ބައިނަލްއަގުވާމީ ދުނިޔޭގައި އަބަދުވެސް އެންމެ އަޑުހަރުކޮށް ދެކެވޭ އެއްވާހަކައަކީ ނޫސްވެރިކަމުގެ މިނިވަންކަމުގެ ވާހަކައެވެ. ދުނިޔޭގައި ނަގާކިޔާ ހުރިހާ ގައުމަކުންވެސް އަންނަނީ ނޫސްވެރިކަން ކުރިއަރުވައި އެ ގައުމަކުން ނޫސްވެރިކަމަށް އިސްކަންދޭ މިންވަރު އެހެން ގައުމުތަކަށް އަންގައިދިނުމަށް މަސައްކަތްކުރަމުންނެވެ. އަދި އެހެން ގައުމަކުން ނޫސްވެރިކަމަށް ހުރަސްއަޅައިފި ކަމުގެ ޚަބަރެއް ފެތުރިއްޖެނަމަ އެ ކަމެއް ކުށްވެރި ކުރުމަށްވެސް މިފަދަ ގައުމުތަކުން އިސް ސަފުގައި ބައިވެރިވެއެވެ. ނަމަވެސް މިއަދު ވިސްނާލަންޖެހޭ އެންމެ މުހިންމު އެއް ސުވާލަކީ މިފަދަ ގައުމުތަކުގެ ބަހާއި އަމަލާ ދިމާވޭތޯއެވެ.

މިނިވަން ނޫސްވެރިކަމަކީ ކޮންމެ ގައުމެއްގެ ވެސް ހާލަތު ރައްޔިތުންނާއި ހިއްސާކުރުމަށް ބޭނުންކުރެވޭ މައިގަނޑު އެއްބާރެވެ. ގައުމުގެ ވާނުވާ ރައްޔިތުންނާ ހަމައަށް ފޯރުކޮށްދީ ރައްޔިތުންނަށް ގައުމުގެ ހާލަތު އަންގައިދިނުމުގެ ދައުރު އަދާކުރާ އާރުކާޓީއެވެ. ޑިމޮކްރަސީގެ ނަޒަރުން ބަލާއިރު މީޑިޔާއަކީ ޑިމޮކްރަސީގެ މުހިއްމު ހަތަރު ތަނބުގެ ތެރެއިން އެއް ތަނބެވެ. އެއީ އެޔާއި ނުލައި ޑިމޮކްރަސީއެއް އެންމެ ފުރިހަމަ ގޮތުގައި ގާއިމު ނުކުރެވޭނެ ފަދަ މުހިންމު ބަހާއެކެވެ. ނަމަވެސް ޑިމޮކުރަސީ ކުރިއެރުވުމަށް މަސައްކަތްކުރަމުންދާ އިރު ދުނިޔޭގެ އެކި ކަންކޮޅުތަކުން ފެންނަމުން ދަނީ މީޑިޔާއަށް ފާޅުގައްޔާއި ސިއްރިއްޔާތުގައި ތަފާތު ގޮތްގޮތުން ފިތްތުންތައް މެދުވެރިކުރާ މަންޒަރެވެ.

ޗައިނާގެ ހާލަތު

މިނިވަން މީޑިޔާއެއް ގާއިމު ކުރުމަށް ހުރަސް އަޅާ ގައުމެއްގެ ގޮތުގައި ލޭބަލު ކުރެވޭ އެންމެ މަޝްހޫރު އެއް ގައުމަކީ ޗައިނާއެވެ. ޗައިނާގައި 1.4 ބިލިއަން ރައްޔިތުންގެ އާބާދީއެއް އޮވެއެވެ. ޗައިނާއަކީ ދުނިޔޭގެ އެންމެ އާބާދީ ބޮޑު ގައުމެވެ. ފަހަކަށްއައިސް ޗައިނާއާ ގުޅުވައިގެން ދެކެވެމުންދާ އެންމެ ބޮޑު އެއް ވާހަކައަކީ ހޮންގްކޮންގްގެ މިނިވަން ނޫސްވެރިކަމަށް ޗައިނާއިން ހުރަސްއަޅަމުން އަންނަ ވާހަކައެވެ.

