ޕީ.ބީ.އެސް ނިއުސް، އެން.ޕީ.އާރު އަދި މަރިސްޓް ގުޅިގެން ކުރިއަށްގެންދިޔަ އާ ހިޔާލު ހޯދުމުގެ ސާވޭއަކުން ދައްކާގޮތުގައި، އީރާނާއެކު ހިނގަމުންދާ ކުރިމަތިލުންތަކުގައި އެމެރިކާގެ ރައީސް ޑޮނަލްޑް ޓްރަމްޕް ގެންގުޅޭ ސިޔާސަތުތަކާމެދު ގިނަ އަދަދެއްގެ އެމެރިކާ ރައްޔިތުން ތިބީ ހިތްހަމަނުޖެހިފައެވެ. މި ސާވޭގެ ނަތީޖާއަށް ބަލާއިރު، ކޮންމެ ދިހަ މީހަކުން ހަ މީހަކު ޓްރަމްޕުގެ ނިންމުންތަކަށް ތާއީދު ނުކުރާއިރު، އިގްތިސާދީ ހީނަރުކަމާއި ތެލުގެ އަގު އުފުލުމާ ގުޅޭގޮތުން އާންމުންގެ މެދުގައި އޮތް ކަންބޮޑުވުންތައް ދަނީ އިތުރުވަމުންނެވެ.

މި ހަނގުރާމައިގެ ސަބަބުން މިހާތަނަށް އިންސާނީ އަދި އިގްތިސާދީ ގޮތުން ބޮޑެތި ގެއްލުންތަކެއް ވަނީ ލިބިފައެވެ. މިއަހަރުގެ ކުރީކޮޅު ހަމަލާތައް ވަރުގަދަވި ފަހުން، އީރާނުގެ އެތައް ސަތޭކަ ބަޔަކު މަރުވެ، އެތައް ހާސް ބަޔަކު ޒަހަމްވެފައިވާ ކަމަށް ރިޕޯޓުތައް ބުނެއެވެ. އަދި އެމެރިކާ ސިފައިންގެ ތެރެއިން މަދުވެގެން 13 މީހަކު ވަނީ މަރުވެފައެވެ. މީގެ އިތުރުން، ދުނިޔޭގެ ކަނޑުދަތުރުފަތުރުގެ އެންމެ މުހިންމު އެއް ސަރަހައްދު ކަމަށްވާ ހޯރްމޫޒް ކަނޑުއޮޅި ސަރަހައްދުގައި އުފެދިފައިވާ ނުތަނަވަސްކަމާ ގުޅިގެން، ދުނިޔޭގެ ބާޒާރުގައި ތެލާއި ގޭހުގެ އަގު ވަނީ އިންތިހާއަށް އުފުލިފައެވެ.
މި ސާވޭއިން ދައްކާ ގޮތުގައި، ތެލުގެ އަގު ބޮޑުވުމުގެ ޒިންމާ 63 އިންސައްތަ އެމެރިކާ ރައްޔިތުން އަޅުވަނީ ޓްރަމްޕްގެ ބޮލުގައެވެ. އެމެރިކާގައި ތެޔޮ ގަލަނެއްގެ އަގު މިދިޔަ އަހަރު 3.17 ޑޮލަރުގައި ހުރުމަށްފަހު، މިހާރު ވަނީ 4.48 ޑޮލަރަށް އުފުލިފައެވެ. ގިނަ އާއިލާތަކުން ބުނާ ގޮތުގައި، ތެލުގެ އަގަށް އައި މި ބަދަލާއެކު ކާބޯތަކެއްޗާއި ދަތުރުފަތުރުގެ އަގު ބޮޑުވެ، ދިރިއުޅުމުގެ ހަރަދުތައް ހަމަޖެއްސުމަށް ވަނީ ވަރަށް ބޮޑަށް ދަތިވެފައެވެ.
އާންމުންގެ މި ނުރުހުމުގެ ސަބަބުން ޓްރަމްޕްގެ މަގުބޫލުކަމަށް ވެސް ވަނީ އަސަރުކޮށްފައެވެ. ޓްރަމްޕުގެ މަސައްކަތަށް ތާއީދުކުރަނީ އެމެރިކާގެ އެންމެ 37 އިންސައްތަ މީހުންނެވެ. ނަމަވެސް 59 އިންސައްތަ މީހުން ވަނީ ނުރުހުން ފާޅުކޮށްފައެވެ. ސިޔާސީ މުހައްލިލުން ގަބޫލުކުރައްވާ ގޮތުގައި، މި ނަތީޖާތަކުގެ ސަބަބުން މިއަހަރު ފަހުކޮޅު ބާއްވާ މިޑްޓާމް އިންތިހާބުގައި ރިޕަބްލިކަން ޕާޓީއަށް ބޮޑެތި ގޮންޖެހުންތަކެއް ކުރިމަތިވާނެއެވެ.
ފާޑުކިޔާ ފަރާތްތަކުން ބުނަނީ މި ހަނގުރާމައަކީ ސާފު ނަތީޖާއެއް ފެންނަން ނެތް، ނުރައްކާތެރި އަދި ބޮޑު ހަރަދެއް ހިނގާ ކަމެއް ކަމަށެވެ. ވަކި ފަރާތަކަށް ނުޖެހޭ ބައެއް ވޯޓުލުންތެރިން ވަނީ، މި ހަނގުރާމައަކީ އެއްވެސް ބޭނުމެއް އޮތް ކަމެއްތޯ ސުވާލު އުފައްދައި، އެމެރިކާ އިތުރު ދިގުދެމިގެންދާ ހަނގުރާމައެއްގެ ތެރެއަށް ވަދެގެން ގޮސްދާނެ ކަމުގެ ބިރު އޮތް ކަމަށް ބުނެފައެވެ.
މީގެ އިތުރުން، މި ސާވޭއިން ދައްކާ ގޮތުގައި އެމެރިކާގެ ރައްޔިތުން ދަނީ ގައުމުގެ ސިޔާސީ ނިޒާމަށް ބޮޑެތި އިސްލާހުތަކެއް ގެނައުމަށް ބާރުއަޅަމުންނެވެ. މީގެ ތެރޭގައި ކޮންގްރެސްގެ މެންބަރުންނަށް އިންތިހާބުގައި ވާދަކުރެވޭނެ ދައުރުތަކުގެ އަދަދު ކަނޑައެޅުމާއި، އުމުރުގެ މިންގަނޑެއް ކަނޑައެޅުމުގެ އިތުރުން، ވޯޓުލާ މީހުންގެ އައިޑެންޓިފިކޭޝަން ގަވާއިދުތައް ހަރުދަނާކުރުން ހިމެނެއެވެ.
ޕީ.ބީ.އެސް ނިއުސް/އެން.ޕީ.އާރު/މަރިސްޓް އިން ކުރިއަށްގެންދިޔަ މި ސާވޭއަކީ 2026 އޭޕްރީލް 27 އިން 30 އަށް، އެމެރިކާގެ އެކި ކަންކޮޅުތަކުން 1,300 އަށްވުރެ ގިނަ ބޮޑެތި މީހުން ބައިވެރިކޮށްގެން ހަދާފައިވާ ސާވޭއެކެވެ.