އިންޑިޔާގެ ޓެމިލްނާޑޫގެ ޗީފް މިނިސްޓަރަކަށް ކުރީގެ ފިލްމް ސްޓާރު ޖޯސެފް ވިޖޭ ހޮވުމާއި އެކު އޭނާ ފެއްޓެވި ގިނަ ކަންކަމުގެ ތެރޭގައި އަންހެނުންނަށް ހިލޭ ބަސްދަތުރު ކުރެވޭ ޕްރޮގްރާމް ހިމެނެއެވެ.

”ވިކްޓްރީ ޖަރނީ“ ގެ ނަމުގައި ފެށި ޕްރޮގްރާމްގެ ދަށުން ސަރުކާރުގެ ހުރިހާ ބަހެއްގައި އަންހެނުންނަށް ދަތުރު ކުރެވޭނެ ގޮތް ހުކުރު ދުވަހު ވަނީ ހަމަޖައްސާފައެވެ.

މިކަން ލޯންޗް ކުރުމުގެ ރަސްމިއްޔާތުގައި ބައިވެރިވެ ވަޑައިގެން ވިޖޭވަނީ ޗެންނާއީ ކޮޔަމްބެޑޫ ބަސް ޓަރމިނަލް އަށް ވަޑައިގެން ހިލޭ ދަތުރު ކުރެވޭނެކަން އަންގާދޭ ޓިކެޓް އޭނާގެ އަތުން އަންހެނުންނަށް ބައްސަވާފައެވެ.
ޓެމިލް ނާޑޫ ގެ ޓްރާންސްޕޯޓް މިނިސްޓަރ ވިދާޅުވި ގޮތުގައި އަންހެނުން ކުރާ ދަތުރުގައި ޝާމިލްވަނީ ހަމައެކަނި އަންހެންމީހާ ނޫންކަމަށާ މުޅި އާއިލާއަށް އެކަމުގެ ހެޔޮ ފައިދާ ކުރާނެ ކަމަށް ވިދާޅުވެފައި ވެއެވެ.އަދި ހަމަ އެއާއި އެކުއެކީ މިކަމުގެ ފައިދާ މުޅި މުޖްތަމައު އަށް ވެސް ކުރާނެ ކަމަށް ވިދާޅުވެއެވެ. މީގެ އިތުރުން އަންހެނުންނަށް ހުރި ތައުލީމީ ފުރުސަތު ތަކާއި ސިއްހީފަރުވާ އަދި ވަޒީފާގެ ފުރުސަތުތައް ހޯދުމަށް ހުރި ހުރަހަކަށް ޓްރާންސްޕޯޓް ގެ ޚަރަދު ވެގެން ނުވާނެކަމަށްވެސް ވިދާޅުވެފައި ވެއެވެ.
ސަރުކާރުން ބުނާ ގޮތުގައި މިޚިމަތް، އެމީހަކަށް ލިބޭ އާމްދަނީ އަށް ބެލުމެއް ނެތި ހުރިހާ އަންހެނުންނަށް ލިބޭނެއެވެ.އަދި ކޮންމެ ދުވަހަކު ކުރެވޭނެ ދަތުރުގެ އަދަދު ވެސް ކަނޑައަޅާފައެއް ނުވެއެވެ.
މި އިނީޝިއޭޓިވްގެ ދަށުން ކޮންމެ ދުވަހަކު 12،695 ބަހުގައި، 8.5މިލިއަން އަންހެނުން ހިލޭ ދަތުރު ކުރާނެ ކަމަށް ސަރުކާރުން ބުނެފައި ވެއެވެ.
ޓެމިލްނާޑޫ ގައި އަންހެނުންނަށް ދެވޭ ހިލޭ ބަސްދަތުރު ޕްރޮގްރާމް އޮކްޓޯބަރު ދެވަނަ ދުވަހު ފުޅާ ކުރެވުނީ އެދުވަހަކީ އިންޑިޔާގެ ބައްޕަގެ ގޮތުގައި ގިނަ ބަޔަކު ދެކޭ މަހާތުމާ ގާންދީގެ އުފަން ތާރީޚް ކަމަށްވާތީއެވެ.
ކުރިން އަންހެނުންނަށް ހިލޭ ދަތުރު ކުރެވޭ ގޮތަށް އޮތީ މެޓްރޯޕޮލިޓަން ބަސްތަކުގައި 40 ކިލޯމީޓަރަށް ވުރެ ދުރަށް ކުރާ ދަތުރު ތަކުގަޔާއި ފަރުބަދަ މަތީގެ ހިސާބުތަކުން ކުރާ ދަތުރު ތަކުގައެވެ.