ޗައިނާއިން ވަނީ އެގައުމުގެ ބާރުގެ ދަށުގައިވާ ހޮންގްކޮންގްގެ މިނިވަން ގިނަ މީޑިޔާތަކެއް ފުލުހުން ނެރެގެން ބަންދުކޮށްފައެވވެ. ހޮންގްކޮންގްގެ މަޝްހޫރު ނޫހެއް ކަމަށްވާ ”އެޕަލް ޑެއިލީ“ ވެސް ވަނީ ވަރަށްފަހުން ބަންދު ކުރެވިފައެވެ. ”އެޕަލް ޑެއިލީ“އަކީ ކޮމިއުނިސަމާ ފާޅުގައި ދެކޮޅުހަދާ ޑިމޮކްރަސީ ޕްރޮމޯޓްކުރުމުގެ އިސް ސަފުގައި ހަރަކާތްތެރިވި މަގުބޫލު ނޫހެކެވެ. ނަމަވެސް ޖޫން 18ގައި އެޕަލް ”ޑެއިލީ“ގެ އޯނަރާއި އިތުރު 5 ސްޓާފުން ވަނީ ހައްޔަރުކޮށްފައެވެ. އެ ހާދިސާއަށްފަހު ”އެޕަލް ޑެއިލީ“ ވަނީ ބަންދުކުރަން މަޖުބޫރުވެފައެވެ. މި މީހުން ހައްޔަރުކޮށްފައި ވަނީ ”އެޕަލް ޑެއިލީ“ގެ މައި މަރުކަޒަށް 500 ފުލުހުން ވަދެ ހިންގި އޮޕަރޭޝަނެއްގައެވެ. ”އެޕަލް ޑެއިލީ“ 1996ވަނަ އަހަރު އުފެއްދުމަށް ފަހު އެ ނޫހުގެ ފައުންޑަރު، ޖިމީ ލައި ވެފައި ވަނީ ޗައިނާ ސަރުކާރަށް ހުރި ބޮޑު ގޮންޖެހުމަކަށެވެ. އޭނާ ވަނީ ތަކުރާރުކޮށް އެތައް ފަހަރެއްގެ މަތިން ޗައިނާއާ ދެކޮޅު ޕްރޯ-ޑިމޮކްރަސީއަށް އެއްބާރުލުންދީ ގިނަ ލިޔުންތަކެއްވެސް ޝާއިޢުކޮށްފައެވެ.

ޖިމީ ލައި ހައްޔަރު ކުރުމަށްފަހު ޗައިނާއިން ވަނީ ކުދި މިނިވަން މީޑިޔާ ތަކަށް މިސްރާބު ޖަހާފައެވެ. މިގޮތުން ”ސިޓިޒެން ޑެއިލީ“ އަދި ”ސްޓޭންޑް ޑެއިލީ“ ވެސް ވަނީ ދާދި ފަހުން ބަންދުކުރަން މަޖުބޫރުކޮށްފައެވެ. މި ދެ ނޫހަކީ ”އެޕަލް“ ނޫހުން ނަމޫނާ ބަލައިގަނެގެން ޕްރޯ ޑިމޮކްރަސީ ހަރަކާތްތަކަށް އެއްބާރުލުންދީ އެފަދަ ޚަބަރުތައް ގިނައިން ޝާއިޢުކޮށް ހަދައިފައިވާ ދެ ނޫހެވެ.

