ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ދިވެހި ޤައުމިއްޔަތަށް ޚިދުމަތްކުރުމުގެ ޚާއްޞަ ޝަރަފު އުތީމު ރައްޔިތުންނަށް ދެއްވައިފިއެވެ.
ޤައުމީ ދުވަސް ފާހަގަކުރުމުގެ ގޮތުން އުތީމުގައި ބޭއްވި ޚާއްޞަ ރަސްމިއްޔާތުގައި، އުތީމު ރައްޔިތުންގެ ފަރާތުން މި އިނާމާ ހަވާލުވެވަޑައިގަތީ އެ ރަށު ކައުންސިލުގެ ރައީސް ޢަބްދުﷲ ރަޝީދެވެ.
މި އިނާމު އެރަށު ރައްޔިތުންނަށް ދެއްވުމަށް ނިންމެވީ އުތީމު ގަނޑުވަރު ބެލެހެއްޓުމުގައި 500 އަހަރުވަންދެން އުތީމު ރައްޔިތުން އަދާކޮށްފައިވާ ދައުރާއި، އެކަމަށް ދީފައިވާ އަހައްމިއްޔަތުގެ އަގުވަޒަން ކުރެއްވުމުގެ ގޮތުން ކަމަށް ރައީސުލްޖުމްހޫރިއްޔާގެ އޮފީހުން މަޢުލޫމާތުދެއްވައެވެ.
އުތީމު ގަނޑުވަރަކީ ޕޯޗްގީޒުންގެ އަތްދަށުން ރާއްޖެ ސަލާމަތް ކުރެއްވި މުޙައްމަދު ތަކުރުފާނުގެ ޢާއިލީ ގެކޮޅެވެ.
އެ ގެކޮޅަށް ތާރީޚީގޮތުންނާއި ޤައުމީގޮތުން ޚާއްޞަ އަހައްމިއްޔަތުކަމެއް ދެނީ، އެ ތަކުރުފާނުގެ ތިން ބެއިން ޕޯޗުގީޒުންގެ އަތްދަށުން ރާއްޖެ މިނިވަންކުރުމަށް ކުރެއްވި ކާމިޔާބު ޖިހާދުގެ ސަބަބުންނެވެ. އެއީ މުޙައްމަދު ތަކުރުފާނު، ޙަސަން ތަކުރުފާނު، އަދި ޢަލީ ތަކުރުފާނެވެ.
ކޮންމެ އަހަރެއްގެ ރަބީޢުލް އައްވަލު މަހުގެ އެއްވަނަ ދުވަހު ރާއްޖޭގައި ޤައުމީ ދުވަސް ފާހަގަކުރަމުން ދަނީ، ދިވެހި ޤައުމު މިނިވަން ކުރެއްވުމަށް މުޙައްމަދު ތަކުރުފާނުގެ ތިން ބެއިން ކުރެއްވި އަގުހުރި ޖިހާދުގެ ހަނދާން އާކުރުމުގެ ގޮތުންނެވެ.
One Response
ތިއޮތީ ވެފައެވެ. ގެރިއަށް އަޅުކަން ކުރާމީހަކު ގައުމަށް ގެނެސް ގައުމުގެ އެންމެ ތި އިސް ޝަރަޕްދީފާ ގައުމިއްޔަތޭ ދީނޭ ގޮވީމާ ވަރަށް ސަޅިއެވެ.