ފާއިތުވެދިޔަ ހަފުތާއާ ހަމަޔަށްވެސް މޭޖަރ ޖެނެރަލް ޔިފާތު ތޯމަރ ޔެރުޝަލްމީއަކީ އިސްރާއީލުގެ މިލިޓްރީ އެންމެ އިސް އެޑްވޮކޭޓް ޖެނެރަލްއެވެ. އެކަމަކު މިއަދު އެކަމަނާ ހުރީ އިސްރާއީލު ބޮޑު ސިހުމެއްގެ ތެރެއަށް ވެއްޓި އެފުށް މިފުށަށް ޖެހެމުންދާ ފަޟީހަތާއި ބަދުނާމުގެ ތެރޭގައި ޖަލުގައި ބަންދުކޮށްފައެވެ.
މި ބަދުނާމްގެ ތެރޭގައި ކުއްލިއަކަށް އެކަމަނާ އިސްތިއުފާދީފައި އިސްރާއީލުގެ ބިޔަ ދުރުމިން ކުޑަދުވަސްކޮޅަކަށް ނަމަވެސް ގެއްލިގެން ދިޔައެވެ. އެންމެފަހުން އިސްރާއީލު ސަރުކާރުގެ ކެމެރާއަށް އެކަމަނާ އަރާފައިވަނީ ތެލްއަވީވްގެ ބީޗަކުންނެވެ.
އިސްރާއީލަށް މިއައި ހެލުންގަނޑުގެ ސަބަބެއްކަމުގައިވެފައިވަނީ އިސްރާއީލުގެ އަނިޔާވެރިކަން ހައްދުފަހަނަޅާގޮސްފައިވާ ސިފައިން ފަލަސްތީނުގެ ރައްޔިތަކާދޭތެރޭ އިންސާނީ ކަރާމަތާއި ބައިނަލް އަގްވާމީ ގާނުނުތަކަށް ބެލުމެއްނެތި ހިންގާފައިވާ ޖަރީމާތަކުގެ ވީޑިއޯއެއް ދުނިޔެއަށް އާންމުކުރަން ހުއްދަދިނީ އެކަމަނާކަން ސިޔާސީގޮތުން ކުރި ތަހްގީގުގައި އެކަމަނާ އިއްތިތާފް ވުމާގުޅިގެންނެވެ. އެ ވީޑިއޯގައި ފެންނަނީ ޖަލުގައި ބަންދުކޮށްފައިވާ ފަލަސްތީނުގެ ރައްޔިތަކު އިސްރާއީލުގެ ފުލުހުންގެ ވަހުޝީ ޖިންސީ ޝިކާރައަކަށްވެގެންދިޔަ މަންޒަރެވެ. އެ ވީޑިއޯ އާންމުކުރުމުގެ މަގްސަދަކީ އެކަމަނާގެ އޮފީހުން ތަޙްގީގު ކުރަމުން ގެންދިޔަ އެ ވީޑިއޯއިން ފެންނަ މަންޒަރު ތަކުގައި އިސްރާއީލުގެ އަނިޔާވެރިކަމުގެ އިމެއްނެތް ޖަލުގައި ބަންދުކޮށްފައިހުރި ފަލަސްތީނުގެ ގައިދީއަކަށް ކުރަމުންގެންދިޔަ ލަދު ހަޔާތާއި ރަހްމެއްނެތް ޖިންސީ އަނިޔާތައް ދުނިޔެއަށް ސިއްރުކުރަން ބޭނުން ނުވާތީ ކަމަށް އެކަމަނާ ބުނެފައިވެއެވެ. އެ ވީޑިއޯ ލީކް ކޮށްލުމުގެ އަނެއް ބޭނުމަކީ އިސްރާއީލު ސިފައިން ހިންގާ މިބާވަތުގެ ޖަރީމާތަކަށް ފިޔަވަޅު އެޅެމުން ނުދާތީ އެ ކަމުގެ ސަބަބުން އިސްރާއީލުގެ ސިފައިންގެ އަޚްލާގީ ފެންވަރު ދުވަހެއް ދުވަހަކަށް ދަށަށް ދިއުން ހުއްޓުވުމަށް ބާރު އެޅުމެވެ. އެ ވީޑިއޯއިން ފެންނަ މަންޒަރުތައް ހިންގާފައިވަނީ 2024 ވަނައަހަރު ޖުލައި މަހުގެ 5 ވަނަ ދުވަހުއެވެ. ބައިނަލް އަގްވާމީ ބައެއް މީޑިއާތަކަށްވެސް ވަނީ އެ ވީޑިއޯ ފެނިފައެވެ. އޭގަ ބައެއް މަންޒަރުތަކުގެތެރޭގައި ވަޅިއެއް ބޭނުންކޮށްގެން ގައިދީގެ ފުރަގަސްފަރާތް ބޮޑުކުރުމަށްފަހު ޖިންސީ ގުޅުން ހިންގުމާއި ހަށިގަނޑުގެ ގިނަ ކަށިތަކެއް ބިންދާލުން ހިމެނޭ ކަމަށްވެއެވެ. އެ ޖަރީމާއަށް ފަހު އޭނާއަށް ބޭސްފަރުވާ ދިނުމަށް ގެންދިޔަ ހޮސްޕިޓަލްގެ މުއައްޒަފަކު ފުރާނައަށް ބިރުން ވަނަވަރު ސިއްރުކުރުން ޝަރުތު ކޮށް މީޑިއާއަށް ކިޔާދީފައިވާގޮތުގައި އެނާގެ ސިއްހީ ޚިދުމަތުގައި އެ ވަރުގެ އަނިޔާއެއް ކޮށްފައިވާ އިންސާނަކު ނުދެކޭ ކަމަށް ބުނެފައި ވެއެވެ.
