ހައްލެއް ލިބިދާނެ ފަދަ ކުރިއެރުމެއް ފެންނަން އޮތްއިރު، ލުބުނާނުގައި ހަމަނުޖެހުންތައް ކުރިއަށްދިޔަ ނަމަވެސް އަދި މެދުއިރުމަތީގެ މަސްރަޙު ނުތަނަވަސްކޮށް އޮތް ނަމަވެސް، ސުލްޙައިގެ އެއްބަސްވުމަކާ ކުރިއަށްވުރެ ގާތްވެފައިވާ ކަމުގެ އިޝާރާތް އެމެރިކާއާއި އީރާނުން ވަނީ ދީފައެވެ.އީރާނުގެ ޚާރިޖީ ވަޒީރު އައްބާސް އަރާގްޗީ ވިދާޅުވީ، އެމެރިކާއާއެކު އޮތް ހަނގުރާމަ ނިމުމަކަށް ގެނައުމަށް އަމާޒުކޮށްފައިވާ ފަހުމުނާމާ ނިންމުމާ ”މިހާ ބޮޑަށް ދުވަހަކުވެސް ގާތްނުވާ“ ކަމަށެވެ.

ނަމަވެސް، އެއްބަސްވުން އަދި ނިހާއީ ސިފައެއްގައި ނިމިފައިނުވާކަމަށް ވިދާޅުވެ، މަޝްވަރާތައް ނިމެންދެން މީޑިއާތަކުން އަމިއްލަ ލަފާކުރުންތައް ނުފެތުރުމަށް އޭނާ އިލްތިމާސްކުރެއްވިއެވެ.މި ވާހަކަތައް އައިސްފައިވަނީ ސިއްރުވެރި ގޮތެއްގައި ހިންގި ވަރުގަދަ ޑިޕްލޮމެޓިކް މަސައްކަތްތަކަކަށް ފަހުގައެވެ. އެމެރިކާގެ ރައީސް ޑޮނަލްޑް ޓްރަމްޕް ވެސް ވަނީ އަރާގްޗީގެ ވާހަކަތައް އޭނާގެ ސޯޝަލް މީޑިއާ ޕްލެޓްފޯމްގައި ހިއްސާކުރައްވައި، އުންމީދީ އިޝާރާތެއް ދެއްވާފައެވެ. މީގެ ކުރިން ޓްރަމްޕް ވަނީ، ހުށަހެޅިފައިވާ އެއްބަސްވުމުގެ ތަފްސީލުތައް ހާމަކުރި ކަމަށް ބުނާ އީރާނުގެ ދައުލަތުގެ މީޑިއާގެ ރިޕޯޓްތަކަކީ ދޮގު ރިޕޯޓްތަކެއް ކަމަށް ވިދާޅުވެ އެކަން ކުށްވެރިކުރައްވާފައެވެ.އުންމީދީ އިޝާރާތްތަކެއް ފެނުނު ނަމަވެސް، ބޮޑެތި ޚިޔާލުތަފާތުވުންތައް އަދިވެސް އެބަހުއްޓެވެ. ތެހެރާނުން ލިބޭ ރިޕޯޓްތަކަށް ބަލާއިރު، އިސްތިރާތީޖީ ގޮތުން މުހިންމު ހޯރްމުޒް ކަނޑުއޮޅިއާއި، އީރާނުގެ ހިފަހައްޓާފައިވާ ބައެއް މާލީ އެސެޓްތަކާ ގުޅޭގޮތުން މަޝްވަރާކުރާ ފަރާތްތަކުން ވަނީ ފުރަތަމަ މަރުހަލާގެ އެއްބަސްވުންތަކަކަށް އައިސްފައެވެ. ނަމަވެސް، އީރާނުގެ ނިއުކްލިއާ ޕްރޮގްރާމާއި ބައިނަލްއަގުވާމީ ދަތިކުރުމުގެ ފިޔަވަޅުތައް އުވާލުމާ މެދު އުފެދިފައިވާ ދެބަސްވުންތަކަށް އަދި ހައްލެއް ނުލިބެއެވެ.އީރާނުގެ އޮފިޝަލުން ލަފާކުރާ ގޮތުގައި، މި މައްސަލަތަކާ ގުޅޭ މަޝްވަރާތައް 60 ދުވަހުގެ މުއްދަތަށް ކުރިއަށްދާނެއެވެ. އެއީ އެއްބަސްވުމަކީ ހަމައެކަނި ވަގުތީ ގޮތުން ހަނގުރާމަ ހުއްޓާލުމެއްގެ ބަދަލުގައި، ދެމެހެއްޓެނިވި ސުލްޙައަކަށް ވާނެކަން ކަށަވަރުކުރުމަށެވެ.