މިނިވަން މީޑިޔާތަކަށް ކުރިމަތިވެފައިވާ މި ހާލަތާ ގުޅިގެން ލޯކަލް މީޑިޔާތަކުން ވަނީ ޕްރޯ-ޑިމޮކްރަސީ ޚަބަރުތައް ލިޔުމަށް ޖެހިލުންވެފައެވެ. އަދި މިފަދަ ޚަބަރުތައް ލިޔެ އުޅުނު ގިނަ ނޫސްވެރިން ވަނީ އެމީހުންގެ ޚަބަރުތައް ޕަބްލިޝް ކުރާނެ ފަރާތެއް ނެތި ވަޒީފާ ގެއްލިފައެވެ. އަދި ޕްރޯ-ޑިމޮކްރަސީ އަށް ތާއީދު ކުރާ ގިނަ ނޫސްވެރިން ތިބީ ޖަލުގައެވެ. މި ފަދަ ސަބަބުތަކާ ގުޅިގެން ޗައިނާގެ ދަށުގައިވާ މީޑިޔާތަކުގެ އަޑު ވަނީ ގަދަވެފައެވެ. ހޮންގްކޮންގްގެ ގިނަ އަދަދެއްގެ ނޫސްވެރިން ބުނާ ގޮތުގައި މިހާރު ލިޔެވެމުން މި ދަނީ ހޮންގްކޮންގްގެ މިނިވަން ނޫސްވެރިކަމުގެ ފަހު ސަފުހާތަކެވެ. މިކަމަށް ފާޑުކިޔައި އެމެރިކާގެ އިތުރުން ބައެއް ހުޅަނގުގެ ގައުމުތަކުން ވަނީ ޗައިނާ ކުށްވެރިކޮށްފައެވެ. ނަމަވެސް ޗައިނާގެ ގިނަ ނޫސްވެރިން ދެކޭ ގޮތުގައި އެމެރިކާ އަދި ހުޅަނގުގެ ގައުމުތަކުން ޗައިނާއަށް ނަސޭހަތް ދެވޭވަރަށް ވުރެ އެ ގައުމުތަކުގެ ހާލަތު މާ ގޯހެވެ.

”ނޫސްވެރިއެއްގެ ހައިސިއްޔަތުން ހޮންގް ކޮންގްގެ ނޫސްވެރިންނަށް މިއަދު ދިމާވެފައިވާ ހާލަތާ މެދު ނުތަނަވަސްކަން އިހުސާސް ކުރެވޭ. ނަމަވެސް އެމެރިކާ އަދި އެމެރިކާގެ ބާރުގެ ދަށުގައިވާ ގައުމުތައް ފަދަ ދެފުށް ދެގޮތް ފަރާތްތަކަކުން މިކަމާ ބެހޭގޮތުން ދޭ ނަސޭހަތްތައް އަޑުއަހާކަށް ބޭނުމެއް ނޫން.“ ސައުތް ޗައިނާ ”މޯނިންގް ޕޯސްޓް“ގެ ޗީފް އެޑިޓަރު، ޔޮންޑެން ލަޓޫ ބުނެފައިވެއެވެ.

އެމެރިކާގެ ހާލަތު

އެމެރިކާގެ ޑިމޮކުރަސީގައި މީޑިއާއަށް ދެވިފައިވަނީ މަތީ މަގާމެކޭ އެމީހުން ބުނެ އުޅެއެވެ. އެކަމަކު އެކަން އެގޮތަށް އޮންނަނީ އެމީހުން ރުހޭ ހާލަތްތަކުގައެވެ. މިކަމުގެ އެންމެ އަލިގަދަ ހެއްކަކީ ”ވިކިލީކުސް“ގެ ބާނީ ޖޫލިއަން އަސާންޖް ގެ މައްސަލައިގައި އެމެރިކާއިން އަމަލު ކުރަމުންދާ ގޮތެވެ. އިނގިރޭސި ވިލާތުގައި ކުރިޔަށް ގެންގޮސްފައިވާ ޖޫލިއަން އަސާންޖްގެ މައްސަލައަކީ ގިނަ ބަޔެއްގެ ފާޑުކިޔުން އަމާޒުވެފައިވާ މައްސަލައެކެވެ. ގިނަ ނޫސްވެރިން ބުނާ ގޮތުގައި އަސާންޖް ކޮށްފައިވާ ހަމައެކަނި ކުށަކީ އެމެރިކާގެ ޖަރީމާތައް ފާޅުކުރުމެވެ.

