މެދުއިރުމަތީގެ މަސްރަހު އިތުރަށް ގޯސްވެ، އީރާނުގެ އަސްކަރިއްޔާއިން އެމެރިކާއަށް ވަރުގަދަ އިންޒާރެއް ދީފިއެވެ.

އީރާނުން ބުނެފައިވަނީ ދެން ދޭ ކޮންމެ ހަމަލާއަކަށް ރައްދުދޭނީ ”އާ އުކުޅުތަކާއި ވަސީލަތްތައް“ ބޭނުންކޮށްގެން ކަމަށެވެ. މި ނުތަނަވަސްކަމުގެ ސަބަބުން ހޮރްމޫޒް ކަނޑުއޮޅި ސަރަހައްދުގެ މަސްރަހު ގޯސްވެ، ދުނިޔޭގެ އިގްތިސާދަށް އަންނަނީ ބޮޑެތި ލޮޅުންތަކެއް އަރަމުންނެވެ.މި އިންޒާރު އައިސްފައިވަނީ، އީރާނާއެކު ސިއްރު ”ސީރިއަސް މަޝްވަރާތަކެއް“ ކުރިއަށްދާތީ، ރޭވިފައިވާ ހަމަލާތައް ކެންސަލް ކުރިކަން އެމެރިކާގެ ރައީސް ޑޮނަލްޑް ޓްރަމްޕް ހާމަކުރެއްވިތާ މަދު ގަޑިއިރުތަކެއްގެ ތެރޭގައެވެ. ނަމަވެސް، މަޝްވަރާތައް ނާކާމިޔާބުވެއްޖެނަމަ ”ފުރިހަމަ ހަމަލާއެއް“ ދިނުމަށް އެމެރިކާ އޮތީ ތައްޔާރަށް ކަމަށްވެސް ޓްރަމްޕް ވިދާޅުވިއެވެ.އީރާނުން މިކަމަށް ރައްދުދީފައިވަނީ ވަރަށް ހަރުކަށި އިބާރާތުންނެވެ.އީރާނުގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، އެ ގައުމުގެ އަސްކަރީ އޮފިޝަލުން ވިދާޅުވީ އީރާނަކީ ”ބަންދުކޮށްލެވޭނެ ނުވަތަ ބަލިކޮށްލެވޭނެ“ ގައުމެއް ނޫން ކަމަށާއި، ދެން އޮތް ހަމަ އެކަނި އިހުތިޔާރަކީ އީރާނުގެ ހައްގުތަކަށް އިހުތިރާމްކުރުން ކަމަށެވެ. މީގެ އިތުރުން، ދުނިޔޭގެ ވިޔަފާރީގެ މުހިންމު މަގަކަށްވާ ހޮރްމޫޒް ކަނޑުއޮޅީގެ ފުރިހަމަ ކޮންޓްރޯލް އޮތީ އީރާނުގެ އަތްދަށުގައި ކަމަށްވެސް އެ ގައުމުން ވަނީ ބުނެފައެވެ.މިހާރު ހިނގަމުންދާ ކަނޑުގެ ހަނގުރާމައިގެ މައިގަނޑު މަރުކަޒަކީ މި ކަނޑުއޮޅިއެވެ. ދުނިޔޭގައި އުފައްދާ ތެލާއި ގޭހުގެ ގާތްގަނޑަކަށް %20 އާންމުކޮށް މި މަގުން އުފުލި ނަމަވެސް، ފާއިތުވި ހަފުތާތަކުގައި ހިނގި ކުރިމަތިލުންތަކާއި ކަނޑުގެ މަގުތައް ބަންދުކުރުމުގެ ސަބަބުން އުޅަނދުފަހަރު ދަތުރުކުރުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.އީރާނުގެ އޮފިޝަލުން ސިފަކުރެއްވި ގޮތުގައި، މި ކަނޑުއޮޅިއަކީ އެ ގައުމުގެ ”އިގްތިސާދީ، ސިޔާސީ އަދި އަސްކަރީ ބާރުވެރިކަން“ ދައްކުވައިދޭ ވަސީލަތެކެވެ. އަދި އެތަން އަބަދުވެސް އޮންނާނީ އީރާނުގެ ބެލުމުގެ ދަށުގައި ކަމަށް އެ ގައުމުން ބުނެއެވެ. މިދޭތެރެއިން ބައެއް އުޅަނދުތަކަށް ދަތުރުކުރެވުނު