ސިއްހަތަށް ރަނގަޅު ކަމަށް އިޝްތިހާރުކުރާ ގިނަ ކާނާތަކަކީ ހީކުރާ ވަރަށްވުރެ ހިތަށް ގެއްލުން ހުރި އެއްޗެހި ކަމަށް ވެދާނެއެވެ. ހިތުގެ ބަލިތަކާ ބެހޭ ޚާއްޞަ ޑޮކްޓަރެއް ކަމަށްވާ ޑރ. ކައިލާ ލާރާ-ބްރައިޓިންގާ ވިދާޅުވާ ގޮތުގައި، އާންމުކޮށް ބޭނުންކުރާ ބައެއް ތަކެއްޗަކީ ”ހެލްތު ހޭލޯ“ ނުވަތަ ސިއްހަތަށް ރަނގަޅު އެއްޗެއްގެ ގޮތުގައި ދައްކައިގެން އޮޅުވާލާފައިވާ ތަކެއްޗެވެ. މީގެ ސަބަބުން، މީހުންނަށް ހީވަނީ އެމީހުން އިޚްތިޔާރު ކުރަނީ ރަނގަޅު ކާނާ ކަމަށެވެ. ނަމަވެސް ހަގީގަތުގައި އެތަކެތީގެ ސަބަބުން ހިތުގެ ބަލިތަކުގެ ނުރައްކާ ދަނީ އިތުރުވަމުންނެވެ.
ބިޒްނަސް އިންސައިޑަރަށް ދެއްވި އިންޓަވިއުއެއްގައި، ”މޭޔޯ ކްލިނިކް ގައިޑް ޓު އަ ހެލްތީ، ހެޕީ ހާޓް“ ފޮތުގެ ކޯ-އޯތަރ ވިދާޅުވީ، ދިގު މުއްދަތަކަށް ހިތުގެ ދުޅަހެޔޮކަން ބިނާވެފައިވަނީ ކޮންމެ ދުވަހަކު ކާބޯތަކެތި ބޭނުންކުރާ އާދަތަކުގެ މައްޗަށް ކަމަށެވެ. އޭނާ ކިޔައިދެއްވި ގޮތުގައި، ކޮލެސްޓްރޯލް މަތިވުން ނުވަތަ ހިތުގެ އެހެނިހެން މައްސަލަތައް ހުންނަ ގިނަ މީހުންނަށް ނޭނގި ނަމަވެސް، ސިއްހަތަށް ރަނގަޅު ކަމަށް ބުނެ ވިއްކާ، ހަކުރާއި ސެޗުރޭޓެޑް ފެޓް ގިނަ އަދަދަކަށް ހުންނަ ކާނާ ބޭނުންކުރެވެއެވެ.
”ހިތުގެ ދުޅަހެޔޮކަމަކީ އަހަރެމެން ހީކުރާ ވަރަށްވުރެ ބޮޑަށް އަހަރެމެންގެ ބާރުގެ ދަށުގައިވާ ކަމެއް…“ ޑރ. ލާރާ-ބްރައިޓިންގާ ވިދާޅުވިއެވެ. އަދި ދާއިމީ ގޮތެއްގައި ކޮންމެ ދުވަހަކު ނިންމާ ކުދިކުދި ނިންމުންތަކުގެ ސަބަބުން، ހާޓް އެޓޭކް ޖެހުމާއި ސްޓްރޯކް ޖެހުމުގެ ނުރައްކާ ވަރަށް ބޮޑަށް ކުޑަކުރެވިދާނެ ކަމަށް އޭނާ އިތުރަށް ވިދާޅުވިއެވެ.
އޭނާ މަދުކުރުމަށް ނުވަތަ ބޭނުން ނުކުރުމަށް ލަފާދެއްވާ ތިން ކާނާއަކީ:
ބޯން ތައްޔާރުކޮށްފައި ހުންނަ ޕްރޮޓީން ޝޭކްސް
ޕްރޮޓީން ގިނަ އުފެއްދުންތަކަކީ މިހާރު ވަރަށް މަގުބޫލު އެއްޗެހި ކަމަށް ވިޔަސް، ފުޅީގައި ބަންދުކޮށްފައި ހުންނަ ގިނަ ޕްރޮޓީން ޝޭކްތަކުގައި ހައިރާންވާހާ ގިނަ އަދަދަކަށް ހަކުރު ހުރެއެވެ. ބައެއް ފަހަރު މިއީ ކެންޑީ ބާއެއް ނުވަތަ ފޮނި ބުއިމެއްގައި ހުންނަ ވަރަށް ވުރެވެސް ގިނަ އަދަދެކެވެ. ހަކުރު ނުހުންނަ ޝުގަރ-ފްރީ ބާވަތްތަކަކީ ވެސް އެންމެ ރަނގަޅު އެއްޗެއް ނޫނެވެ. ސަބަބަކީ އޭގައި ހުންނަ އާޓިފިޝަލް ފޮނިކުރާ ތަކެތީގެ ސަބަބުން ބަނޑުގެ ސިއްހަތަށް ބުރޫއަރައި، ފޮނި އެއްޗެހި ކާހިތްވުން އިތުރުކޮށްދޭތީއެވެ.
