އީރާނަށް ހަމަލާދޭނެ އާ ގޮތްތަކެއް ހޯދުމަށް އެމެރިކާ އަސްކަރިއްޔާއިން އާންމުންގެ އެހީތެރިކަމަށް އެދެން ނިންމައިފިއެވެ.

އީރާނަށް ”ޕްރެޝަރުކޮށް އަދަބު ދޭނެ އުފެއްދުންތެރި އަދި އާދަޔާ ހިލާފު ގޮތްތަކެއް“ ހޯދުމަށް، އެމެރިކާގެ ސެންޓްރަލް ކޮމާންޑް އިން އާދަޔާ ހިލާފު ފިޔަވަޅެއް އަޅައި، އީމެއިލް މެދުވެރިކޮށް އަސްކަރީ އެނަލިސްޓުންގެ އެހީތެރިކަމަށް އެދިފައިވާ ކަމަށް ސީއެންއެން އިން ރިޕޯޓްކޮށްފިއެވެ. ސެންޓްކޮމްގެ އިންޓެލިޖެންސް އޮފިސަރަކު މިދިޔަ ހަފްތާގައި މި ހިޔާލު ހޯދުމުގެ މަސައްކަތް ފަށާފައިވާއިރު، މަސްދަރުތަކުން ބުނާ ގޮތުގައި މިއީ ތެހެރާން އެއްބަސްވުމަކަށް މަޖުބޫރު ކުރުވުމަށް ޓްރަމްޕަށް އޮތް ގަބޫލުކުރެވޭ ފަދަ އިހްތިޔާރުތައް ހުސްވެފައިވާ ކަމުގެ ނިޝާނެކެވެ.

”ސެންޓްކޮމް އިން ދަނީ ހުރިހާ ކަމަކަށް ބަލަމުން“ ސްޓްރެޓެޖީ އަލުން މުރާޖައާ ކުރަން ޖެހޭކަން ގަބޫލުކުރަމުން އެއް މަސްދަރަކުން ބުންޏެވެ. ތަރުޖަމާނު ކެޕްޓަން ޓިމޮތީ ހޯކިންސް މި މަސައްކަތުގެ ދިފާއުގައި ވިދާޅުވީ، އެޑްމިރަލް ކޫޕާ ”އޮޕަރޭޝަނަލް ޕާފޯމަންސް އެންމެ މަތީ ދަރަޖައަށް ގެންދިއުމަށްޓަކައި، ރޭންކަށް ބެލުމެއް ނެތި އަޅުގަނޑުމެންގެ މޮޅު ޓީމުގެ މެންބަރުންގެ އެހީތެރިކަން ހޯއްދަވާ“ ކަމަށެވެ.

މި އީމެއިލް ފޮނުވާފައިވަނީ އީރާނަށް މީގެ ކުރިން ދުވަހަކުވެސް ނުދޭ ފަދަ އާ ހަމަލާތަކެއް ދޭނެ ކަމުގެ އިންޒާރު ޓްރަމްޕް ދެއްވިތާ މަދު ދުވަސްކޮޅެއް ފަހުންނެވެ. ނަމަވެސް ސައުދީ ވަލީއަހުދު މުހައްމަދު ބިން ސަލްމާން އަމިއްލަފުޅަށް ގުޅުއްވައި މަސްލަހަތު ފިނިކުރުމަށް އެދިވަޑައިގަތުމުން ޓްރަމްޕް ވަނީ އެ ނިންމެވުމުން ފަހަތަށް ޖެހިވަޑައިގެންފައެވެ. ހޯރްމޫޒް ކަނޑުއޮޅިއަށް އޮތް ނުރައްކާ ކުޑަކުރުމަށާއި ތެހެރާން އަލުން މަޝްވަރާގެ މޭޒަށް ގެނައުމަށް އަމާޒުކޮށް އެމެރިކާއިން ދިން ވައިގެ ހަމަލާތަކަށް ހަފްތާތަކެއް ވެފައިވާއިރު، އަދި މިހާތަނަށް އެއްވެސް އެއްބަސްވުމަކަށް އާދެވިފައެއް ނުވެއެވެ.

