އާބަންކޯއިން މުވައްޒަފުންނަށް ދޫކުރާ ފުލެޓުތަކުގެ ތެރެއިން 34 ފްލެޓެއް އެ ކުންފުނީގެ ވެރިންނަށް ދޭން ނިންމާފައިވާ ކަމަށް ބުނެ މީސްމީޑިއާގައި ދައުރުވަމުންދާ ލިސްޓަކީ ސައްހަ ލިސްޓެއް ނޫނ ކަމަށް އެ ކުންފުނިން ބުނެފިއެވެ.
ހުޅުމާލޭގައި އަމިއްލަ ފަރާތްތަކުން އިމާރަތްކޮށްފައިވާ މިކްސް ރެޒިޑެންޝަލް ޔުނިޓުތަކުން ބައެއް ފްލެޓް އާބަންކޯގެ މުވައްޒަފުންނަށް ވިއްކަން ހުޅުވައިލާ ކަމަށް ބުނާ މެމޯއަކާއި އެ ކުންފުނީގެ ބޯޑު މެންބަރުންނާއި, ޑިރެކްޓަރުންނާއި, މެނޭޖަރުންތަކެއް ހިމެނޭ ލިސްޓެއް މީގެ ދެ ދުވަސް ކުރިން ފެށިގެން މީސްމީޑިއާގައި އަންނަނީ ދައުރުވަމުންނެވެ.
އެ ލިސްޓަކީ ސައްހަ ލިސްޓެއް ނޫން ކަމަށް ބުނެ އާބަންކޯއިން މިއަދު ނެރުނު ބަޔާނެއްގައި ބުނީ މިދިޔަ އަހަރު ކުރިއަށް ގެންދިޔަ ސްޓާފް ހައުސިންގ ސްކީމްގެ ދަށުން ބައެއް ފްލެޓުތައް ވިއްކައިލަން ހުޅުވާލައިފައިވާ ކަމަށާއި ކުރިމަތިލި ފަރާތްތަކަށް ފުރުސަތުދީ ނިމުނުއިރު 34 ޔުނިޓެއް ނުވިކި ބާކީވެފައިވާ ކަމަށެވެ.
އާބަންކޯއިން ބުނީ ހައުސިންގ ސްކީމަށް ހުޅުވައިލި ފަހުން އަހަރެއްވެފައިވާ ކަމަށާއި ސްކީމަށް ކުރިމަތިލުމަށް ފުރުސަތު ނުލިބޭ ގިނަ މުވައްޒަފުންތަކެއް މިހާރު ވެސް އެބަތިބި ކަމަށެވެ.
އެހެންވެ އެ 34 ފްލެޓަށް ކުރިމަތިލުމުގެ ފުރުސަތު އަލުން ހުޅުވާލައިފައިވާ ކަމަށާއި މި 34 ފްލެޓް ގަތުމަށް 800 އަށްވުރެ ގިނަ މުވައްޒަފުން ޝަރުތު ހަމަވާ ކަމަށް ވެސް އާބަންކޯއިން ބުންޏެވެ. އަދ މިއީ ވަކި އުސޫލުތަކެއްގެ ދަށުން ވިއްކާ ފުލެޓުތަކެއް ކަމަށް ވެސް އާބަންކޯއިން ބުންޏެވެ.
އާބަންކޯއިން ބުނީ އެ ކޯޕަރޭޝަންއިން ނެރުނު މެމޯއާއި ޔުނިޓުތަކުގެ އަގުތަކާއެކު އެ ކޯޕަރޭޝަންގެ އިސް ވެރިންގެ ލިސްޓެއް ކަމަށް ބުނެ އަމިއްލައަށް ތައްޔާރުކޮށްފައިވަނީ ސައްހަ ނޫން ލިސްޓެއް ކަމަށެވެ. އަދި ދޮގު ޚަބަރާއި މައުލޫމާތު ފޯރުކުރަމުންދަނީ ކަމުގެ ހަގީގަތް އޮޅުވައިލާ ކުންފުނީގެ އަގު ވައްޓައިލުމަށް ކަމަށް ވެސް އާބަންކޯއިން ބުންޏެވެ.
އާބަންކޯއިން ބުނި ގޮތުގައި އާންމުންނާ ގުޅިފައި ހުންނަ މިފަދަ މަސައްކަތްތައް ބައްޓަންކުރެވިފައިވަނީ ވީހާވެސް ހާމަކަން ބޮޑުކޮށް ކަނޑައެޅިފައިވާ އުސޫލުތަކާއި ގަވާއިދުތަކުގެ ތެރެއިންނެވެ.
One Response
ނަންބޯޑު ބަދަލުކޮށްލާފަ ބާރަށް ކުރިއަށް. ތި ލިސްޓަށްވާގޮތެއްވެސް އެނގޭނެއެވެ. ތިކުންފުނިން ދިވެހީންގެ ބިންތައް ވިއްކާލާ ބަހާ ދިވެހިންގެ ބިންވެރިކަން ބޮޑެތި މަހުޖަނުންގެ ވިޔާފާރިއަކަށް ހަދާ ނިންމާލާނެ. އަދި ކުންފުނި ދަރުވާލާފާ ބޭރުބަޔަކަށް ބޮޑު ޝެއަރއެއް ވިއްކާލާނެ. ވައްތަރީ މިސަރުކާރު 2023 ގައި ބަދަލު ނުވިއްޔާ އިންޑިޔާބަޔަކަށްހެން ވިއްކާލާނީ. ދެން ބަލަމާދޯ؟