ހިޔާ ފްލެޓު ސަރަހައްދުގައި މަސައްކަތް ކުރަމުން ދަނިކޮށް ފެން ހޮޅިއަކަށް ގެއްލުންވެ، ހިޔާގެ ބައެއް ޓަވަރުތަކުން ފެނުގެ ހިދުމަތް މެދުކެނޑިއްޖެއެވެ.
މިއަދު ހަވީރުން ފެށިގެން ހިޔާގެ ހަތަރު ޓަވަރަކުން ވަނީ ފެނުގެ ހިދުމަތް ކެނޑިފަ އެވެ.
ފެނުގެ ހިދުމަތް މެދުކެނޑިފައިވަނީ އެޗް-3، އެޗް-4، އެޗް-7 އަދި އެޗް-8 އިންނެވެ.
އެމްޑަބްލިޔުއެސްސީން ބުނީ، ހިޔާގެ ބައެއް ޓަވަރުތަކުން ފެނުގެ ހިދުމަތް މެދުކެނޑުނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން
އެ ސަރަހައްދުގެ މަގު ހެދުމުގެ މަސައްކަތް ކުރަނިކޮށް، ފެން ހޮޅިއަކަށް ގެއްލުން ލިބިގެން ކަމަށެވެ.
ހިޔާގެ ބައެއް ޓަވަރުތަކުން ފެނުގެ ހިދުމަތް މެދުކެނޑިފައިވާއިރު، މައްސަލަ ހައްލުކޮށް ފެނުގެ ހިދުމަތް އަލުން ދިނުމަށް އެމްޑަބްލިޔުއެސްސީން އަންނަނީ މަސައްކަތް ކުރަމުންނެވެ.
