ރައީސް އިބްރާހީމް މުޙައްމަދު ޞާލިޙުގެ ވެރިކަން ނިންމުމުގައި ރައީސް ޔާމީން ޢަބްދުލްޤައްޔޫމަކީ ޕާޓީތަކުން އެއްބަސްވެވަޑައިންނަވާ ކެންޑިޑޭޓް ކަމުގައި ހަމަޖެއްސެވުމަކީ އެ ޕާޓީން އެދޭ ގޮތްކަމަށް ޕީޕީއެމްއިން މިއަދު ބުނެފިއެވެ.

ޕީޕީއެމްއާއި ވާހަކަ ދައްކައިގެން ހުރިހާ ޕާޓީތަކުބް އެއް ކެންޑިޑޭޓަކު ނެރެން ދަ ޑިމޮކްރެޓްސްއާއި ޖުމްހޫރީ ޕާޓީއާއި އެމްއެންޕީން މިއަދު ވަނީ މަޝްވަރާކޮށްފައެވެ.

ޕީޕީއެމްއިން ބުނީ ރައީސް ޞާލިޙްގެ ވެރިކަން ނިންމުމުގައި ޕާޓީތަކުން ގުޅިގެން ކުރައްވަމުން ގެންދަވާ މަސައްކަތަށް އެ ކޯލިޝަނުން މަރުހަބާ ކިޔައި ޝުކުރު ދަންނަވާ ކަމަށެވެ.

ނަމަވެސް ރައީސް ޔާމީން ޢަބްދުލްޤައްޔޫމަކީ ޕާޓީތަކުން އެއްބަސްވެވަޑައިންނަވާ ކެންޑިޑޭޓް ކަމުގައި ހަމަޖެއްސެވުމަކީ އެ ޕާޓީން އެދޭ ގޮތްކަމަށް ޕީޕީއެމްއިން ބުންޏެވެ.

ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓަކީ ރައީސް ޔާމީން ކަމުގައި ނިންމާފައިވާއިރު ރިޔާސީ ޓިކެޓް ވެސް ވަނީ އަރުވާފައެވެ.

ޕީޕީއެމްއިން ބުނީ މިއަހަރުގެ ރިޔާސީ އިންތިޚާބު ކާމިޔާބު ކޮށްދިނުމަށްޓަކައި ކުރަން ޖެހޭ މަސައްކަތްތައް އެ ކޯލިޝަންގެ ފަރާތުން މާލެއާއި އަތޮޅުތަކުގައި ބާރަށް ކުރިއަށް އެބަ ގެންދާ ކަމަށެވެ.