އެމެރިކާއިން ދާދިފަހުން ދިން އަސްކަރީ ހަމަލާތަކުގެ ބަދަލުހިފުމުގެ ގޮތުން އީރާނުން ކުވައިތާއި ބަހްރޭނަށް މިސައިލާއި ޑްރޯން ހަމަލާތަކެއް ދިނުމާ ގުޅިގެން، މެދުއިރުމަތީގެ ސަރަހައްދީ ހަމަނުޖެހުން ބޮޑު ހަނގުރާމައަކަށް ބަދަލުވެދާނެކަމުގެ ބިރު ބޮޑުވެއްޖެއެވެ.ކުވައިތުގެ ކަމާބެހޭ ފަރާތްތަކުން ކަށަވަރުކޮށްދީފައިވާ ގޮތުގައި، އީރާނުން ދިން ހަމަލާތައް ކުވައިތު އިންޓަނޭޝަނަލް އެއާޕޯޓުގެ ޓާމިނަލަކަށް އަރައި، އެކަކު މަރުވެ އެތައް ބަޔަކު ވަނީ ޒަޚަމްވެފައެވެ.

އޮފިޝަލުން ވިދާޅުވި ގޮތުގައި މި ހަމަލާގެ ސަބަބުން އެއާޕޯޓުގެ އިންފްރާސްޓްރަކްޗާއަށް ބޮޑެތި ގެއްލުންތަކެއް ލިބި، އޮޕަރޭޝަންތަކަށް ވަނީ ބުރޫއަރާފައެވެ.މި ހަމަލާތައް ދީފައިވަނީ ހޮރްމޫޒް ކަނޑުއޮޅި ކައިރީގައި އޮންނަ ސްޓްރެޓެޖީގެ ގޮތުން މުހިންމު ރަށެއް ކަމަށްވާ އީރާނުގެ ގޭޝްމް އައިލެންޑަށް އެމެރިކާއިން އަސްކަރީ ހަމަލާތަކެއް ދޭނެކަން އިއުލާންކުރިތާ މާގިނަ އިރުތަކެއް ނުވަނީހެވެ. އީރާނުގެ ރިވޮލިއުޝަނަރީ ގާޑް ކޯޕްސް ”އައި.އާރު.ޖީ.ސީ“ އިން މި ހަމަލާތައް ސިފަކުރީ ވޮޝިންޓަނަށް ދިން އިންޒާރެއްގެ ގޮތުގައެވެ. އަދި މި ހަމަލާތަކަކީ އެމެރިކާއަށް ލިބިގެންދާނެ ”ފިލާވަޅެއް“ ކަމަށްވެސް އެ ޖަމާއަތުން ބުނެފައިވެއެވެ.ކުވައިތުގެ މިނިސްޓްރީ އޮފް ޑިފެންސްއިން ބުނި ގޮތުގައި، ފަތިހުން ފެށިގެން އީރާނުން ފޮނުވާލި 13 ބެލިސްޓިކް މިސައިލާއި 17 ޑްރޯން އެ ގައުމުން ވަނީ ހުއްޓުވާފައެވެ. މީގެ ތެރެއިން ބައެއް މިސައިލްތައް ވައިގެ ތެރޭގައި ގޮވުމުގެ ސަބަބުން އާންމުން ދިރިއުޅޭ ސަރަހައްދުތަކަށް ބައިތައް ވެއްޓިފައިވެއެވެ. ސަލާމަތީ ބާރުތަކުން ގެއްލުންތައް ބަލަމުންދާއިރު، ހަމަލާ އަމާޒުވި ސަރަހައްދުތަކަށް ނުދިއުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފައެވެ.މިއީ ފެބްރުއަރީ މަހުގެ ފަހުކޮޅު ވޮޝިންޓަނާއި ތެހެރާނާ ދެމެދު ފެށުނު ކުރިމަތިލުންތަކަށްފަހު، ހަމަނުޖެހުން އެންމެ ބޮޑަށް އިތުރުވި އެއް ފަހަރެވެ. އޭޕްރީލް މަހު ޕާކިސްތާނުން މެދުވެރިއެއްގެ ދައުރު އަދާކޮށްގެން އެކުލަވާލި ހަނގުރާމަ ހުއްޓާލުމުގެ އެއްބަސްވުމުގެ ސަބަބުން ސީދާ ކުރިމަތިލުންތައް މަދުވި ނަމަވެސް، ދާއިމީ ހައްލެއް ހޯދުމަށް ކުރާ ޑިޕްލޮމެޓިކް މަސައްކަތްތަކަށް ވަނީ ހުރަސްތަކެއް ކުރިމަތިވެފައެވެ.