ވީޑިއޯ ލީކް ކޮށްލުމާ ގުޅިގެން އިސްރާއީލުގެ ހައްދުފަހަނަޅާފައިވާ ސިޔާސީ ލީޑަރުން ގެންދަނީ އެކަމަނާގެ ބޮލުގައި ހަޑިހުތުރު އިލްޒާމްތައް އަޅުވައި ފިއްތުންތައް ކުރިމަތި ކުރަމުންނެވެ. ނަތީޖާއެއްގެ ގޮތުން މިދިޔަ ހަފުތާގައި އެކަމަނާވަނީ މަގާމުން އިސްތިއުފާ ދެއްވައި ތަފްސީލު ހާމަކޮށްފައިނެތް ކުރު ނޯޓެއް އާއިލާއަށްޓަކައި ބޭއްވުމަށްފަހު ފިލައިގެން ގޮސްފައެވެ. އާއިލާއިން ހީކޮށްގެންތިބީ އިސްރާއީލުގެ ސިފައި އަތުގައި ޖެހެން ބޭނުން ނުވާތީ އެކަމަނާ އަމިއްލައަށް މަރުވީ ކަމަށެވެ. އެހެންނަމަވެސް އިސްރާއީލު ސަރުކާރަށް ލިބިފައިހުރި ކޮންމެ ވަސީލަތެއް ބޭނުން ކޮށްގެންވިޔަސް އެކަމަނާ ހޯދަން އަތްފުނާއަޅަން ފެށީކަމަށްވެއެވެ.
އިސްރާއީލު ސިފައިން އެކަމަނާ ހޯދާފައިވަނީ މިދިޔަ އާދީއްތަ ދުވަހުގެ ރޭގަނޑު ވަގުތެއްގައި ތެލް އަވީވްގެ ބީޗަކުންނެވެ. އަދި ހަމަވަގުތުން އެކަމަނާއަށް މަލާމާތްކޮށް ނަތަންޔާހޫއަށް ތާއީދުކުރާ މީޑިއާތަކުން ވަރަށް ގިނަ ވީޑިއޯ ކްލިޕްތަކެއް މީޑިއާއަށް އޮއްސާލިކަމަށް ވެއެވެ.
އެކަމަނާގެ އެއް ފޯނު ފޮރުވާފައިވާތީ އިސްރާއީލުގެ ހަރުކަށި ސިޔާސީ މީހުން ޝައްކު ކުރަމުން ގެންދަނީ އެކަމަނާގެ ސިއްރުތަކެއް ފޮރުވުމުގެ ބޭނުމުގައި އަމިއްލައަށް މަރުވަން ގަސްދުކޮށްފައިވާ ކަމަށް ބެލެވޭ ކަމަށެވެ.
މޭޖަރ ޖެނެރަލް ޔިފާތު ތޯމަރ ޔެރުޝަލްމީގެ މައްސަލާގައި 3 ދައުވާއެއް ކުރެވޭ ކަމަށް ޖެރޫ ސަލަމްގައި ހުންނަ އިސްރާއީލް ޑިމޮކްރެޓިކް އިންސްޓިޓިއުޓުގެ ނަންދީފައިވާ ތިންކްޓޭންކްގެ ފަރާތުން ވާހަކަދައްކަމުން އެ ޖަމާއަތުގެ ރައީސް ޔޯހަންނާ ޕްލެސްނަރ ބުނެފައިވެއެވެ.
