ރާއްޖޭގައި ފުރަތަމަ ފަހަރަށް ފިޝަރީޒް ޓްރޭނިންގ އިންސްޓިޓިއުޓެއް ގާއިމުކުރަން ނިންމަވާފައިވާކަން ރައީސް ޑރ.މުޙައްމަދު މުޢިއްޒު ރޭ އިއުލާނު ކުރައްވައިފިއެވެ.

ދިވެހިރާއްޖޭގެ 43 ވަނަ މަސްވެރިންގެ ދުވަހުގެ މުނާސަބަތުގައި ބޭއްވި ޖަލްސާގައި ރައީސް ވިދާޅުވީ މަސްވެރިކަން ޒަމާނީކޮށް، މަސްވެރިންގެ ގަދަރު އުފުލައި، މަސްވެރިކަން ތިޔާގިކުރުމަކީ ސަރުކާރުގެ ވަރަށް ބޭނުންވާ ކަމެއް ކަމަށާއި އެކަމަށްޓަކައި މަސްވެރިކަން އިލްމުވެރިކުރުން އެއީ ނުހަނު ބޭނުންތެރި ކަމެއް ކަމަށެވެ.

އަދުގެ މަސްވެރިންގެ ތަޖުރިބާއާއި، ޒުވާން މަސްވެރިންނަށް ފޯރަންވީ ހުނަރާއި، އަދުގެ ދުނިޔޭގައި ކުރިއަރާފައިވާ ގައުމުތަކުގައި އޮތް ފަންނިއްޔާތު، ރާއްޖޭގެ މަސްވެރިކަމުގައި ޝާމިލްކުރުމަކީ އެމަނިކުފާނުގެ ހުވަފެނެއް ކަމަށާއި އެއީ ހާސިލުކުރާނެ ހަގީގަތެއްކަމަށް ރައީސް ވިދާޅުވިއެވެ. ރައީސް ވިދާޅުވީ މިކަމަށްޓަކައި މަސްވެރިން ތަމްރީނުކުރާ މަރުކަޒު، ނުވަތަ ފިޝަރީޒް ޓްރޭނިންގ އިންސްޓިޓިއުޓް ގާއިމުކުރައްވާނެ ކަމަށާއި މި އިންސްޓިޓިއުޓް ގާއިމުކުރައްވާނީ ދިވެހިރާއްޖޭގެ ގައުމީ ޔުނިވަރސިޓީއާ ގުޅިގެން ކަމަށެވެ.

މިކަމުގެ އިދާރީ މަސައްކަތްތައް ’ހަފުތާ 14“ އިގެ މި މުއްދަތުގެ ތެރޭގައި ހިނގަމުންދާ ކަމަށްވެސް ރައީސް ވިދާޅުވިއެވެ.