ސިޔާސީ ދިރާސާވެރިން ބުނާ ގޮތުގައި، ކުރިމަތިވަމުންދާ އަސްކަރީ ފިއްތުންތަކަށް ވަރުގަދަ ރައްދެއް ދިނުން ނޫން ގޮތެއް އީރާނަށް ނެތް ކަމަށް އެ ގައުމުން ގަބޫލުކުރެއެވެ. ތެހެރާނުގައި ހުންނަވާ ސީނިއާ ރިސާޗް ފެލޯ އައްބާސް އަސްލާމީ ވިދާޅުވީ، ބަދަލު ނުހިފައިފިނަމަ އެއީ ބަލިކަށިކަމެއްގެ ގޮތުގައި ބެލެވި، އެމެރިކާ ނުވަތަ އިސްރާއީލުން އިތުރު ހަމަލާތަކެއް ދިނުމަށް ހިތްވަރު ލިބިދާނެ ކަމުގެ ބިރު އީރާނުގެ ލީޑަރުންނަށް އެބައޮތް ކަމަށެވެ.ހަމައެއާއެކު، ސުލްހައިގެ މަޝްވަރާތަކަށް އޮތް އުންމީދުވެސް ދަނީ ކުޑަވަމުންނެވެ. ދެ ފަރާތުގެ ދެމެދުގައި ޑިޕްލޮމެޓިކް ގުޅުންތައް ކުރިއަށްދިޔަ ނަމަވެސް، ކައިރި މުސްތަގުބަލެއްގައި އެއްބަސްވުމަކަށް އާދެވިދާނެ ކަމާމެދު ގިނަ އީރާނު ރައްޔިތުން ޝައްކު ކުރެއެވެ.މި ހަމަނުޖެހުންތަކާ ގުޅިގެން، ދުނިޔޭގެ ތެޔޮ އުފުލާ އެންމެ މުހިންމު އެއް މަގު ކަމަށްވާ ހޮރްމޫޒް ކަނޑުއޮޅީގެ ސަލާމަތާ މެދު ވެސް ވަނީ ކަންބޮޑުވުން އުފެދިފައެވެ. އައި.އާރު.ޖީ.ސީ އިން އިންޒާރު ދީފައިވަނީ އީރާނުގެ ކަމާބެހޭ ފަރާތްތަކުން ކަނޑައަޅާ މަގުތަކުން ދަތުރުކުރާ އުޅަނދުތައް ނޫނީ ރައްކާތެރި ނުވާނެ ކަމަށެވެ. އަދި އެ އިރުޝާދުތަކާ ޚިލާފުވާ ކޮންމެ އުޅަނދަކަށް ހަމަލާދީފާނެ ކަމަށްވެސް ބުނެފައިވެއެވެ.މިދަނޑިވަޅުގައި، ސަރަހައްދުގެ އެހެން ހިސާބުތަކުގައިވެސް ހަމަނުޖެހުންތައް ދަނީ ކުރިއަށެވެ. ލުބުނާނުގެ ދެކުނުގައި ތިބި އިސްރާއީލު ސިފައިންނަށް އަމާޒުކޮށް ދިން އާޓިލަރީ ހަމަލާތަކުގެ ޒިންމާ ހިޒްބުالله އިން އުފުލާފައިވާއިރު، އިސްރާއީލުން ދިން ހަމަލާތަކެއްގައި ދެ ޕެރާމެޑިކުންނާއި ލުބުނާނުގެ ސިފައިންގެ މީހަކު މަރުވެފައިވާ ކަމަށް ލުބުނާނުގެ އޮފިޝަލުން ވަނީ ރިޕޯޓްކޮށްފައެވެ. މި އަސްކަރީ ހަރަކާތްތައް އެކި ފްރަންޓްތަކަށް ފެތުރެމުންދާއިރު، މި ހަމަނުޖެހުން އަނެއްކާވެސް ސަރަޙައްދީ ބޮޑު ހަނގުރާމައަކަށް ބަދަލުވެ، ހަމަޖެހުމާއި، ވިޔަފާރީގެ މަގުތަކާއި، އަދި ދުނިޔޭގެ ހަކަތައިގެ ބާޒާރުތަކަށް ނުރައްކާވެދާނެ ކަމުގެ ބިރު އޮތުމުން، ޚަލީޖީ ގައުމުތަކުގެ ސަރުކާރުތަކުން ދަނީ އެކަމަށް ތައްޔާރުވަމުންނެވެ.