ފުރަތަމަ ދައުވާއަކީ އިސްރާއީލުގެ ޖަލުގައި ހައްޔަރުކޮށްފައިހުރި ފަލަސްތީނުގެ ރައްޔިތަކަށް ދެމުންދިޔަކަމަށް އެ ވީޑިއޯއިންފެންނަ ޖިންސީ އަނިޔާތަކުގެ މައްސަލައެވެ. ދެވައަށް އޮތީ އިސްރާއީލުގެ ޕާރލަމެންޓްގެ މެމްބަރުންވެސް ހިމެނޭގޮތުގައި އާންމު ރައްޔިތުން ފަލަސްތީނުގެ އެބުނާ ރައްޔިތަކަށް ޖިންސީ އަނިޔާކުރުން ތަހްގީގު ކުރަމުން ދިޔައިރު އެކަމަށް ހުރަސް އެޅުމުގެ މައްސަލައެވެ. އަދި ތިންވަނައަށް އޮތި އިސްރާއީލު ސިފައިންގެ ވީޑިއޯ ލީކްކޮށްލީ މޭޖަރ ޖެނެރަލް ޔިފާތު ތޯމަރ ޔެރުޝަލްމީ ކަން ކަށަވަރު ކުރުމެވެ. ޝަރީއަތުގެ ކުރިމަތީގައިވެސް އެ ވީޑިއޯ ލީކް ކޮށްލި ކަމުގެ ރުޅިވެރިކަން ވަނީ ފާހަގަ ކުރެވިފައެވެ.
އިސްރާއީލުގެ ސިޔާސީ މަސްރަހުން ފެންނަމުންދާ މަންޒަރުތަކަށް ބަލާއިރު 7 އޮކްޓޯބަރ 2023 ގެ ހާދިސާގެ ކުރިންވެސް އެ ގައުމުގައި ނުތަނަވަސްކަމާއި ހަލަބޮލިކަން ދިޔައީ ފެތުރެމުންނެވެ. ނަތަންޔާހޫ ހިތްހަމަނުޖެހޭ އެތައް ބޮޑުންނެތް ވަޒީފާއިން ވަކިކޮށް އަދި އަނެއްބަޔަކު ވަޒީފާއިން ވަކިވެގެން ދިއުން ވަނީ މަޖުބޫރު ކޮށްފައެވެ. އެ މަގާމުތައް އަލުން ދީފައިވަނީ އޭނާއަށް ވަފާތެރިކަން އަދާކުރާ މީހުންނަށެވެ. އެންމެފަހުގެ ޚަބަރުތަކުގައި އިސްރާއީލް މިލިޓްރީގެ ޗީފް ޕްރޮސެކިއުޓަރ ކާނަލް މަތާން ސޮލޮމޭޝް ވެސް ވަނީ ހައްޔަރުކޮށްފައެވެ. އެހެންނަމަވެސް ބޮޑުވަޒީރުގެ އޮފީހުން މިކަމާދޭތެރޭ ވާހަކަދައްކަން ބޭނުމެއް ނުވެއެވެ.
އާދިއްތަ ދުވަހުގެ ރޭގެ އެ ކުޑަ ވަގުތު ކޮޅުގެތެރޭގައި ޖެނެރަލް ޔިފާތު ތޯމަރ ޔެރުޝަލްމީއާ ދޭތެރޭ ކަންހިނގާދިޔަގޮތް އިސްރާއީލުގެ އާންމުރައްޔިތުންނާއި އަދި މީޑިއާތަކަށްވެސް އަނގަ ބަންދުކޮށްގެން ތިބުމަށް ރަނގަޅު ފިލާވަޅެއް ލިބިގެންދާނެއެވެ.
އިސްރާއީލުގެ ކުރީގެ ބޮޑުވަޒީރު ޔިޒަހަކް ރަބިން މަރާލިތާ 30 އަހަރުފުރުން އިސްރާއީލު ސަރުކާރުން ރަސްމީގޮތުން ފާހަގަކުރަމުން ގެންދިޔައިރު މޭޖަރ ޖެނެރަލް ޔިފާތު ތޯމަރ ޔެރުޝަލްމީ އިނީ ޣައްދާރެއްގެ ގޮތުގައި ކޯޓަށް ޙާޒިރުކޮށްފައެވެ. މިއީ ޑިމޮކްރެސީގައި އިންސާނީ ކަރާމާތަށް ދީފައިވާ އިހްތިރާމުގެ ލާމަސީލު މިސާލެކެވެ.
One Response
އިސްރާޢީލް ނުޖެހޭނެ ސިހޭކަށްވެސް ލަދެއް ގަންނާކަށްވެސް. އެހެނީ ޝައިތާނު ޓުރަމްޕްގެ ފަނާކުރަނިވި ހަތިޔާރު ބޭނުންކޮށްގެން އެވަނީ ލައްކައެއްހާ މުސްލިމުން ގާޒާގަޔާއި ޔަމަންގައި މަރާފައެވެ. ދެން ކޮން އިތުރު ބޭޒާރެއް؟ ލަދެއް؟ މުސްލިމު ލީޑަރުން ތިބުނާ ލަދެއްގަންބަލަ. 2 ބިލިޔަން މުސްލިމުންތިބެ ރަސޫލާގެ އުންމަތް ލޭކޮށާލަން ޝައިތާނަށް ދީގެން ތިބޭތީ!!!