ރައީސް ޑރ.މުޙައްމަދު މުޢިއްޒުގެ ރިޔާސީ އެޖެންޑާގައި މީޑިއާއާއި ނޫސްވެރިކަން ކުރިއެރުވުމަށް ޚާއްސަ ސަމާލުކަމެއް ދެއްވާފައިވާއިރު އެމަނިކުފާނުގެ ޒައާމަތުގައި ދިވެހި މީޑިއާތަކަށާއި ދިވެހި ނޫސްވެރިކަމަށް ކުރިއެރުމާއި ކާމިޔާބީގެ ރަން ޒަމާނެއް ގެނެސްދެއްވާނެ ކަމަށް ނައިބު ރައީސް ޙުސައިން މުޙައްމަދު ލަޠީފް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ މޯލްޑިވްސް މީޑީއާ ކައުންސިލުން އިންތިޒާމްކޮށްގެން ރޭ ބޭއްވި “ނޫސްވެރިންގެ އިނާމު 2022“ ހަފުލާ ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
ދިވެހިރާއްޖޭގެ އިސްލާމީ ޔުނިވަރސިޓީގައި ބޭއްވި ރަސްމިއްޔާތުގައި ނައިބު ރައީސް ވަނީ ވަނީ ނޫސްވެރިކަން ކުރިއަރުވައި ރަނގަޅު ނަތީޖާ ނެރުމަށް ސަރުކާރުން އަމާޒުހިފާފައިވާ ކަންކަމުގެ މައްޗަށް އަލިއަޅުއްވައިލައްވައިފައެވެ.
އެގޮތުން ނައިބު ރައީސް ފާހަގަކުރެއްވި ކަންކަމަކީ ދައުލަތުގެ ބަޖެޓުން ނޫސް މީޑިއާތަކަށް ފައިސާ ދިނުމާއި އަމިއްލަ ފައިމައްޗަށް ތެދުވެ މިނިވަންކަމާއެކު މަސައްކަތްކުރެވޭނެ މަގު ނޫސް މީޑިއާތަކަށް ފަހިކޮށްދިނުމާއި އޮފީސް ޚަރަދުކުޑަކޮށް މީޑިއާ ހިންގޭނެ މީޑިއާ ވިލެޖެއް ގާއިމުކޮށްދިނުމާއި އެކި ދާއިރާތަކުން ނޫސްވެރިން ތަމްރީނުކޮށް ތައުލީމުދީ ގާބިލު ނޫސްވެރީން ބިނާކުރުމަށް ދައުލަތުން ހޭދަކުރުމާއި ސަރުކާރުން ޚަބަރާއި މައުލޫމާތު ފޯރުކޮށްދިނުމުގައި ނޫސްތަކުގެ މެދުގައި ތަފާތު ނުކޮށް ނޫސްވެރީންނަށް ޖަވާބުދާރީވެ ޒިންމާދާރުކަމާއެކު ކަންކަން ހާމަކުރުމެވެ.
ނައިބު ރައީސް ވަނީ ކުރިއާ އަޅައި ބަލާއިރު މީޑިއާތަކާއި ނޫސްވެރިންގެ ޒިންމާ މި ޒަމާނުގައި ބޮޑުވެފައިވާ މިންވަރަށް އަލިއަޅުވައިލައްވައިފައެވެ.
އެގޮތުން ވިދާޅުވީ ސޯޝަލް މީޑިއާގެ ސަބަބުން ކޮންމެ މީހަކަށް ވެސް މިހާރު ފަސޭހަކަމާއެކު ޚަބަރެއް ފަތުރާލެވިދާނެ ކަމަށާއި ނަމަވެސް ރައްޔިތުންނަށް ތެދު ޚަބަރު ފޯރުކޮށްދީ, ކޮންމެ ކަމެއްގެ ވެސް ހުރިހާ ފަރާތެއް ހާމަކޮށް ދޮގާއި ފިތުނަ ފެތުރުނަ ނުދީ ގައުމުގެ އަގުތައް ހިފެހެއްޓުންފަދަ ހުރިހާ ކަމަކީ ނޫސްވެރީންގެ ކޮނޑުގައި އެޅިފައި އޮތް ވަރަށް މުހިންމު ވާޖިބެއްކަމުގައެވެ.
