ކައުންސިލްތަކުން ނިންމާ ނިންމުންތަކަކީ ހުރިހާ ރައްޔިތުންގެ ހައްޤުތައްވެސް ކަށަވަރު ވާނޭހެން ނިންމާ ނިންމުން ތަކަކަށް ހެދުމަށް ލޯކަލް ގަވަރުމަންޓް އޮތޯރިޓީ (އެލްޖީއޭ) އިން އިލްތިމާސްކޮށްފިއެވެ.
އެލްޖީއޭއިން މިކަމަށް އިލްތިމާސްކޮށްފައި މިވަނީ ވ.ފެލިދޫ ކައުންސިލަށް ދައްކަންޖެހޭ ފައިސާ ނުދައްކާ މީހުންނާއި އެމީހުންގެ އަނބިން ފިރިން އަދި ދަރިންނަށް ކައުންސިލުން އެއްވެސް ޚިދުމަތެއް ނުދިނުމަށް އެ ކައުންސިލުން ނިންމާފައިވާ ކަމަށް ބުނެ މީޑިއާތަކުގައި ދައުރު ވަމުންދިޔަ ޚަބަރާ ގުޅިގެން ހުރިހާ ކައުންސިލްތަކަށް އަމާޒުކޮށް ނެރުނު ބަޔާނެއްގައެވެ.
އެލްޖީއޭއިން ބުނީ އެކިއެކި ފަރާތްތަކުން ކައުންސިލްތަކުން ލިބިގަންނަ ޚިދުމަތްތަކާއި މަދަނީ މުއާމަލާތްތަކާ ގުޅިގެން ދައްކަންޖެހޭ ފައިސާ ޤަވައިދުން ނުދެއްކުމަކީ އެ އޮތޯރިޓީން ނުހަނު ކަންބޮޑުވާ މައްސަލައެއް ކަމަށެވެ. އެކަމުގެ ސަބަބުން ކައުންސިލްތަކުން ފޯރުކޮށްދޭ ޚިދުމަތްތައް ފޯރުކޮށްދިނުމަށް މާލީގޮތުން ނުހަނު ގޮންޖެހުން ކުރިމަތިވާނެ ކަމަށް ވެސް އެލްޖީއޭއިން ބުންޏެވެ.
އެލްޖީއޭއިން ބުނީ ކައުންސިލްތަކުން ހަދާ ގަވައިދުތަކާއި ނިންމާ ނިންމުންތައް ނިންމަންވާނީ ޤާނޫނުއަސާސީން އެއްވެސް ރައްޔިތަކަށް ލިބިދޭ އަސާސީ ހައްޤަކަށް އުނިކަން ލިބިގެން ނުދާނޭހެން ކަމަށެވެ. އަދި އެއީ ކައުންސިލްތަކަށް ލިބިފައިވާ ޤާނޫނީ ބާރުގެ ތެރެއިން ނިންމާ ނިންމުމަކަށް ވާންވާނެ ކަމަށާއި ރަށެއްގެ ރައްޔިތުން އެއަށް އަމަލު ކުރުމަށް ނިންމާ ކޮންމެ ނިންމުމެއް ވާންވާނީ ޤާނޫނަކުން ނުވަތަ ގަވާއިދަކުން އެއަށް ބާރު ލިބިގެން ނިންމޭ ނިންމުމަކަށް ކަމަށެވެ.
ހަމަ އެހެންމެ ޤާނޫނުއަސާސީގައި ކަށަވަރުކޮށްދީފައިވާ އަސާސީ ހައްޤުތަކުގެ ތެރެއިން ބައެއް ކަންކަން ހަމަޖައްސައިދެނީ ކައުންސިލްތައް މެދުވެރިކޮށް ކަމަށްވާއިރު ކައުންސިލަކުން ފޯރުކޮށްދޭ ޚިދުމަތްތަކުން އެއްވެސް ރައްޔިތަކު މަހުރޫމު ކުރެވޭނީ ޤާނޫނުއަސާސީއާއި ހިލާފު ނުވާނޭހެން ފާސްކޮށްފައިވާ ޤާނޫނަކުން ނުވަތަ ގަވާއިދަކުން އެކަންކުރުމުގެ ބާރު ލިބިގެން ކަމަށްވެސް އެލްޖީއޭގެ ބަޔާނުގައި ބުނެފައިވެއެވެ.
އެލްޖީއޭއިން ބުނީީ ކައުންސިލަކާއެކު ވެވޭ މަދަނީ މުއާމަލާތެއްގެ ސަބަބުން އެފަރާތަކުން އަދާކުރަންޖެހޭ ކަމެއް ނުވަތަ ދައްކަން ޖެހޭ ފައިސާއެއް ނުދެއްކުމަކުން ވަކިފަރުދަކާމެދު ފިޔަވަޅެއް އަޅަން ވާނީ އެފަދަ މުއާމަލާތަކާ ގުޅިގެން ހެދިފައިވާ އެއްބަސްވުމެއްގައި ބަޔާންކުރާ ނުވަތަ ޤާނޫނާއި ގަވާއިދުގައި ބަޔާންކުރާ ގޮތެއްގެ މަތިން ކަމަށެވެ.
މިގޮތުން އެފަދަ މުއާމަލާތަކާ ގުޅިގެން އެ މުއާމަލާތުގައި ނުހިމެނޭ، އެކިއެކި ފަރުދުންގެ މަދަނީ ހައްޤެއް ހިފެހެއްޓުމަކީ ކައުންސިލްތަކުން ކޮށްގެންވާނެ ކަމެއް ނޫން ކަމަށްވެސް އެލްޖީއޭއިން ބުންޏެވެ.
މީގެ އިތުރުން ލޯކަލް ކައުންސިލްތަކުން ނިންމާ ނިންމުންތައް ނިންމުގައި އެއްވެސް ރައްޔިތެއްގެ މަދަނީ ހައްޤަކަށް އުނިކަން ނާންނާނޭހެން ހުރިހާ ރައްޔިތުންގެ ހައްޤުތައް ކަށަވަރުވާނޭހެން ނިންމުންތައް ނިންމުމަށް ލޯކަލް ކައުންސިލްތަކަށް އެލްޖީއޭއިން ވަނީ އިލްތިމާސްކޮށްފައެވެ. އަދި އެއްވެސް ރައްޔިތަކު އެ ނިންމުމެއްގެ މައްޗަށް އަމަލުކުރަން ލާޒިމުވާ ނިންމުމެއް ކައުންސިލަކުން ނިންމެވުމުގެ ކުރިން އެކަން ކަމަށް ބޭނުންވާ މުނިސިޕަލް ގަވައިދުތައް ކައުންސިލްތަކުން ފާސްކޮށް ގެޒެޓްކުރުމަށް ވެސް އެލްޖީއޭއިން ވަނީ އިލްތިމާސްކޮށްފައެވެ.
