ރަޝިޔާއިން ޔޫކްރެއިންއާއި ދެކޮޅަށް ހިންގަމުން ގެންދާ ހަނގުރާމަ ހުއްޓުމަކަށް ގެނެވޭތޯ ކުރެވެމުންދާ މަޝްވަރާތަކުގައި ޔޫކްރެއިންގެ ރައީސް ޒެލެންސްކީއާއި ޔޫރަޕްގެ އެންމެ ބާރުގަދަ 7 ގައުމުގެ ވެރިން ވައިޓް ހައުސްގައި ރައީސް ޓްރަމްޕް އާއި ބައްދަލުކުރަން ހަމަޖެހިފައިވާ މި ދަނޑިވަޅުގައި ކީވް އަށް ދެން ކްރީމިއާ ނުލިބޭނެ ކަމަށާއި އަދި ނޭޓޯގެ މެމްބަރކަންވެސް ނުލިބޭނެކަމަށް ރައީސް ޓްރަމްޕް އިއުލާން ކުރައްވައިފިއެވެ.
ރައީސް ޓްރަމްޕްގެ ސޯޝަލް މީޑިއާ ޕްލެޓްފޯރމްގައި އެމަނިކުފާނު ލިއުއްވާފައި ވެއެވެ. ”ރައީސް ޒެލެންސްކީ ބޭނުންފުޅުނަމަ ހަމަ މިހާރުވެސް ހަނގުރާމަ ހުއްޓާލެވިދާނެއެވެ. އަދި ބޭނުންފުޅުނަމަ ހަނގުރާމަ ކުރަމުންވެސް ގެންދެވިދާނެއެވެ. މީގެ ބާރަ ވަރަކަށް އަހަރު ކުރިން އެމެރިކާއިން އެންމެ ވަޒަނެއްވެސް ގޮއްވާލުމަކާ ނުލައި ރައީސް އޮބާމާ އެއޮތީ ކްރީމިއާ ރަޝިޔާއަށް ދީފައެވެ. ދެން މިހާރު ޔޫކްރެއިނަށް ނޭޓޯއަކަށް ނުވަދެވޭނެއެވެ.“
ރައީސް ޓްރަމްޕް އާއި ރައީސް ޕޫޓިންގެ ބައްދަލު ކުރެއްވުމަށްފަހު ޔޫކްރެއިނަކީ ރަޝިޔާއާ ދެކޮޅަށް ހަނގުރާމައެއް ކުރުމުގެ ގާބިލުކަން ލިބިފައިވާ ގައުމެއް ނޫންކަމަށާއި އަދި ރަޝިޔާގެ ބާރު ވަޒަންކުރުމަށް ރައީސް ޒެލެންސްކީއަށް ދެންނެވިކަމަށް ވެއެވެ. ގައުމެއްގެ ގޮތުގައި ދެމިއޮތުމަށްޓަކައި ޔޫކްރެއިނަށް އޮތް ހަމައެކަނި ރާސްތާއަކީ ރައީސް ޕޫޓިން ބޭނުންފުޅުވާ ގޮތެއްގެ މައްޗަށް އެއްބަސްވުމެވެ.
ޑޮނާސްކްގެ މުޅި ސަރަހައްދާއި އަދި އިރުމަތީ ޔޫކްރެއިންގެ މުޅި ސަރަހައްދު ރަޝިޔާއިން ބޭނުންވެއެވެ. ޔޫކްރެއިނުން އެ ސަރަހައދުތައް ރަޝިޔާއަށް ދޫކޮށްލައިފިނަމަ ރަޝިޔާގެ ސިފައިންގެ ހަމަލާތައް އެއްކޮށް ހުއްޓާލާނެކަމަށް ރައީސް ޕޫޓިން ވަނީ ޔަގީންކަން ދެއްވާފައެވެ. ރައީސް ޓްރަމްޕްގެ މަޝްވަރާއަށް ރައީސް ޒެލެންސްކީ ވަނީ ދެކޮޅު ހައްދާފައެވެ.