އޮސްޓްރޭލިއާގެ ނޫސްވެރިއެއް ކަމަށްވާ ޖޫލިއަން އަސާންޖްއަށް މިއަދު އެމެރިކާއިން ކުރިމަތި ކުރަމުން ދަނީ ނުރައްކާތެރި ހާލަތެކެވެ. މުޖުތަމުއުގެ ކުރިމަތީގައި ޖޫލިއަން އަސާންޖްގެ އަބުރާއި އިއްޒަތަށް އެމެރިކާއިން އަދިވެސް ދަނީ އަރައިގަންނަމުންނެވެ. މި ހުރިހާކަމެއް އަސާންޖްއަށް ކުރުމުގެ ސަބަބަކީ އޭނާ ހަގީގަތް ހާމަކުރުމެވެ. އޭނާ ވަނީ އިރާގާއި އަފްޣާނިސްތާނުގައި އެމެރިކާއިން ކޮށްފައިވާ ޖަރީމާތައް ހާމަކޮށްފައެވެ. މީގެއިތުން އެމެރިކާއިން އަފްޣާނިސްތާނާއި އިރާގުގެ ކުށެއްނެތް ރައްޔިތުންނާއި އެތައް ނޫސްވެރިން މެރިކަން ވަނީ ފަޅާއަރުވާލާފައެވެ. ހަމައެފަދައިން ގުއަންޓަނަމޯގައި ތިބި އަސީރުންނަށް އެމެރިކާއިން ކުރާ އަނިޔާތައް ދުނިޔެއަށް ތިލަކޮށް ދިނީ އޭނާއެވެ. އަދި މީގެއިތުރުން ވޮޝިންގްޓަނުން ޔަމަނާ ދެކޮޅަށް ސިއްރުގޮތެއްގައި ކުރިޔަށްގެންދާ ހަނގުރާމަވެސް އަސާންޖް ވަނީ ދުނިޔޭގެ ސަމާލުކަމަށް ގެނެސްފައެވެ. މި ހުރިހާ ކަމަކީ އެމެރިކާގެ ސިއްރު ރެކޯޑްތަކުން އެއްވެސް ޝައްކެއް ނެތް މިންވަރަށް ހާމަވާން ހުރި ކަންކަމެވެ. ހަމައެކަނި މައްސަލައަކީ މިނިވަން ނޫސްވެރިކަމުގެ ތެރެއިން އަސާންޖު އެތަކެތި ދުނިޔެއަށް ހާމަކުރި ކަމެވެ. އެމެރިކާ ފަޟީޙަތްކޮށްލުމެވެ.

އަސާންޖް އެ މައުލޫމާތުތައް ހާމަ ކުރުމާ ގުޅިގެން އެމެރިކާއިން ވަނީ އެކަމާ ހިތްހަމަނުޖެހި ބަދަލު ހިފުމުގެ ގޮތުން ބައިނަލްއަގުވާމީ ފެންވަރުގައި އަސާންޖްގެ އަގު ވައްޓާލުމަށް މަސައްކަތް ކޮށްފައެވެ. މި މަސައްކަތުގައި އޮސްޓްރޭލިއާއި އިނގިރޭސިވިލާތް ފަދަ ގައުމުތަކުގެ އެހީ އެމެރިކާއިން ވަނީ ހޯދާފައެވެ.

އަސާންޖް ވަނީ ލަންޑަނުގައި ހުރި އެކުއަޑޯގެ އެމްބަސީގައި 7 އަހަރު ދުވަސް ވާނދެން ރެފިއުޖީއެއްގެ ގޮތުގައި ދިރިއުޅެފައެވެ. އެއަށްފަހު އިނގިރޭސިވިލާތުގެ ސިފައިން ވަނީ އޭނާ އެތަނުން ނެރެ ޓެރަރިސްޓުންނާއެކު މެކްސިމަމް ސެކިއުރިޓީ ޖަލަކަށް ލާފައެވެ.

ޖަލަށްލެވުނުތާ 3 އަހަރު ފަހުން އެއްވެސް ބަރުދަނެއްނެތް ކުށްތަކެއް އަސާންޖްގެ ބޮލުގައި އެޅުވުމަށްފަހު އިނގިރޭސިވިލާތުން ވަނީ އަސާންޖް އެމެރިކާއަށް ފޮނުވޭނެ މަގުތައް ފަހި ކޮށްދީފައެވެ.

ބައެއް ގައުމުތަކުގެ ސަރުކާރުތައް ގުޅިގެން ވަނީ ގިނަ ސްޓްރޯކްތަކެއް ޖެހިފައިވާ، ނަފްސާނީ ބަލިތައް ހުންނަ، އަމިއްލައަށް މަރުވާން އުޅޭ މީހެއްގެ ގޮތުގައި އަސާންޖް ސިފަކޮށް ބަދުނާމުކޮށްފައެވެ.