ޕްރޮސެސްކޮށްފައިވާ ބުއިންތަކުގެ ބަދަލުގައި، ޑރ. ލާރާ-ބްރައިޓިންގާ ލަފާދެއްވަނީ ގުދުރަތީ ކާނާއިން ޕްރޮޓީން ހޯދުމަށެވެ. މިސާލަކަށް، ލޮނުކޮޅެއް ޖަހާފައި ހުންނަ ފެހި ސޯޔާ ބީންސް ފަދަ ތަކެތިން ޕްރޮޓީންގެ އިތުރުން ފައިބަރާއި، އެންޓިއޮކްސިޑެންޓްސް އަދި ހިތުގެ ދުޅަހެޔޮކަމަށް އެހީތެރިވެދޭ ގުދުރަތީ މާއްދާތައް ލިބިދެއެވެ.
ފިހާރަތަކުން ގަންނަން ހުންނަ ގްރެނޯލާ
ގްރެނޯލާއަކީ އާންމުކޮށް ހެނދުނުގެ ނާސްތާއަށް ނުވަތަ ލުއި ކާނާއެއްގެ ގޮތުގައި ބޭނުންކުރާ ފައިދާހުރި އެއްޗެއްގެ ގޮތުގައި ބެލެވުނު ނަމަވެސް، ފިހާރަތަކުން ގަންނަން ހުންނަ ގިނަ ބްރޭންޑްތަކަކީ ވަރަށް ބޮޑަށް ޕްރޮސެސްކޮށްފައިވާ ތަކެއްޗެވެ. މީގައި ގިނަ އަދަދަކަށް ހަކުރާއި ސިއްހަތަށް ގެއްލުން ހުރި ފެޓް ހުންނައިރު، ކަސްޓަމަރުން އުންމީދުކުރާ ވަރަށް ފައިބަރެއް ނުހުރެއެވެ.
ޑރ. ލާރާ-ބްރައިޓިންގާ ލަފާދެއްވަނީ އޭގައި ހިމެނޭ ބާވަތްތައް ރަނގަޅަށް ޗެކްކުރުމަށާއި، ގުދުރަތީ އަދި މަދުން ޕްރޮސެސްކޮށްފައިވާ ތަކެތި އިޚްތިޔާރު ކުރުމަށެވެ. މިއަށްވުރެ ވެސް ރަނގަޅު ގޮތަކީ ގޭގައި ގްރެނޯލާ ތައްޔާރުކުރުން ނުވަތަ އޭގެ ބަދަލުގައި މުށެއްގެ މިންވަރަށް ނަޓްސް އާއި ތާޒާ މޭވާ ބޭނުންކުރުމެވެ.
ކާށިތެޔޮ
ވީގަން އަދި ވެޖިޓޭރިއަން ކެއްކުމުގައި ކާށިތެޔޮ ވަރަށް ގިނައިން ބޭނުންކުރި ނަމަވެސް، މީގައި ސެޗުރޭޓެޑް ފެޓް ހުންނަ މިންވަރު އިންތިހާއަށް މައްޗެވެ. މިއީ ބަޓަރު ނުވަތަ ގެރިމަހުގެ ސަރުބީއަށް ވުރެ ވެސް މަތީ މިންވަރެކެވެ. ގަވާއިދުން ކާށިތެލުން ކެއްކުމަކީ ނުވަތަ ކާށިތެޔޮ ހިމެނޭ ޕްރޮސެސްޑް ކާނާ ކެއުމަކީ ކޮލެސްޓްރޯލް މަތިވުމަށް މަގުފަހިވާ ކަމެކެވެ.
ހިތުގެ ޑޮކްޓަރު ފާހަގަކުރެއްވި ގޮތުގައި، އެނާޖީ ބާސް އާއި ޗިޕްސް ފަދަ ތަކެތީގައި ކާށިތެޔޮ އާންމުކޮށް ފޮރުވިފައި ހުރެއެވެ. މީގެ ސަބަބުން ގަސްތަކާ ނުލައި ގިނަ އަދަދަކަށް ތެޔޮ ބޭނުންކުރެވެއެވެ.
ޑރ. ލާރާ-ބްރައިޓިންގާ ބާރުއެޅުއްވީ ހިތުގެ ދުޅަހެޔޮކަން ދެމެހެއްޓުމަށްޓަކައި ދިރިއުޅުމުގެ އާދަކާދަތަކަށް ބޮޑެތި ބަދަލުތަކެއް ގެންނަން ނުޖެހޭ ކަމަށެވެ. ކާނާގެ ލޭބަލްތައް ކިޔުމާއި، ޕްރޮސެސްޑް ކާނާ މަދުކުރުމާއި، އަދި ގުދުރަތީ ފައިދާހުރި ކާނާ އިޚްތިޔާރު ކުރުމުން ދިގު މުއްދަތެއްގައި ބޮޑު ބަދަލެއް ފެންނާނެ ކަމަށާއި، މިއީ ހިތުގެ ނުރައްކާތެރި ބަލިތަކުން ސަލާމަތްވުމަށް އެހީތެރިވެދޭނެ ކަމެއް ކަމަށް އޭނާ ވިދާޅުވިއެވެ.