ރައީސް ޕޫޓިން ވިދާޅުވަމުން ގެންދަވަނީ ޔޫކްރެއިނާ ދެކޮޅަށް ހަނގުރާމަކުރަން ޖެހެނީ އެގައުމުން ނޭޓޯގައި ބައިވެރިވުމުގެ ވިސްނުން ގެންގުޅޭތީއެވެ. ހަނގުރާމަ ހުއްޓުވުމުގެ މަޝްވަރާތަކުގައިވެސް ރަޝިޔާއިން އެންމެ ބޮޑަށް ފައިވިއްދަނީ އެކަން ހުއްޓުވުމަށެވެ. އެހެންވީމާ ޠުކްރެއިނުން ބޭނުންވާ ކަންތަކަށް އެމެރިކާ މަގުފަހިކޮށް ނުދޭނެއެވެ.
ނޭޓޯގެ އެހެން ގައުމުތަކުގެ ވިސްނުން އެމެރިކާގެ ވިސްނުމާ އެއްގޮތެއް ނޫނެވެ. ޔޫކްރެއިނަށް ނޭޓޯގެ މެމްބަރ ކަން ދިނުމަށާއި އަދި ރަޝިޔާގެ ބާރުގެ ދަށުގައިހުރި ޔޫކްރެއިންގެ ސަރަހައްދުތައް ޔޫކްރެއިނަށް ލިބެންޖެހޭނެކަމަށް އެ ގައުމުތަކުން ގެންދަނީ ބާރު އަޅަމުންނެވެ.
ރައީސް ޓްރަމްޕްގެ މެސެޖާގުޅޭގޮތުން ރައީސް ޒެލެންސްކީ އެއްވެސް އެއްޗެއް ވިދާޅެއް ނުވެއެވެ. އެކަމަކު ރައީސް ޓްރަމް އާއި ބައްދަލު ކުރެއްވުމަށްޓަކައި މިދިޔަ އާދިއްތަ ދުވަހުގެ ރޭ އެމަނިކުފާނު ވޯޝިންގްޓަނަށް ވަޑައިގެންނެވި ކަމަށް ވިދާޅުވެފައި ވެއެވެ. އަދި ރައީސް ޓްރަމްޕް ދެއްވި ދައުވަތަށް ޝުކުރެވެރިވެ ވަޑައިގަންނަވާކަން ހާމަކުރެއްވުމާއެކު ވީހާވެސް އަވަހަށް ހަނގުރާމަ ހުއްޓި ދާއިމީ ސުލަހައެއް ގާއިމް ވެގެން ދިއުމަކީ އަހަރެމެން އެދޭގޮތް ކަމުގައި ވިދާޅުވެފައި ވެއެވެ. އެކަމަކު ހަނގުރާމަ ހުއްޓި ސުލްހަ ގާއިމް ކުރެވިގެންދާންޖެހޭނީ ކްރީމިއާ އާއި އިރުމަތީ ސަރަހައްދުތަކުން ރަޝިޔާ ސިފައިން ފޭބުމުގެ މައްޗަށެވެ. އެ ސަރަހައްދުތައް ޔޫކްރެއިނަށް އަނބުރާ ލިބެން ޖެހޭނެއެވެ. ކްރީމިއާ ރަޝިޔާއަށް ދޫކޮށްލާނެ އެއްވެސް ގޮތެއް ނޯންނާނެއެވެ.
އެމެރިކާއިން އަހަރެމެންގެ މަގްސަދު ހާސިލުކޮށްދޭނެ ކަމަށާއި އަދި ޔޫކްރެއިންގެ ސަލާމަތާ ރައްކާތެރިކަން ކަށަވަރު ކޮށްދޭނެކަމަށް އަހަރެން އިތުބާރު ކުރަމެވެ. ހަނގުރާމަ ހުއްޓުވުމަކީ ރަޝިޔާގެ ކަމެކެވެ. އަދި ނޭޓޯގެ ފުރިމަ މެމްބަރަކަށް ވެވޭ ދުވަހަކާ ހަމަޔަށް ނޭޓޯއިން ޔޫކްރެއިންގެ ސަލާމަތާ ރައްކާތެރިކަން ކަށަވަރު ކޮށްދޭނެކަމަށް ހާމަކުރުމުން އުފާކުރައްވާ ކަމަށް ވިދާޅުވިއެވެ.
