ހައިވޭގައި ބާރު ސްޕީޑުގައި އޯވާޓޭކް ކުރި ސައިކަލެއް އެހެން ސައިކަލެއްގައި ޖެހި ނުރައްކާތެރި  އެކްސިޑެންޓެއް ހިނގުމުންވެސް މަޑުނުކޮށް ފިލި ދިވެހި ފިރިހެނަކު ހައްޔަރުކޮޮށް ބަންދަށް 5 ދުވަސް ޖަހައިފިއެވެ.

ފުލުހުން މިރޭ ބުނީ، އެ އެކްސިޑެންޓް ހިނގީ އިއްޔެ 14:43 ހާއިރު ކަމަށެވެ.

އެގޮތުން ގަވައިދާ ހިލާފަށް އޯވާޓޭކްކުރި ސައިކަލު އެކްސިޑެންޓްވުމުންވެސް މަޑުނުކޮށް ދިޔުމުންވެސް ސައިކަލު ދުއްވި މީހާ ހައްޔަރުކޮށްފައިވާ ކަމަށް ފުލުހުން ހާމަކުރެއެވެ. އަދި އެ މައްސަލާގައި ހައްޔަރުކުރީ ބ. އޭދަފުށި، ފަސްމީރު، ޝުނާން މުހައްމަދު ޝާކިރު (22އ) އެވެ.

އެހެންކަމުން އޭނާގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ބަންދަށް 5 ދުވަސް ޖަހާފައިވާ ކަމަށް ފުލުހުން ބުނެފައި ވެއެވެ.

މީގެ އިތުރުން އެ އެކްސިޑެންޓްގައި އަނިޔާވީ ފިރިހެނަކާއި އަންހެނަކަށް ކަމަށާއި އެ ދެ މީހުންނަށްވެސް ހުޅުމާލޭ ހޮސްޕިޓަލުގައި ފަރުވާ ދިނުމަށް ފަހު މިހާރު ދޫކޮށްލާފައިވާ ކަމަށް ފުލުހުންބުނެފައި ވެއެވެ.