ގެއްލިގެން ހޯދަން އިއުލާނުކުރި ކ. މާލެ/ހ.ކޯލީފްލާވަރ, އަޙްމަދު ނާޝިދު (46އ) ފެނިއްޖެއެވެ.
ފުލުހުން މިއަދު ވިދާޅުވީ މި މަހުގެ 15 ވަނަ ދުވަހުން ފެށިގެން ވީނުވީއެއް ނޭނގި ނާޝިދު ގެއްލިގެން އޭނާގެ އާއިލާއިން ފުލުހުންނަށް ރިފޯޓްކޮށްފައިވަނީ މި މަހުގެ 19 ވަނަ ދުވަހު ކަމަށެވެ.
ނަމަވެސް ނާޝިދު ހޯދުމަށްޓަކައި މިހާތަނަށް ފުލުހުން ކުރި މަސައްކަތުން ފެނިފައިނުވާތީ ފުލުހުން އޭނާގެ ފޮޓޯ އާންމުކުރީ މިއަދު 11:47 ގައެވެ.
އޭގެ ތިންގަޑިއިރު ފަހުން ފުލުހުން ވިދާޅުވީ ނާޝިދު މިހާރު ފެނިފައިވާ ކަމަށެވެ. ނަމަވެސް ފެނުނީ ކޮން ތަނަކުން ކަމެއް އަދި އޭނާ މިދިޔަ ދުވަސްތަކުގައި އުޅުނީ ކޮން ތަނަކު ކަމެއް ފުލުހުން ހާމައެއްް ނުކުރައްވައެވެ.
ގެއްލިގެން ހޯދަމުންދާ މީހުންގެ ފޮޓޯ އާންމު ކުރުމުން ގިނަ ފަހަރު އެ މީހަކު އެނބުރި ގެއަށް އާދެއެވެ.
މީގެ ތިން ދުވަސް ކުރިން ވިލިމާލެއިން ވެސް 13 އަހަރުގެ ކުއްޖަކު ގެއްލިގެން ހޯދަން އިއުލާނުކުރިއެވެ. އޭގެ އަނެއް ދުވަހު އެ ކުއްޖާ ވަނީ ފެނިފައެވެ.
މާލެއިން 15 އަހަރުގެ ކުއްޖަކު ގެއްލިފައިވާތީ ފުލުހުން އަންނަނީ އެ ކުއްޖާ ހޯދުމުގެ މަސައްކަތް ވެސް ކުރަމުންނެވެ. ނަމަވެސް އެ ކުއްޖާ އަދި ފެނިފައެއް ނުވެއެވެ.
