ރާއްޖޭގެ ވެރިކަމުގެ ނިޒާމަކީ ރިޔާސީ ނިޒާމުކަމަށް ދިވެހި ޖުމްހޫރިއްޔާގެ ގާނޫނު އަސާސީގައި ބަޔާން ކުރެވިފައިވެއެވެ. އަދި ރިޔާސީ ނިޒާމުގެ ސިފަތަށްވެސް ވަނީ ގާނޫނު އަސާސީގައި ލިޔެފައި ވެއެވެ. ރިޔާސީ ނިޒާމުގައި ދައުލަތުގެ ތިންބާރު އޮންނަނީ މިނިވަން މުސްތަގިއްލު ތިންބާރުގެ ގޮތުގައެވެ. އެއީ ވެރިކަން ކުރާބާރާއި ޢަދުލު އިންޞާފުގެ ބާރާއި އަދި ރައްޔިތުންގެ ބާރެވެ. ރައްޔިތުންގެ ބާރުހިމެނިގެންވަނީ ރައްޔިތުން ކަނޑައަޅާފައި ވާފަދައިން ރައްޔިތުން އިންތިޚާބުކުރާ ރައްޔިތުންގެ މަންދޫބުން ނުވަތަ މެންބަރުން ތަކެއްގެ މައްޗަށެވެ. އެމެންބަރުންނަކީ ދައުލަތުގެ ތިންބާރުގެ ތެރޭގައި ހިމެނޭ ރައްޔިތުންގެ ހަމައެކަނި ބާރެވެ.އެއީ ރައްޔިތުންގެ މަޖިލިސް ރައްޔިތުންގެ ފަރާތުން ތަމްސީލުކުރާ މެންބަރުންނެވެ. ރައްޔިތުންގެ މަޖިލީހަށް ނިސްބަތްވާ ރައްޔިތުންގެ މަންދޫބުންނެވެ.

ވެރިކަން ފެށެނީ ވެސް ރައްޔިތުންގެ ފަރާތުން ކަމަށް ވީތީ ވެރިކަމުގެ ފަރާތުން ރައްޔިތުންގެ ޙައްގުތަކާ ވާޖިބުތައް އަދާކުރައްވަނީ ދިވެހިޖުމްހޫރިއްޔާގެ ގާނޫނު އަސާސީގައި ބަޔާން ކުރެވިފައިވާގޮތުގެ މަތީން ޢަދުލުވެރިކަމާއި އެކުގައި ރައްޔިތުން އެދޭގޮތަށްތޯ ބަލާ ވެރިކަން ކުރާބާރު ޖަވާބުދާރީކުރުވުމަށްޓަކާ ރައްޔިތުންގެ ފަރާތުން އިންތިޚާބުކޮށްފައިވާ މެންބަރުންނަކީ ދައުލަތުގެ މުސްތަގިއްލު ތިންބާރުގެ ތެރެއިންވާ ރައްޔިތުންގެ ބާރެވެ.

ރައްޔިތުންގެ މިދެންނެވި ބާރުތަކަކީ އެެއްވެސް ބާރަކުން އަނެއްބާރަށް އަރައިނުގަނެވޭނޭހެން ވަކިކުރެވިފައިވާ މިނިވަން މުސްތަގިއްލު ތިންބާރު ކަމަށް ދިވެހި ޖުމްހޫރިއްޔާގެ ގާނޫނު އަސާސީގައި ބަޔާން ކޮށްފައިވެއެވެ. އަދި ވެރިކަން ކުރާބާރުން އަނެއް ދެބާރަށް ނުފޫޒެއް ބާރެއްނުފޯރުވޭނޭ ކަމަށާއި މިއިން ކޮންމެ ބާރަކީވެސް މިނިވަން މުސްތަގިއްލުބާރެއްކަމުގައި ގާނޫނު އަސާސީގައި ލިޔެފައި އޮވެއެވެ.

ގާނޫނު އަސާސީގައި މިދެންނެވި ޢިބާރާތުން ލިޔެ ދައުލަތުގެ ތިންބާރު މިނިވަން ކޮށްދީފައި ވީނަމަވެސް ވެރިކަމުގެ ބާރުން ޖުޑިޝަރީއަށް އަތްބޭނޭފަދަ ބާގަނޑުތަކެއްހަދައި އެ ބާގަނޑުތަކުން އެދަނީ އަތްބާނަމުންނެވެ. ރައްޔިތުންގެ ބާރު ގާނޫނު އަސާސީއިން މިނިވަން ކޮށްދީފައިވާއިރު އެމިނިވަންކަމުގެ ބޭނުން ރައްޔިތުންގެ ބާރުންނުކޮށް ވެރިކަމުގެބާރުން އެހެންބާރުތަކަށް އަތްބާނަން ހަދާފައިވާ ބާގަނޑުތައްވެސް ބައްދައެއް ނުދެއެވެ.

ނަތީޖާއަކީ ގާނޫނުއަސާސީއިން މިނިވަންކޮށްދީފައިވާ ކަމަށް ކަޅާހުދުން ލިޔެފައި އެވާލިއުންތަކަށް ސްޓްރޯޖެހި ޕެރަލައިޒް ވުމެވެ.

