގެ ރިޔާސީ ކެންޑިޑޭޓް ރައީސް ޔާމީން ޢަބްދުލްޤައްޔޫމްގެ އިންތިޚާބީ ހައްގުތަކަކަށް ހުރަސް އެޅިފައިވާކަމަށް ބުނެ ސުޕްރީމް ކޯޓަށް ހުށަހެޅި ދުސްތޫރީ މައްސަލަ ބަލައިނުގަނެ ބޭރުކޮށްލައިފިއެވެ.

ވ.އާރަށުގެ މައްސަލާގައި ރިޝްވަތު ނެގުމުގެ ކުށުގެ ދައުވާއާއި މަނީ ލޯންޑްރިންގ ގެ ކުށުގެ ދައުވާ ސާބިތުވުމުން ރައީސް ޔާމީނަށް 11 އަހަރުގެ ހުކުމެއް އިއްވީ މިދިޔަ ޑިސެމްބަރު 25 ގައެވެ.

އެ ހުކުމް ހައިކޯޓުގައި އިސްތިއުނާފުކޮށްފައިވީ ނަމަވެސް މައްސަލަ ބައްލަވާ ފަނޑިޔާރުންގެ ބެންޗުގެ ދެ ފަނޑިޔާރަކު ޗުއްޓީއަށް ވަޑައިގެންނެވުމުން މައްސަލަ އޮތީ މަޑުޖެހިފައެވެ. މި މައްސަލަ ނުނިމި ދިގުލައިގެންދިއުމުގެ ސަބަބުން ރައީސް ޔާމީންގެ އެތަކެއް އަސާސީ ހައްގުތަކާއި އިންތިޚާބީ ހައްގުތަކަކަށް ހުރަސް އެޅިފައިވާތީ އެ ހައްގުތައް ކަށަވަރުކޮށްދިނުމަށްޓަކައި ރައީސް ޔާމީންގެ ފަރާތުން ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއް ހުށަހެޅިކަން ޔާމީންގެ ގާނޫނީ ޓީމުން ހާމަކުރައްވާފައިވަނީ ރޭގައެވެ.

މި މައްސަލައާ ގުޅިގެން ސްޕްރީމް ކޯޓުގެ ރަޖިސްޓްރާ ނިންމެވި ނިންމެވުމުގައި ބުނެފައިވަނީ މިއީ ކޯޓުގެ ގާނޫނު ބަޔާންކުރާފަދަ ދުސްތޫރީ މައްސަލައެއް ނޫންކަމަށާއި އެހެންވެ މި މައްސަލަ ބަލައިގަނެެވެން ނެތް ކަމަށެވެ.

ރަޖިސްޓްރާގެ މި ނިންމުން ފަނޑިޔާރުންގެ މަޖިލީހުގައި އިސްތިއުނާފު ކުރެވިދާނެއެވެ. ނަމަވެސް މިކަމާ ގުޅޭ ގޮތުން ޔާމީންގެ ގާނޫނީ ޓީމުން އަދި ވަކި އެއްޗެއް ވިދާޅެއްނުވެއެވެ.