ފަހުން ލިބިފައިވާ ބައެއް މައުލޫމާތުތަކުން އެނގޭ ގޮތުގައި އެމެރިކާގެ ސީއައިއޭއިން ވަނީ އަސާންޖް ލަންޑަނުގައި ހުއްޓާ މަރާލުމަށް ވެސް ރާވާފައެވެ.

މިހުރިހާކަމެއް ހިނގަމުން ދާއިރު އަސާންޖްގެ އުފަން ގައުމު ކަމުގައިވާ އޮސްޓްރޭލިއާގެ ސަރުކާރުން އޭނާގެ ދިފާއުގައި އެންމެ ބަހެއްވެސް ބުނެފައެއް ނުވެއެވެ. އެ ހުރިހާ ގައުމަކުން ވަގުތު ހޭދަ ކުރަނީ ހޮންގް ކޮންގްގެ ނޫސްވެރިންނަށް ކުރިމަތިވެފައިވާ ދަތި ހާލަތުގެ ވާހަކަ ދެއްކުމަށެވެ. ޗައިނާއިން މިނިވަން ނޫސްވެރިކަމަށް ހުރަސްއަޅާކަން ހާމަ ކުރާށެވެ.

އެމެރިކާގެ މަޝްހޫރު ނޫސްވެރިއެއް ކަމަށްވާ ކްރިސް ހެޖްސް ބުނެފައިވާ ގޮތުގައި ”ޖޫލިއަން އަސާންޖް ވަނީ އެމެރިކާ އާ ދެކޮޅަށް ކުރެވޭނެ އެންމެ ބޮޑު ކުށް ކޮށްފައި. އޭނާ ވަނީ މި އެމްޕައަރގެ ކުށްތައް ފާޅުކޮށްފައި. އޭނާ ވަނީ އެމްޕައަރގެ ދޮގުތަކާއި އިންސާނިއްޔަތަށް އަޅާނުލާ މިންވަރާއި ކޮރަޕްޝަން ފާޅުކޮށް ލިޔެފައި. ރިޕަބްލިކަނެއް ނުވަތަ ޑިމޮކްރެޓްއެއް ވިޔަސް، ކޮންޒަވެޓިވްއެއް ނުވަތަ ލޭބާރއެއް ވިޔަސް، ޓްރަމްޕްވިޔަސް ބައިޑަންވިޔަސް މި ކަމަކަށް ބަދަލެއް ނާންނާނެ. އެމަޕައަރގެ އިސްމަގާމުތަކުގައި ތިބޭ މީހުން އުނގެނިފައި ވަނީ އެއްފޮތަކުން. އެމްޕައަރ ތަކަށް ގެއްލުންދޭ ފަރާތްތައް މަރާލާން.“

ހުޅަނގުގެ މަޝްހޫރު ނޫސްވެރިއެއް ކަމުގައިވާ ޖޯޖް ކެލޮވޭ ބުނެފައިވާ ގޮތުގައި ”ޖޫލިއަން އަސާންޖްއަކީ ޗައިނާގެ ނޫސްވެރިއެއްނަމަ އޭނާއަށް މިހާރު ނޮބެލް ޕްރައިޒް ލިބި، ހިއުމަން ރައިޓްސް ޑޭގައި އޭނާގެ ނަން ފާހަގަ ކުރެވޭނެއެވެ. އެމެރިކާގެ ބަދަލުގައި ޗައިނާގެ ކުށްތައް އޭނާ ފާޅުކުރި ނަމަ ބޮއިކޮޓް ވިންޓާ އޮލިމްޕިކްސް ކެމްޕޭނުގެ ޕޯސްޓާ މީހާއަށްވެސް ޖޫލިއަން ވެގެންދިޔުމުގެ ފުރުސަތު ބޮޑުވެ.“

އެމެރިކާގެ ނުފޭޒު ގަދަ މީހުން ވަނީ އެމީހުންނަށް ފައިދާވާ ގޮތަށް ނޫސްވެރިކަމުގެ މިނިވަންކަން މާނަކޮށް ނެޝަނަލް ސެކިއުރިޓީގެ ނަމުގައި ކޮންޓްރޯލް ކޮށް އެޔަށް ”އިންސާފު“ގެ ނަން ދީފައެވެ. އެމީހުން ނުރުހޭ ބަޔަކު ހަމަ އެފަދައިން ކަންކަން ކުރުމުން އެޔަށް ހައްގުތަކުން މަހުރޫމު ކުރުމޭ ކިޔައެވެ.