ކިތަންމެ ރަނގަޅަށް ފޮތުގައި ލިޔެފައި ވީނަމަވެސް އެލިއުންތަކަށް ޢަމަލުކުރަން ތިބޭ އިންސާނުންގެ ކިބައިގާ ތެދުވެރިކަމާ އަމާނާތްތެރިކަންނެތިއްޖެ ނަމަ އެލިއުންތަކުގެ ހަގީގީ މަގުޞަދު ޙާޞިލެެއް ނުވާނެ ތާއެވެ.އަނެއް ކޮޅުން ގާނޫނު އަސާސީގައި ބަޔާންކުރެވިފައިވާ ގޮތަށް ވެރިކަން ކޮށް ދޭނެ ކަމަށް ބުނެ ﷲ ގަންދީ ހުވާކޮށްފަވެސް ވެރިކަން ކުރަނީ އެ ހުވަޔާ ޚިލާފަށެވެ. ރާއްޖޭގައި ވެރިކަމުގެ ނިޒާމު މައްސުނިވެ އެގަހުކޭލެއް މިގަހުކޭލެއް ވަކިވާނެ ގޮތެއް މިހާރަކު ނެތެވެ. ކޮންމެ މީހަކުވެސް ވެރިކަން ކުރަން ފެށުމާއެކު ދުނިޔޭގެ ހޭވެރިކަން ގެއްލި އެ ފެންނަނީ އަމިއްލަ އެދުން އިސްކުރާތަނެވެ.

މިދާގޮތަށް ވެރިކަން ކުރަމުން ދާނަމަ 2028 ގައި ރާއްޖޭގައި ހުންނަވާނީ ރަސްގެފާނަކަށް ވުމަކީ ދުރުގައި އޮތްކަމެއް ނޫނެވެ. ރައްޔިތުންގެ މަޖިލީހާއި ޖުޑިޝަރީ އޮތީ ވެރިކަމުގެ ބާރާއި ނުފޫޒުގައި ޖެހި ހަފުސް ވެފައެވެ. އެހެން ކަމުން 2028 ގައި ރިޔާސީ އިންތިޚާބު ގެ ބަދަލުގައި އޮންނާނީ ރަސްކަމުގެ އިންތިޚާބު ނޫންބާވައޭވެސް ހިތަށް އަރައެވެ.

ދައުލަތުގެ ތިންބާރު އެކުވުމަކީ ރައްޔިތުން އަޅުވެތިވުމުގެ ޢަލާމާތެކެވެ. ރާއްޖޭގައި މިހާރު ހިނގަމުން މިދަނީ ކުރިން ޢިރާގާއި މިސްރު އަދި ލީބިއާ ފަދަ ގައުމުތަކުގައި ކުރިފަދަ ވެރިކަމެއްކަމުގައި ބެލެވެއެވެ. ރާއްޖޭގެ ވެރިކަމުގެ ނިޒާމު މައްސުނިވެ އޮޅުންބޮޅުންވެ ނިމެނީއެވެ. މުސްތަގުބަލުގައި ރާއްޖޭގެ ވެރިކަން ފުރޮޅިގެން ދާނީ ކޮންނިޒާކަށް ނުވަތަ ކޮން ސިސްޓަމެއްގެ ތެރެއަށްކަމެއް ވެސް ނޭނގެއެވެ. ހިތާމަކީ ރައްޔިތުންގެ މަންދޫބުން ރައްޔިތުންނަށް ޙަރާމް ކޯރުވެ ގާނޫނު އަސާސީއިން ދީފައިވާ މިނިވަން ކަން ނަހަމަގޮތުގައި ބޭނުން ކުރުމެވެ. މުސްލިމް އުންމަތެއްގެ ކަރާމާތަށް އަރައިގަނެ ރައްޔިތުން ޙަވާލުކުރި އަމާނާތަށްވެސް މެންބަރުން ޚިޔާނާތްތެރިވުމެވެ. އެހެން ކަމުން ރާއްޖެ ވެއްޓިފަވާ އަނދަވަޅުން އަރައި ގަތުމަކީ ދަތި އުނދަގޫ ކަމަކަށް ވާނެއެވެ.

މުޅި ގައުމު ރިޝްވަތާއި ފަސާދައިގެ ޙާއްޔަކަށް ބަދަލުވެ ވެއްޖެއެވެ. އެޅޭނެ ފިޔަވަޅެއް ކުރެވޭނެކަމެއް ނެތެވެ.1979 ވަނައަހަރުން ފެށިގެން 2008 ވަނައަހަރާއި ދެމެދު ރާއްޖޭގެ މަސްރަހުން ފެނިގެންދިޔަ ހިތްދަތި ބިރުވެރި ދުވަސްތަކާއި އަނެއްކާވެސް ދިވެހިން ކުރިމަތިލާން ޖެހެނީއެވެ. ހިތާމައިގެ ކޮޅެއް ނެތެވެ. ރާއްޖެ އިސްލާހުކުރާން މުޙައްމަދު ތަކުރުފާނު އެނބުރި ވަޑައެއް ނުގަންނަވާނެއެވެ. ރާއްޖޭގެ މަސްރަހުން ގައުމަށް ތެދުވެރި ގައުމީ ރޫޙާއި ގައުމީ ލޭ ހިނގާ ދަރިޔަކު އުފަންވެގެން މެނުވީ މި ގައުމު އަނބުރާ  ރައްޔިތުންގެ އަތުޖެހޭނެގޮތެއް އަދި ފެންނާކަށްނެތެވެ.