ޑިޕްލޮމެޓުން ވާހަކަދައްކަމުންދާއިރު، ބިމުގެ ހަގީގަތް އަދިވެސް އޮތީ ނުރައްކާތެރި ފައްތަރެއްގައެވެ. ލުބުނާނުގެ ދެކުނުގައި އިސްރާއީލުގެ އަސްކަރީ ހަރަކާތްތައް ރޭގަނޑުވެސް ކުރިއަށްދިޔައެވެ. އިސްރާއީލު ސިފައިން ވަނީ 20 ރަށެއްގެ ރައްޔިތުން ޒަހްރާނީ ކޯރުގެ އުތުރަށް ބަދަލުވުމަށް އަމުރުކޮށްފައެވެ. ލުބުނާނުގެ މީޑިއާތަކުން ރިޕޯޓްކޮށްފައިވާ ގޮތުގައި ވައިގެ ހަމަލާތަކުގެ ސަބަބުން އެ ގައުމުގެ ދެކުނުގެ ގެދޮރަށާއި ސަރުކާރުގެ އިމާރާތްތަކަށް ވަނީ ގެއްލުން ލިބިފައެވެ.ހަމައެއާއެކު، ލުބުނާނުގެ ސަރަޙައްދުން ވަން ”ޝައްކުކުރެވޭ އަމާޒެއް“ އިސްރާއީލުގެ ވައިގެ ދިފާއީ ނިޒާމުން ހުއްޓުވާފައިވާ ކަމަށް އެ ގައުމުގެ އަސްކަރިއްޔާއިން ބުނެއެވެ. މި ހާދިސާ ތަހުގީގު ކުރަމުންދާއިރު، އިސްރާއީލުގެ އުތުރުގައި ވަނީ ނުރައްކަލުގެ ސައިރަން އަޅާފައެވެ.ފާހަގަކޮށްލެވޭ ގޮތުގައި، ބައިރޫތުގައި ތިބި މުހައްލިލުންނަށް ފާހަގަވީ ހޮނިހިރު ދުވަހުގެ ފަތިހުގެ ވަގުތުތައް ކުރީގެ ރޭތަކަށްވުރެ އަމާންކޮށް ދިޔަކަމެވެ. މިއީ މަޝްވަރާތައް ކުރިއަށްދާއިރު އަސްކަރީ ހަރަކާތްތައް މަޑުޖެހިދާނެ ކަމުގެ އުންމީދު އާކޮށްދޭ ކަމެކެވެ. ނަމަވެސް، ހަނގުރާމަ ހުއްޓާލުމުގެ ނުވަތަ ސިފައިން ބޭލުމުގެ އެއްވެސް އެއްބަސްވުމެއްގައި އަދި ރަސްމީކޮށް ސޮއިކޮށްފައި ނުވާކަން އޮފިޝަލުން ވަނީ ފާހަގަކުރައްވާފައެވެ.މި އެއްބަސްވުމުގެ ސަބަބުން އިގްތިސާދަށް ކުރާނެ އަސަރުތަކުގެ ސަބަބުން މުޅި ދުނިޔެ އޮތީ މިކަމަށް ފާރަވެރިވެގެންނެވެ. ހޯރްމުޒް ކަނޑުއޮޅި ސަރަޙައްދުގައި ހިނގަމުންދާ ހަމަނުޖެހުންތަކުގެ ސަބަބުން ދުނިޔޭގެ ބާޒާރުގައި ތެލުގެ އަގަށާއި ދަތުރުފަތުރުގެ ޚަރަދުތަކަށް ވަނީ އަސަރުކޮށްފައެވެ. އެއްބަސްވުމަކަށް އާދެވިއްޖެނަމަ، ހަކަތައިގެ ބާޒާރަށް އޮތް ޕްރެޝަރު ކުޑަވެ، ސަރަޙައްދީ ބޮޑު ހަނގުރާމައެއްގެ ބިރު ކުޑަވެގެންދާނެއެވެ.މިވަގުތަށް ދުނިޔެ އޮތީ ޑިޕްލޮމެސީއާއި ހަނގުރާމަ އެކުއެކީގައި ކުރިއަށްދާ މަންޒަރު ބަލަން އުންމީދާއެކު މަޑުކޮށްގެންނެވެ.