ނޫސްވެރިކަމަށް ބޮޑެތި ހިދުމަތްތަކެއް ކޮށްފައިވާ ޖޫލިއަން އަސާންޖްއަށް އެމެރިކާއިން ދެމުންދާ އަނިޔާތަކަކީ ލަދުގަންނަންޖެހޭ ބިރުވެރި ކަންތައްތަކެކެވެ. ގިނަ ބަޔަކު ދެކޭ ގޮތުގައި އަސާންޖް މިނިވަން ކުރުމަށް ދާނދެން އެމެރިކާއާއި، އިނގިރޭސިވިލާތާއި އޮސްޓްރޭލިޔާ އަދި އެ ގައުމުތަކާ އެއްބައިވާ ފަރާތްތަކުން އިންސާނީ ހައްގުތަކާ ބެހޭ ގޮތުން ވާހަކަ ދެއްކުމުގެ އެއްވެސް ފުރުސަތެއް ނޯންނާނެއެވެ.

ސައުދީގެ ހާލަތު

އަރަބި ދުނިޔޭގައި ބަސްކިޔާ އެންމެ މަޝްހޫރު ގައުމަކީ ސައުދީ އަރަބިޔާއެވެ. މި ގައުމު ސިފަކުރެވިފައި ވަނީ ޑިމޮކްރެސީއާ މިނިވަން ނޫސްވެރިކަމަށް ވަރަށް ބީރައްޓެހި ގައުމެއްގެ ގޮތުގައެވެ. މިކަން އެންމެ ރަނގަޅަށް ހާމަވެގެން ދިޔައީ މަޝްހޫރު ނޫސްވެރިޔާ ޖަމާލް ޚަޝޯގީ ތުރުކީގައި ހުންނަ ސައުދީ އެމްބަސީގައި ކުދި ކުދިކޮށް ކޮށާލައި ވިރުވާލި ހާދިސާއިންނެވެ.

ޖަމާލް ޚަޝޯގީއަކީ ސަޢުދީގެ ޝާހީ އާއިލާއަށް ފާޑުކިޔައި އެމީހުންގެ ކަންކަން ހާމަކުރަމުން ދިޔަ ނޫސްވެރިއެކެވެ. އޭނާ ވަނީ 2017ވަނަ އަހަރު ސައުދީއިން ފިލައިގެން ގޮސްފައެވެ. އަދި ސައުދީއިން ބޭރުގައި ހުރެ ސައުދީ ޝާހީ އާއިލާއާ ބެހޭ ގިނަ މައުލޫމާތުތަކެއް އޭނާވަނީ ހާމަކޮށްފައެވެ. ޚަޝޯގީ މަރާލުމުގެ ހާދިސާ ތުރުކީން ތަހުގީގު ކުރަމުން ދިޔައިރު އެކަމަށް އެއްބާރުލުން ދީ މިނވަން ނޫސްވެރިކަމަށް ތާއީދު ކުރާ އެމެރިކާ ފަދަ ގައުމުތަކުން އެކަށީގެންވާ މަސައްކަތެއް ކޮށްފައެއް ނުވެއެވެ.