އީރާނުގައި ބާކީ ހުރި ނިއުކްލިއާ މަރުކަޒުތަކަށް ހަމަލާދޭނެ ކަމުގެ އިންޒާރު ޓްރަމްޕް ތަކުރާރުކޮށް ދެއްވަމުން ގެންދަވާއިރު، އޭނާ ދައުވާ ކުރައްވާ ގޮތުގައި މިދިޔަ ހޫނު މޫސުމުގައި ދިން ހަމަލާތަކުގައި އެތަންތަން ވަނީ ”ސުންނާފަތިކޮށްލާފައެވެ.“ ދެ މަސްދަރަކުން ބުނި ގޮތުގައި އަސްކަރިއްޔާއިން ދަނީ ޕިކްއެކްސް މައުންޓަން އާއި ނިއުކްލިއާ މަސައްކަތް ކުރާ ކަމަށް ޝައްކު ކުރެވޭ އެހެން ތަންތަނަށް ހަމަލާދޭން ތައްޔާރުވަމުންނެވެ. ނަމަވެސް، އޮފިޝަލުން އިންޒާރު ދޭ ގޮތުގައި ބިމުގެ އަޑީގައި ވަރަށް ފުންކޮށް ހަދާފައިވާ މިފަދަ ތަންތަނަށް އެމެރިކާގެ އެންމެ ބާރުގަދަ އާދައިގެ ހަތިޔާރުތަކުން ވެސް ކާމިޔާބު ނުވެދާނެއެވެ. އެތަންތަން ހަލާކުކޮށްލުމަށް އެއްގަމު ސިފައިން ބޭނުންވާނެ ކަމަށް ބެލެވޭއިރު، މިއީ މަރުވާ ސިފައިންގެ އަދަދު ހާމަކުރުމުގެ ދެފުށް ފެންނަ މިންވަރާ މެދު އޮތް ފާޑުކިޔުންތަކާ ހެދި ޓްރަމްޕް ދުރުހެލިވަމުން އައި ނުރައްކަލެކެވެ. މި ހަނގުރާމައިގައި މިހާތަނަށް އެމެރިކާގެ މަދުވެގެން 18 ސިފައިން ވަނީ މަރުވެފައެވެ.

ސާފު ކާމިޔާބީއެއް ލިބެން ނެތުމުން، ޓްރަމްޕް މިހާރު އޭނާގެ އަމާޒުތައް ކުޑަކޮށް، އަބުރު ސަލާމަތްކޮށްގެން ހަނގުރާމައިން ނުކުތުމަށްޓަކައި، މީގެ އަހަރެއް ކުރިން ހަމަލާދިން ތަންތަނަށް ނުވަތަ އެފަދަ އެހެން ތަންތަނަށް ރަމްޒީ ”ބަޑިބޭހުގެ ކުޅިވަރެއް“ ފަދަ ހަމަލާތަކެއް ދިނުމަށް ވިސްނަމުންދާ ކަމަށް ރިޕޯޓްތައް ބުނެއެވެ. މިފަދަ ފިޔަވަޅެއްގެ ސަބަބުން އީރާނުގެ ނިއުކްލިއާ ޕްރޮގްރާމް ނައްތާލުމަށް އޭނާ ގެންގުޅުއްވި އަސްލު އަމާޒު ދޫކޮށްލެވޭނެއެވެ. އަދި ހޯރްމޫޒް ކަނޑުއޮޅިއާ ގުޅޭ ހަނގުރާމައިގެ އަސްލު މައްސަލައަށް ހައްލެއް ނުލިބޭނެއެވެ.

”ދުވަސް ނިމޭއިރު، ރައީސް ބޭނުންފުޅުވާނީ އެއްބަސްވުމެއް. އެހެންކަމުން އޭނާ އަބަދުވެސް ބައްލަވާނީ ހަރުކަށިވެފައި މިކަމުން ނުކުމެވޭނެ ގޮތްތަކެއް“ އެއް މަސްދަރަކުން ބުންޏެވެ. އަދި ”ހާއްސަކޮށް އާދައިގެ އިހްތިޔާރުތައް ހުސްވަމުންދާ ނަމަ“ އުފެއްދުންތެރި ވިސްނުން ކޮންމެހެން ބޭނުންތެރި ކަމަށްވެސް އެ މަސްދަރުން އިތުރުކުރިއެވެ.

ސީއައިއޭ އާއި ޑިފެންސް އިންޓެލިޖެންސް އެޖެންސީން އަންދާޒާ ކުރާ ގޮތުގައި މިހާރު ކުރިއަށްދާ ބޮން އެޅުމުގެ ކެމްޕޭނުގެ ސަބަބުން އީރާނުގެ މަޝްވަރާގެ މަގާމަށް ބަދަލެއް އައުމަކީ ނާދިރު ކަމެކެވެ. ޖޮއިންޓް ޗީފްސްގެ ޗެއާމަން ޖެނެރަލް ޑޭން ކޭން ވެސް މިދިޔަ މަހު ގާނޫނު ހަދާ މަޖިލީހުގެ މެންބަރުންގެ ކުރިމަތީގައި އިއުތިރާފުވެވަޑައިގަތީ، ޓްރަމްޕް ކަނޑައަޅުއްވާފައިވާ ހަނގުރާމައިގެ އަމާޒުތައް ހާސިލްކުރުމުގައި ”ވައިގެ ބާރުގެ ހުދޫދުތަކެއް ހުންނަ“ ކަމަށެވެ.