ހުޅުމާލޭ ފުރަތަަމަ ފިޔަވަހިން މިއަދު ކަރަންޓުގެ ޚިދުމަތް މެދުކެނޑުނީ ބިން ކޮނުމުގެ ތެރޭގައި ކަރަންޓު ކޭބަލަކަށް ގެއްލުންވެގެން ކަމަށް، ސްޓޭޓް އިލެކްޓްރިކް ކޮމްޕެނީ (ސްޓެލްކޯ)އިން ބުނެފިއެވެ.
ސްޓެލްކޯއިން ބުނިގޮތުގައި، މިކަން ހިނގީ ކުރެދިމާ ހިނގުމުގައި އަމިއްލަ ފަރާތަކުން ކުރިއަށްގެންދިޔަ އިމާރާތްކުރުމުގެ މަސައްކަތެއްގައި، ބިންކޮނުމުގެ ތެރޭގައި ހައިވޯލްޓޭޖް ކޭބަލަކަށް ގެއްލުންވެގެން ކަމަށެވެ.
މީގެ އިތުރުން، މިދިޔަ ބުރާސްފަތި ދުވަހުވެސް މިފަދަ ހާދިސާއެއް ހިނގައި، ހުޅުމާލޭ ފުރަތަމަ ފިޔަވަހީގެ ބައެއް ސަރަހައްދުތަކުން ކަރަންޓު ކެނޑިފައިވާކަމަށާއި، ކައިރިކައިރީގައި މިފަދަ ހާދިސާތައް ތަކުރާރުވެ، ކަރަންޓު ވިއުގައަށް ގެއްލުންވެ، ޚިދުމަތް މެދުކެނޑުމަކީ އާންމު ރައްޔިތުންނަށް އިންތިހާއަށް ދަތިތަކާ ކުރިމަތިލާންޖެހޭ ކަމެއްކަން ފާހަގަކޮށް ސްޓެލްކޯއިން ވަނީ ކަންބޮޑުވުން ފާޅުކޮށްފައެވެ.
އެހެންކަމުން، އިމާރާތްކުރުމާއި މަގުކޮނުމުގެ މަސައްކަތްތައް ކުރާ ހުރިހާ ފަރާތްތަކުންވެސް މިހާރަށްވުރެ ބޮޑަށް ޒިންމާދާރުވެ، ބިމު އަޑީގައިވާ ކަރަންޓު ވިއުގައަށް އެއްވެސް ގެއްލުމެއް ނުވާނޭހެން މަސައްކަތްތައް ރާވައިގެން ކުރިއަށް ގެންދިއުމަށް ސްޓެލްކޯއިން ވަނީ އިލްތިމާސްކޮށްފައެވެ.