ރަޝިޔާގެ ހާލަތު

ރަޝިޔާއަކީ ވެސް މިނިވަން ނޫސްވެރިކަމަށް ހުރަސްއަޅާކަމަށް ދުނިޔޭގެ ގައުމުތަކުން ސިފަކުރާ ގައުމެކެވެ. ރަޝިޔާގެ މިނިވަން ނޫސްވެރިކަމަށް ނަޒަރު ހިންގާލާއިރު ޕުޓިންގެ ރިޔާސީ ދައުރު ވެފައި ވަނީ ބިރުވެރިކަމެއްގެ ތެރޭގައި ނޫސްވެރިން އުޅެން ޖެހިފައިވާ ދުވަސްވަރަކަށެވެ. ޕުޓިންގެ ރިޔާސީ ދައުރު ފެށުނު ފަހުން ގާތްގަނޑަކަށް 33 މިނިވަން ނޫސްވެރިން ވަނީ މަރާލާފައެވެ. މީގެ ތެރެއިން އެންމެ މަޝްހޫރު އެއް ނޫސްވެރިއަކީ އަންނާ ޕޮލިޓްސްކޮވްސްކަޔައެވެ. އަންނާ ވަނީ ޕުޓިންގެ ވެރިކަމާމެދު ފާޅުގައި ނުރުހުން ފާޅުކުރުމުގެ އިތުރުން ރަޝިޔާގެ ސަރުކާރުގެ ތެރޭގައި އުފެދިފައިވާ ކޮރަޕްޝަންގެ މާހައުލު ހާމަ ކުރުމުގައިވެސް ވަރަށް ބޮޑު ދައުރެއް އަދާކޮށްފައެވެ. މީގެ އިތުރުން އޭނާ ވަނީ ޗެޗްނިޔާއާއި ރަޝިޔާއާ މެދު ހިނގަމުން ދިޔަ ހަނގުރާމައިގެ ޚަބަރުތައްވެސް ލިޔެފައެވެ. އަންނާ 2006ވަނަ އަހަރުގެ އޮކްޓޯބަރު 7ވަނަ ދުވަހު އޭނާގެ ގެއަށް ދިޔުމަށް ލިފްޓަށް އެރިތަނާ ވަނީ ބަޑިޖަހައި މަރާލާފައެވެ. ގިނަ ބަޔަކު ޝައްކު ކުރާ ގޮތުގައި އަންނާ މަރާލާފައި ވަނީ ކޮންމެވެސް ބަޔަކު އަޑީގައިތިބެ އޭނާ މަރާލުމަށް އަމުރުކުރުމުންނެވެ. އެކި ފަހަރުގެ މަތިން މި މައްސަލަ އަލުން ބެލުމަށް އަންނާގެ އާއިލާގެ އިތުރުން އޭނާ މަސައްކަތް ކުރަމުން ދިޔަ މީޑިޔާއިން ވެސް ވަނީ ގޮވާލާފައެވެ. ނަމަވެސް އެކަން ކުރެވިފައެއް ނުވެއެވެ.

ދުނިޔޭގެ ބާރުގަދަ ބޮޑެތި ގައުމުތަކަށް ބަލާލުމުން ފެންނަ މަންޒަރަކީ މިއީއެވެ. މިފަދަ ގައުމުތަކުން މިނިވަން ނޫސްވެރިކަމުގެ ނަމުގައި ވާހަކަ ދައްކާނެ ޖާގައެއް އެބައޮތް ބާވައެވެ؟ ކޮންމެ ބަޔަކުވެސް މިނިވަން ނޫސްވެރިކަން މާނަ ކުރަނީ އެބަޔަކަށް އުނދަގޫ ނުވާގޮތަށް ނޫސްވެރިކަން ކުރުމަށެވެ. ކަންކަމުގެ ފަތިފުށް ހާވައި ރައްޔިތުންނަށް ހާމަ ކުރުމަކީ ޤައުމަށް ހިޔާނާތްތެރިވުމެވެ. އެއީ މިނިވަން ނޫސްވެރިކަމޭ ކިޔާކަށް އެމީހުން ބޭނުމެއް ނުވެއެވެ. އަދި އެކަމަށް ފުރުސަތު ދޭން ސަރުކާރުތަކުން ބޭނުމެއް ވެސް ނުވެއެވެ. ކަން މިހެން އޮތް އިރު އަޅުގަނޑުމެންފަދަ ތަރައްގީވަމުން އަންނަ ގައުމެއްގެ ޅަފަތުގެ މިނިވަން ނޫސްވެރިކަމަކަށް ކިހާ ގިނަ ގޮންޖެހުންތަކެއް ކުރިމަތި ވާނެތޯއެވެ؟ މިއީ މިނިވަން ނޫސްވެރިކަމުގެ ދާއިރާއަށް ނިކުންނަ އެންމެންނަށް ކުރިމަތިލާން ޖެހޭނެ ހަގީގަތްތަކެކެވެ. މިނިވަން ނޫސްވެރިކަމަކީ ނަމެކެވެ. ބަލައިގަންނަން އުނދަގޫ ކަމެކެވެ.