ނޭޓޯއިން ޔޫކްރެއިންގެ ސަލާމަތީ ކަންތައް ބެލެހެއްޓުމަށް މޮސްކޯއިން އިއުތިރާޒް ނުކުރާނެކަމަށް މޮސްކޯ އިން ވިއެނާއަށް ކަނޑައަޅާފައިވާ ދާއިމީ މަންދޫބު މިޚައިލް އުލްޔަނޯވް ވަނީ ވިދާޅުވެފައެވެ. އޭގެ މާނައަކީ މޮސްކޯއަށްވެސް ހުޅަނގުގެ ގައުމުތަކުން ދުއްތުރާ ކޮށްގެން ނުވާނެއެވެ. އަދި މިހާތަނަށް ހުޅަނުގެ ގައުމުތަކުން ދެކެމުން އައިގޮތްވެސް ޖެހޭނީ ބަދަލު ކުރާށެވެ. ރަޝިޔާގެ ގޮނޑުދޮށާ ހަމަޔަށް ނޭޓޯ އަށް އާދެވިގެން ނުވާނެއެވެ.
ހަނގުރާމަ ހުއްޓުވުމުގެ ވާހަކަތައް ދެކެވެމުންދާއިރު ފެންނަ މަންޒަރުތައް މުޅިން ތަފާތެވެ. ދަ ހިލް އިން މިއަދު ބުނެފައިވާގޮތުގައި ދަނޫބު ކޯރުގައި އޮންނަ ޔޫކްރެއިންގެ ބަނދަރަކަށް ރަޝިޔާއިން ހަމަލާ ދިނުމާ ގުޅިގެން ނޭޓޯގެ ލަޝްކަރުތައް ގެންދަނީ ރަޝިޔާއާއި ކައިރިން ރޮމޭނިޔާގެ ސަރަހައްދުތަކަށް ޖަމާ ކުރަމުންނެވެ. އެހެންނަމަވެސް ރަޝިޔާގެ ސިފައިން ރޮމޭނިޔާގެ ތެރެއަށް ވަނުމަށް މަސައްތް ކުރަމުން ގެންދާކަން އެ ގައުމުގެ ދިފާއީ ވުޒާރާއިން ބުނެފައެއް ނުވެއެވެ. ރޮމޭނިޔާގެ ރައްކާތެރިކަން ކަށަވަރު ކުރުމަކީ ނޭޓޯގެ މެންޑޭޓްގެ ތެރޭގައި ހިމެނޭ ކަމެކެވެ.
މިމަހުގެ ކުރީކޮޅުގައި ރަޝިޔާއިންވަނީ ރޮމޭނިޔާއާއި އިންވެގެން އޮންނަ ޔޫކްރެއިންގެ އިސްމާއިލް ސަރަހައްދުގައި އާންމުން ދިރިއުޅެމުން ގެންދާ ސަރަހައްދެއްގެ އިމާރާތްތަކަކަށް ހަމަލާދީފައެވެ. އެ ހަމަލާތައް ފޭލިކޮށްލުމަށް ރޮމޭނިޔާއިން އެފް-16 ގެ ފައިޓަރ ޖެޓް ބޭނުން ކޮށްފައި ވެއެވެ.
ނޭޓޯގެ ސިފައިން ޔޫކްރެއިނަށް ޖަމާކުރަމުން ގެންދާތީ ރަޝިޔާގެ ޚާރިޖިއްޔާގެ ތަރުޖަމާނު މާރިޔާ ޒަޚަރޯވާ ވަނީ ނޭޓޯގެ ލީޑަރުންނަށް އިންޒާރު ދެއްވާފައެވެ.
One Response
އާއެކެވެ. ޓްރަމްޕް ބުނާގޮތެއްވާނީ. މިއޮއްހުރިހާދުވަހު ހަތިޔާރުދީގެން ތަޅުވާ 2 މިލިޔަން މީހުން މަރައި ގައުމު ސުންނާފަތި ވުމަށްފަހު ދެން އެ ނިންމީ އެގޮތަށެވެ. ބޮޑަށް ލަފާކުރެވެނީ ގާޒާ އަމިއްލަކޮށްލަން ޔޫކުރޭނަށް ދޭ ހަތިޔާރުކޮޅު ވޯ ކްރިމިނަލް ނަތަންޔާހޫއަށް ދޭންވެގެން ނިންމާ ނިންމުން ކަމަށެވެ. ނުލަފާ މައްކާ ޚާއިނެއް!