ރަޝިއާގެ ކަމާބެހޭ ފަރާތްތަކުން ބުނެފައިވާގޮތުގައި މަޝްހޫރު ސައިބާ ކްރައިމް ގްރޫޕެއް ކަމަށްވާ ރީއީވިލްގެ މެމްބަރުން ހައްޔަރުކޮށް އޭގެތެރެއިން ގިނަ ބަޔެއްގެ މައްޗަށް ރަޝިޔާއިން މިހާރުވަނީ ދައުވާ އުފުލާފައެވެ.

މި ގްރޫޕް ހައްޔަރުކުރުމަށް މަގުފަހިވާ މައުލޫމާތު ދޭ ފަރާތަކަށް އެމެރިކާއިން ވަނީ 10 މިލިއަން ޑޮލަރު އިނާމެއްގެ ގޮތުގައި ހުށައަޅާފައެވެ.

ރަޝިއާގެ އެފްއެސްބީއިން ބުނެފައިވާ ގޮތުގައި މި ގްރޫޕްގެ މީހުން ހައްޔަރު ކުރެވުނީ އެމެރިކާއިން ދިން މައުލޫމާތުތަކުގެ އެހީގައެވެ. ނަމަވެސް މި ގޭންގަށް ނިސްބަތްވާ ރަޝިއާގެ އެއްވެސް ރައްޔިތެއް އެމެރިކާއަށް ނުފޮނުވާނެ ކަމަށް ވެސް ރަޝިޔާއިން ވަނީ ބުނެފައެވެ.

ރަޝިއާގެ ނޫސް އޭޖަންސީތަކުން ރިޕޯޓްކޮށްފައިވާގޮތުގައި ރީއީވިލް ގޭންގަކީ ނުރައްކާތެރި ސޮފްޓްވެއާ އުފައްދައި އެ ތަކެތި ވިއްކުމުގެ އިތުރުން ބޭރު ގައުމުތަކުގެ ރައްޔިތުންގެ ބޭންކުން ފައިސާ ވަގައްނެގުން ފަދަ އަމަލުތައް ކޮށް އުޅުނު ގޭންގެކެވެ.

އެފްއެސްބީއިން ބުނެފައިވާ ގޮތުގައި މި ގޭންގް ހައްޔަރުކުރުމުގެ ތެރޭގައި 4 މިލިއަން ޕައުންޑު ވަނީ އަތުލައި ގަނެވިފައެވެ. އަދި ކްރިޕްޓޯ ކަރެންސީގެ ގޮތުގައި 440،000 ޕައުންޑު ވެސް ވަނީ އަތުލައި ގަނެވިފައެވެ. މީގެ އިތުރުން އެގޭންގުން ކޮށްފައިވާ އަމަލުތަކުން ހޯދި ފައިސާއިން ގަނެފައިވާ އަގުބޮޑު 20 ކާރުވެސް ވަނީ އަތުލައި ގަނެވިފައެވެ.

އެފްއެސްބީއިން ބުނެފައިވާ ގޮތުގައި ރީއީވިލްއާ ގުޅުންހުރި ހުރިހާ ފަރާތްތަކެއް މިހާރުވަނީ ހައްޔަރުކުރެވިފައެވެ.

ރަޝިއާއިން ރީއީވިލް ގޭންގް ހައްޔަރު ކޮށްފައިވަނީ ރަޝިއާ އަދި އެމެރިކާގެ މެދުގައި މަސްލަހަތު ވަރަށް ގޯސްވެފައިވާ ދަނޑިވަޅެއްގައެވެ.