ނަމަވެސް، އެ ސަރަހައްދު އަދިވެސް އޮތީ ނުރައްކާތެރި ހާލަތެއްގައި ކަމަށް ގަތަރުން ވަނީ އިންޒާރު ދީފައެވެ. ކަނޑުގެ މަގުތައް ބަންދުވެފައި އޮތުމުގެ ސަބަބުން ދުނިޔެއަށް ބޮޑު ކާރިސާއެއް ކުރިމަތިވެދާނެ ކަމުގެ ބިރު މިހާރު ވަނީ ބޮޑުވެފައެވެ. އިނގިރޭސިވިލާތުގެ ފޮރިން ސެކްރެޓަރީ އިވެޓް ކޫޕާ އިންޒާރު ދެއްވި ގޮތުގައި، ގަސްކާނާ އެކްސްޕޯޓް ކުރުމަށާއި މުދާ އުފުލުމަށް ހުރަސްއެޅި، ތަކެތީގެ އަގު އުފުލެމުންދާތީ، ދުނިޔެ މި ދަނީ ”ނޭނގި ތިބެ ބޮޑު ކާބޯތަކެތީގެ ކާރިސާއަކާ ދިމާލަށް“ ކަމަށެވެ. މި ދަނޑިވަޅުގައި، ޕާކިސްތާނު މެދުވެރިކޮށް އީރާނުން ވަނީ އެމެރިކާއަށް ސުލްހައިގެ ހުށަހެޅުންތަކެއް ފޮނުވާފައެވެ. އޭގެ ތެރޭގައި ދަތިކުރުމުގެ ފިޔަވަޅުތައް އުވާލުމާއި، ހިފަހައްޓާފައިވާ އީރާނުގެ ފައިސާ ދޫކޮށްލުމާއި، ކަނޑުގެ ބްލޮކޭޑް ނިމުމަކަށް ގެނައުމާއި، ސަރަހައްދުގައި ތިބި އެމެރިކާ ސިފައިން ބޭރުކުރުމުގެ އިތުރުން ހަނގުރާމައިގައި ލިބުނު ގެއްލުމުގެ ބަދަލު ހޯދުން ހިމެނޭ ކަމަށް ރިޕޯޓްތައް ބުނެއެވެ. ނަމަވެސް، މަސްރަހު ދަނީ ދުވަހުން ދުވަހަށް ނާމާންވަމުންނެވެ. އީރާނުގެ މީނާބް ސިޓީގައި ހުރި ޕްރައިމަރީ ސްކޫލަކަށް ދިން ބޮންބުގެ ހަމަލާއާ ގުޅިގެން ބައިނަލްއަގުވާމީ މުޖުތަމައުގެ ނުރުހުން ވަނީ އަމާޒުވެފައެވެ. މި ހަމަލާގައި 150 އަށްވުރެ ގިނަ މީހުން މަރުވެފައިވާއިރު، އޭގެ ތެރޭގައި 120 އެއްހާ ކުޑަކުދިން ހިމެނެއެވެ. ތަހުގީގު ކުރާ ފަރާތްތަކާއި ނޫސްވެރިން ބުނާ ގޮތުގައި އެ ހަމަލާ ދީފައިވަނީ އެމެރިކާގައި އުފައްދާ ”ޓޮމަހޯކް“ މިސައިލް ބޭނުންކޮށްގެންނެވެ. އެހެންނަމަވެސް، އެމެރިކާއިން އަދި މިކަމުގެ ޒިންމާ ރަސްމީކޮށް އުފުލާފައެއް ނުވެއެވެ.ސްކައި ނިއުސްގެ ރިޕޯޓަރުން ބުނި ގޮތުގައި އެ ސްކޫލުން ފެންނަނީ ވަރަށް ބިރުވެރި އަދި ހިތާމަވެރި މަންޒަރުތަކެކެވެ. ދަރިން ގެއްލިފައިވާ އާއިލާތަކުން އަދިވެސް ދަނީ ކީއްވެގެން ހިނގި ކަމެއްތޯ ސުވާލު އުފައްދަމުންނެވެ.ސިޔާސީ މަޝްވަރާތަކާއި ހަނގުރާމައިގެ އިންޒާރުތައް އެކުއެކީގައި ކުރިއަށްދާއިރު، މުޅި ދުނިޔެ މިހާރު އޮތީ ބިރުވެރިކަމެއްގެ ތެރޭގައެވެ. ކުރިއަށް އޮތީ ސުލްހަވެރިކަންތޯ ނުވަތަ މާ ބޮޑު ހަނގުރާމައެއްތޯ ބެލުމަށް ދުނިޔެ މިހާރު އޮތީ ފާރަވެރިވެއެވެ.